唔知戰友有冇留意，近日配股的活動開始增加，就以青冰平時留意的股份當中，已經有三隻，今星期分別有中金(3908)抽水25億港元，寶龍(1238)在創新高後批股集資7.8億元，仲有綠地減持雅生活(3319)套現10億元，未計其他青冰冇睇的，三隻股在一星期內已經吸咗四十幾億，在市況當旺時，這個數字自然係濕濕碎，但在這個市況已屬難得，不過有返這些配股，叫做有返生氣囉，起碼不再是陰乾式下跌。

新股市場異常活躍，連同今天上市的4隻，十月已經有13隻新股上市，集資額都有百幾億，唔好忘記9月底上市的百威(1876)，一隻都抽咗五百億，而嚟緊仲陸續有來，包括有好多明星股東撐場的中手游，及目標集資過百億的內地奶粉商中國飛鶴，加加埋埋，新股呢邊都抽走800億。

配股及連串的新股，正常來說應會為大市添壓，但以恆指計，再次逼近27000點，唔算太差喎，如果戰友有玩開一些熱炒股，如美團(3690)、李寧(2331)、安踏(2020)、平安好醫生(1833)、雅生活(3319)、海底撈(6862)及頤海(1579)等等，亦都係升到你唔信。

不過或許戰友都會同意，現時市況唔算旺，旺的股都只係集中在少數股份，而那些傳統藍籌，愈來愈被邊緣化，就以每天的50大成交股份當中，上文的熱炒股經常上榜，成份股中的地產股、內銀及內險，明顯受冷落，國企股中，係一些細隻嘅有私有化憧憬，先至有啲人氣。

講完一大輪，只能夠用半杯水理論去作總結，究竟是半滿還是半空，好視乎戰友係玩咩股，跟到市場步伐的，這個零月真係好好炒，死抱傳統股及收息股的，似乎處於挨打，這也算是港股的新常態，而這個情況早在兩年前騰訊(0700)帶起的科網股開始，科網熱傳統冷，大牛市雞犬皆升的場面，相信亦難復再。

Fb個人專頁 http://www.fb.com/chingbing888