華富財經 Quamnet.com Logo
龔成
2021-12-22 15:00:12
【龔成問答信箱】(Q23961-Q23970)

Q23961:

老師,想問收益率和收益TTM,有什麼分別?

龔成老師︰

你係財經網站見到股息率,係要對上一個完整的財政年度計算。

而股息率TTM,計算方式就是用前面四個季度去計算。

「過年一年」和「前面四個季度」主要區別,就是有TTM比無TTM的一個,會更加準確一點,數據來得更新一些。

Q23962:

早晨,龔sir, 請問騰訊(700)合理價位大概係幾多?咩價位可以入,本身無持有。

另外,現持有比亞迪電子(285) 4手,價位為24.15,請問現在再加注是否適合?謝謝

龔成老師︰

騰訊(0700)受政策因素影響,中短期弱,企業的賺錢能力會略減,以及企業估值都會略減,不過,政策影響未到核心性,無令到企業無法賺錢,只是賺錢減少。

這企業長遠仍有質素,有發展力的。佢最有價值的,就是「平台」,這亦是現世代好有發展的資產。

佢業務模式係提供平台,如通訊平台、交易平台、入門網站、遊戲平台等,而收入來源則是其廷伸的服務,如增值服務、網絡廣告、電子商務交易等。

過往的業績理想,又身處長遠有增長的行業,加上擁有重要的資產,即龐大的客戶群,將來發展各業務都有相當的優勢,這都是騰訊值錢的地方。不過,政策會令其賺錢能力減,不過,長遠騰訊仍找到賺錢方法,簡單來說,就是現時定了新的遊戲規則,而企業要時間去適應,中短期賺錢能力減,但長遠會慢慢好轉。

現價合理區中間至中上部,無貨已可以首注,之後用分注或月供儲貨就可以。

比亞迪電子(0285)質素不差的,有潛力。睇佢過往發展都正面,有技術,而前景都唔錯。

現價算係合理區中下部,但由於你都已經有一定貨在手,建議你等佢回多1成左右,才考慮加下一注。

Q23963:

老師,ETF 2809 點睇?

龔成老師︰

GX中國潔能(2809),其目標為追蹤SOLACTIVE中國清潔能源指數NTR之表現。

當中佔最多為"半導體產品與設備"股份,約組合4成,其次是逾2成的"獨立電力及可再生電力"。

此股平貴不易分析,而且頭10大股份中,除了信義光能(0968)外,其餘都在內地上市。

潛力度是有的,而且係一籃子股票,較有分散風險能力。但會比較波動,如投資宜慢慢分注,可長線。

Q23964:

老師你好,想請教一下eg 1446 1373 152這些股,佢地低pe,算高股息率及pb率又ok,點解會長期處於低位,謝謝老師的指導

龔成老師︰

主要係由於,這些企業增長力不高,雖然派息率係偏高。但相比較優質的收息股,好似港燈(2638)、深高速(0548)、香港電訊(6823)等,佢地又未去到個個優質度。

你唔好因為佢地PE低,就覺得佢地股價係處於低位。有機會係本身質素和增長力,令到市場給予一個較低PE值。

鴻福堂(1446)質素算是不過不失,未算高質。產品都有一些支持者,但發展力卻不強。

睇翻財務數據,每年盈利不高,生意多年來無特別增長,反映佢在開發市場方面,只是做得一般。

現價算是合理,投資價值中等。

國際家居零售(1373)係一間於香港、新加坡、馬來西亞西部、中國內地及澳門均擁有業務的家品零售連鎖商,提供超過2萬款家品。

集團的店舖及特許店以「日本城」等品牌經營。

過往財務數據不差,生意盈利保持增長,有長線投資的價值。現價合理區中上部,仍是可投資的。

深圳國際(0152)有質素,是不差的收息股。

佢主要從事收費公路的開發、營運及管理;物流中心及綜合物流港的建設、營運及管理;提供第三方物流服務、物流資訊及金融服務、港口及相關服務、物流園轉型升級服務。

過往業務穩定,生意與盈利都不差,不過就不是高增長類。這股都有長線投資的價值。

現價合理,投資收息可以。

Q23965:

亞sir, 你好!我是你舊生,初級和高階都上完了!真係獲益良多!多謝你!

請問你會唔會開類似研集班的課堂?講下市况,個股分析?好想再上你的堂!!

另外,我請教你潔淨能源,環保概念優質股,有潛力的,有什麼推介?

謝謝!

龔成老師︰

暫時唔會有研集班這類課程,因為要準備一個課程,其實要好多時間,所以暫時唔會開辦住。

但我不時都會係FB,更新下一些同學們或者讀者們,要注要的資訊,希望可以暫時幫到大家,較正確去判斷一些突發事情。

至於環保概念,你可以考慮一些上游生產光伏玻璃的企業,好似信義光能(0968)、福萊特玻璃(6865)。

不過前者只在合理區中上部,暫時不宜大注,可以先用月供或分注儲貨。而後者是偏貴,最好等明顯回調,才開始小注入貨。

另外,你可以考慮一些行業ETF,如GX中國潔能(2809),其目標為追蹤SOLACTIVE中國清潔能源指數NTR之表現。

當中佔最多為"半導體產品與設備"股份,約組合4成,其次是逾2成的"獨立電力及可再生電力"。

此股平貴不易分析,而且頭10大股份中,除了信義光能(0968)外,其餘都在內地上市。

潛力度是有的,但會比較波動,如投資宜慢慢分注,可長線。

Q23966:

龔成師父,想請教你對2255海洋公園前景點睇?

都有3至4年前買入2255,但已經忙記了幾錢買入,之前一直價位很低,有諗過放,但最後都未放,到近排,見巨價位忽然高了很多,很奇怪,

所以想問吓龔成師父意見,你覺得幾錢要放左巨?

謝謝你

龔成老師︰

海昌海洋公園(2255)是中國一家主題公園及配套商用物業開發及運營商。目前已在上海、三亞、大連、天津、青島、成都、武漢、重慶及煙台分別經營著10個項目,

包括7座海洋主題公園、一座冒險主題遊樂園、一座沉浸式海洋文娛綜合體及一座水世界;在鄭州有一個在建的海洋主題公園項目。

就算唔計近年疫情因素,佢過去幾年營業額係維持上升,但盈利郤好波動。再加上佢負債唔輕,在疫情期間負債水平再進一步上升,負債狀況不理想。

初步睇佢唔係完全無投資價值,但質素只是一般,而且負債都高,就算持有都係小注好了。

佢剛宣布出售的4個主題公園包括由青島公司、天津公司、成都公司及武漢公司營運的分別位於青島、天津、成都及武漢的青島海昌極地海洋公園、天津海昌極地海洋公園、成都海昌極地海洋公園及武漢海昌極地海洋公園,代價為60.5億元,及動物租賃選擇權的代價3,000萬元。

目的是用以償還債務,減低負債壓力。

此舉的確令其負債水平減低,但由於失去營運權,故為未來長線營利能力,帶來一定負面影響。

其實,佢本身盈利能力已經不高,再拆出當中營運資產去償債,令長線投資價值進一步下跌,建議沽出較好。

Q23967:

阿sir, 想問2845同3162邊度Etf,如果兩隻同時長線慢慢儲貨?會唔會重疊左呢?龔sir?

龔成老師︰

有機會,但以10大持股計,唔算好多,只有寧德時代一隻。

不過,2者ETF都主要係追蹤新能和智能車,其實行業有一定相關性。

我地係配置投資組合時,個別企業和行業,不要佔組合15%和30%以上,銀行業更加不要高於組合20%,否則會有過度集中性風險。

所以,你2隻ETF可以同時儲貨,但佔組合心重,最好控制住係3成以內,咁會較好。

Q23968:

老師你好!我想請你指點下我想賣咗自住樓套現番650萬嚟以股息租樓可以嗎?

主要係因為自住樓質素無咁好,想賣出後換質素好些嘅樓,

但是買1000萬樓附帶支出不計樓價都要最少100萬,請問是否行得通?有無好穩陣嘅以股息租樓嘅股票可以買?謝謝你的指點迷津!

龔成老師︰

其實你賣走現有自住物業,再投資收息股去支援租屋收支。這個方法,都可以。

不過,你要明白你無左自住樓,就要長線承受租金波動的風險。若租金升幅大於股息,你就有機會要自行補貼。

而且,自住物業若係有質素,佢都會有升值能力。而收息股,增長力就會較弱,主要係提供穏定現金流。

所以,除非現時自住物業升值潛力好低,或者非常不配合你未來10-20年生活所需,你就可以實行此計劃。否則,你要再3衡量清楚,當中的利弊。

至於收息股,你可以參考以下資料,佢地都有質素。只要你平衡地分配(個別企業和行業,不要高於組合15%和30%),咁就可以。

目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)。收息基金(3110),都可以。

另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、互太紡織(1382)、富豪產業(1881)等(記住,股價略波動,不能太過大注)。

Q23969:

本人35歲,有2個小朋友。本人及太太月薪加埋3.5萬。儲蓄保險30萬。戶口現金有7萬,每月儲5000元,冇揸股票,之前短線投資。

澳門龕位投資20萬。可以怎樣做?計划增值財富到200萬,可以怎樣做?

龔成老師︰

你現時35歲,可以投資一些有增長力的優質股,去進行財富增值。

但記住,我地投資增值,就係透過買入一些優質企業,待其自然成長,以達至財富增值的目的。因此,投資一定係長線,唔好再做短炒,咁係好危險。

"保險"主要係用來防守,買足夠保障就可以。儲蓄成份架保險,唔係唔可以買。如果你個人風險承受能力好低,或者完全無投資能力,這類保險都有持有價值。

但始終係財富增值角度,佢幫助好有限,一般我都就唔建議太多(現有可保留,但唔好再加大儲蓄保險投入)。做財富增值,應集中投資在優質資產(如優質股、物業等),效果才會理想。

至於澳門龕位,我就無研究,你可以睇翻佢長線有無升值潛力(主要係供求和位置因素影響),去決定是否持有。

策略上,你可以投資「平穏增長股」和「潛力股」。你每月5成儲蓄,即是用$2500做月供。其餘先儲起,用一邊月供一邊儲蓄的策略。

如果你現時無太多投資經驗和知識,潛力股這類風險較高的股票,你就不要持有過多,最多維持2-3成好了,甚至先集中係平穏增長股類。

若你有一定投資知識﹐潛力股比重可以相應調高,佔組合約3-5成,視乎你投資知識多寡和了解這些股票程度而定。

大市現處於合理水平,那7萬資金,可以現價先入2手盈富(2800)。餘下資金和每月儲蓄,就等你有更多投資知識,或者大跌市機會出現時,才大力度掃貨,並長線投資。

我假設投資回報有10%(連股息再投資),你每月投資$5000 + 7萬現金,15年後就會大約增值至200萬。你可以以此作參考,去調整你的財務計劃。

Q23970:

老師,你好。請問你對Lucid股價有咩睇法?謝謝

龔成老師︰

Lucid Group Inc (LCID)從事生產電動汽車 (EV) 。該公司Lucid Air汽車是轎車。該轎車特徵是外部佔地面積中等大小。該公司為每種類型的汽車配備了電動汽車技術。

我無詳細研究過這間企業,初步睇業務有佢吸引地方,但始終上市不久,而且都未開始有盈利。

雖然佢已有不少車款準備出台,但始終長線市場反映會係點,我地而一刻唔會知道。

所以,只能說此股有投資價值。同時間,佢有一定不確定性,加上股價都幾波動。若你要投資,小注好了。