港交所(0388)行政總裁李小加昨天宣佈，將於下年底約滿後離職，原來李小加已當上CEO十年，真係老土都要講句，時光飛逝。

要衡量公司掌舵人的表現，股價當然係一個指標，誠哥早兩年退休，都有計畀你睇，佢嘅長江為股東賺咗1500倍呀。李小加於2010年1月16日上任，當時港交所股價係146.7元，而昨天收市價係246.4元，共升了99.7元，青冰用彭博資訊機計過，假設這些年來的股息只袋不增持，其實總回報會有102%，按年是7%回報，都相當唔錯喇。

用股價去衡量表現，有時都未必啱嘅，蘋果教主SteveJobs為公司建立豐功偉績，但蘋果股價在教主離世時只有五十幾蚊(2014年時曾一拆七)，真正升到癲嘅是最近四、五年，但大家都難以否認，教主為公司奠下良好根基，加上繼任人TimCook守業成功，才有此成績。好喇，咁李小加這十年最主要的功績，肯定就是互聯互通的建構，及同股不同權的引入，至於收購倫敦金屬交易所，當年就係大收購，現在回望，得益似乎唔多。

李小加個位其實相當難做，雖然近年有咁多建樹，但礙於交易所係國之重器，究竟那些建樹只係執行國家既定策略，還是憑小加之聰明才智，作為局外人吃花生者，只能亂估，反正這些事都難以佐證嘛。青冰見到有評論指，小加係因為去年收購倫敦交易所失敗而要下台，咁估係合理嘅，但又要回想返，去年港交所突然公佈此消息，市場及傳媒都認為這是政治任務，某程度上是明知不可為而為之，青冰去年也寫過，倫交所、Refinitiv及黑石的瓜葛關係，並不簡單，失敗是全世界的意料中事，你再去維基睇吓小加的履歷，在美林時幫中海油(0883)及中移動(0941)上市，在摩通時幫中海油搞海外收購及招行上市，這樣做慣國際級大刁的人，係咪會低能到在最後一刻衝出來阻倫交所併購Refinitiv，戰友可自行分析。當然，青冰的亂估也是難以佐證，但只要留意小加下一個崗位是否再升格，便可引證國家對他的評價。

有口痕戰友話，佢應該做特首啦，做財爺實在浪費，但青冰認為，專心去踢衛生波係一條更好的出路，不過青冰更關心嘅係，佢仲有50萬股港交所，幾時會沽清呢？

--

Fb個人專頁http://www.fb.com/chingbing888