Q24081：

你好，想問下如果我持有tsla同nvda, 想揀多隻月供，你會prefer voo定qqq?

龔成老師︰

Tesla不差，增長快，股價向上好勁。不過穩健度不足，股價上落好大。

市場方面，有危有機，因為電動車是高增長市場，但行業結構變化大，存有未知數。

另外，股價上落太大，市場超前反映前景因素，只要增長力比預期差少少，都會有明顯回落。

現價計PE去到300倍以上，係好貴。如果你長線睇好，預佢股價上落一定好大，唔好理中短期股價。你月供都可以，但現價水平計﹐暫時唔好供太大比重，始終現價唔平。

英偉達公司Nvidia Corp (NVDA)有質素，佢是一家人工智能計算公司，其業務部門包括GeForce圖形處理單元（GPU）、GeForce NOW遊戲流媒體服務和相關基礎設施，和其相關的處理方案。

其業務可應用層面，都相當廣泛，初步睇係有佢投資價值。你用月供儲貨，係可以。

至於餘下一隻，我會建議你用Vanguard標普500指數ETF〈VOO〉，佢是追蹤標普500指數的ETF。相對QQQ，佢波動性無咁大，可以令你組合更平衡。

以上的股票，都係增長型，若你係年青至中年人士，這是適合的。但若你比較年長，這類股票風險就會太高，未必太合適。

Q24082：

老師，我想請教一下，我看了你有持股的1830 完美醫療，我發覺公司的而且確有自身的優勢，現金流非常強勁，公司沒有負債，還有很好的EPS增長。

但係我發現這間公司於2020年至2021年期間，大量投資股票市場，用了大約三億元。這一間醫療服務的公司，有這麼多金融新投資想請教下你是否覺得有點不妥?

而且我查過他股票的買入價格都不是便宜的價格, 如700 平均買入價大約$648。

龔成老師︰

完美醫療(1830)睇翻佢2021年年度，買入一些新經濟類股票。

先不論價格問題，這些收購的股份，跟本身業務並無直接關聯，所以係有少少不理想。

但整體投資佔總資產2成左右，又唔算話好多。而且，佢本身業務上，都係有潛力和質素，所以只會扣少少分，依然係值得投資。

佢長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，現價合理區頂位。

所以，如果無貨，先小注，然後等跌多d先正式分注投資。

如果本身有貨，就長線持有，但這刻就不要心急加注。

Q24083：

龔成老師你好, 本人今年43歲, 因機緣巧合關係睇到你FB 專頁並開始追隨你所寫的post, 這兩個月可以話獲益良多。不幸地本人已工作26年,

因為太鐘意買衫、扮靚可以話月月清袋, 向銀行貸款近48萬，至2024年5月才可以還清, 每月並無任何儲蓄, 本人月入$38,100,

每月支出如下：供樓+聯名儲蓄$14,000, 父母生活費$5,000, 銀行貸款還債$9,000, 雜項支出$1,000, 餘下$9,100 作為生活費及車費, 有時剩下2-3000 又忍唔住去買衫,

我現在十分後悔, 我希望可以重新出發規劃我既理財方向，請龔成老師指點及教導。

龔成老師︰

43歲唔算話太遲，只要你認真去改變，我相信你退休前，一對有能力累積到一筆理想的資金。

你現時有2件事，係要先處理。

首先，改變你開銷習慣。如果你經常忍唔住去買野，你就唔好比自己用信用咭(剪晒佢)。每月一出糧，就先扣起一筆用來儲的錢，餘下就用比生活開支，再有餘下先好考慮買衫。

你一定要找個方法，迫自己由月月清，變成每月有一定儲蓄，去做投資增值。否則，你現時狀況係唔會有改變。

第二，你要睇翻你現時銀行貸款利率，高唔高。如果高(如咭數)，你就要先清還左這部份，先開始投資計劃。

當你每月有儲蓄後，你就可以用月供股票，去累積財富。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你43歲，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於2成)。最好是你先提高投資知識，等到你有一定知識和經驗，才慢慢增加潛力股比例(大約3-4成)。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

除了透過以上月供方法，去累積資產外。同時間，你要去努力增進投資知識，來提升你財富增值效果。你要多讀投資相關書本、年報，新聞和報讀相關課程。

書本上，你可以睇我寫架《80後千萬富翁》、《財務自由行》和《股票勝經》，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

Q24084：

老師 想問雅生活3319

佢係中高端物業管理服務供應商 在管面積由2019 既1.8億上升到3.7億 主要來源係收購左中民物業 令到在管面積大幅上升 而非住宅在管面積佔59.6%（2019年41.1%）

主要係因為收購左中民物業 令到在管公共建築面積上升 毛利率下降應該係因為公共建築佔比上升而拉低左？應該唔洗太擔心？

另外 佢係業主增值服務方面 增加園藝 維修 家政等服務 引入幼托 城市服務方面 又得到唔同既業務許可 商寫辦公室獲得多個項目 應該可以為佢帶黎增長力

過往PE 13-26 (3年數據）保守d 合理PE range 15-20 EPS 1.5 估值 22.5 - 30 合理嗎？

龔成老師︰

雅生活(3319)有質素，但因為收購的非住宅項目，賺錢能力無以往住宅類咁高，所以毛利率跌係正常。

集團在住宅物管業務以外，增長都理想。近年中央打壓樓市，住宅類預期增長會明顯放緩。非住宅類項目，會成為未來物管主要增長動力。

而集團相較大部份同業，都較早在這方面部署，故長線發展正面。

早前雅居樂（3383）宣布擬發逾24億元債券，可換雅生活（3319）6.2%股權，假設債券交換權獲全面行使，雅居樂持有雅生活權益將由54.3%降至48.1%。

對3319企業價值會有少少影響，由於母公司持股可能因此而減少，因此，3319在日後發展上，可能受母公司支持少左。但由於3319過往數年已積極發展母公司以外的業務，因此，影響又不算核心性。

相信物管類企業，中短期仍受母公司及內房等不利因素影響，但長遠價值仍在。3319短期會弱，但慢慢會好轉，前景仍是正面的。

你估值大致上可以，現價算係合理區中下部，無貨已可以首注。

Q24085：

老師你好，本人有買你嘅書，認同長線投資企業嘅回報！多謝你無私分享心得！現在本人36歲 已婚 育有一子， 月入大約六萬 每月可儲蓄兩萬 現在現金大約 有20萬，股票如下:

3988 10手 買入價2.71

00012 2手買入價34.56

00016 1手買入價118.4

00003 3手買入價12.3

2800 3手買入價25.24

請問我股票組合有咩要改變？

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你36歲，應以增值為主，建議你用「平穏增長股」 + 「潛力股」作組合，去創造一個增值平台。

你現有持股都有質素，但存在2個問題。第一，工行(3988)只係收息股，增長力不高，不適合你年紀。

第二，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。(盈富由於係一籃子組合，故不受此限。)

你現時好集中係地產類(0012, 0016)，若你不想減持。可以利用新資金，去慢慢將比重拉回平衡。

未來投資策略，建議你用每月5成儲蓄，即$10000做月供。其餘先儲起，用一邊月供一邊儲蓄的策略。

你可以投資「平穏增長股」 + 「潛力股」。

潛力股例如︰安碩恒生科技(3067)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。

由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。

至於餘下的20萬現金和每月儲蓄，我地就就等機會，當大市出現一定程度的下跌，就可以慢慢加大力度入貨，然後長線投資。

Q24086：

龔Sir 請教一下債券的選擇初學和入門 可考慮或參考邊幾隻 通常除咗留意企業違約風險 還可以點分析買入或不買入呢？ 謝謝

龔成老師︰

債券，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利(你可以睇睇《財務自由行》一書，我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

而且，當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

以你32歲年紀，應先集中在一些有增長力的優質資產，而非債券這類收息工具。

若你真係好想投資，要集中係一些A級債券，相對地風險較細。但由於佢地只係有利息，故增長力不如優質股，你持有太多，會對你財富增值計劃造成負面影響。

Q24087：

多謝你龔sir! 你嘅建議好有用我會好好考慮。

如沒有理解錯誤，那是否中芯可繼續持有？還是換碼較好？今天出業績後股價又跌了，有排都回不了$29.7

龔成老師︰

中芯國際（0981）你可以照持有，佢業務有增長力，和有質素，但未算最高質素。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

但佢算得上有長線投資價值，但要注意風險。這股唔建議大注。

Q24088：

另外想問下出左施政報告既房屋政策後 你係置業4步曲入面比較睇好既區份有冇改變呢？現時黎講 你最睇邊區將來有較好升幅呢？

龔成老師︰

我自己暫時無因為施政報告，對睇好的區份，作出特別調整。

主要都係鄰近商區地段，好似中環、東九、北大嶼(或有變數)。你都可以留意一些潛力較高地區，好似堅尼地城、大圍、黃竹坑等。

我估你都想問，「新界北部都會區」的睇法。

政府目標想將新界北發展成一個新的都會區，包括天水圍、元朗、粉嶺、上水，以至新發展區(古洞北、粉嶺北、洪水橋 厦村等)，希望加強港深兩地互動，形成「雙城三圈」。

不過，這個是長線願景，當中存有好多變數。最終發展成點、能否如預期，創造65萬個職去吸引置業者進註、何時長發展完成，都係一個問號。

所以，暫時不宜因新政策，而將該區睇得過份正面。

Q24089：

感謝你詳盡解答，有啲感動 你會咁長回覆。

因為我生意由計劃到依家做緊都已經三年，我係做緊網購高級食材嘅生意，如日本和牛、同美國澳洲牛扒、日本燒肉等等，其實我一直計劃係長線同品牌方向去慢慢建立公司，

前兩年生意都唔錯，更有試過連續5個月營業額100%增長…但之後好穩定，無再特別增長，但到今年3月開始生意下跌得好勁，依家大約下跌70％~80%左右，

未到交唔到租同出糧俾pt，但自己已經出唔到糧…同就快食曬自己啲現金…所以都幾迷茫，但知道自己公司係有前景，已經有做返啲相對增加現金流嘅方法，

例如搞清倉優惠、會員課金買我嘅優惠計劃等等…

不過身邊有係無人可以俾到意見我，所以真係好多謝你…十萬個thanks。我遲下有返啲錢就會報名

想問下

係最後講生意個到，你提到做生意比投資優質股高好多？

因為我見好多都係靠投資股票起家先再做生意，所以都有諗，啲人講炒股票好賺，其實同做生意回報分別大唔大，因為我會將自己生意發展性定為無限大(不論係營業額定其他可能性)，

所以好難知道自己可以賺到幾多，相反我將賺返嚟現金再買有長遠發展空間嘅股票，咁嘅做法有無特別壞處？

龔成老師︰

其實有人係靠打工、投資等方法，去賺取第一桶金，再去做生意。倒轉做，先做好一盤生意，再用其現金流去投資，都有，2種方法都無問題。

但你要明白，我地做投資，其實同做生意都好似。我地將資金，投資在一些有潛力企業，等佢慢慢成長，以達至財富增值的目的，係要時間。

絕對唔會係短炒，唔好比坊間這種炒股致富的概念影響左。因為中短期波動，係可以因為好多因素，有些因素跟企業本質可以完全無關，所以係無得估。

只有長線，企業價值才會正確地反映在股價上。因此，投資係長線，唔係短炒。

正如你所講，生意的確較難知道自己可以賺到幾多，但做得好的時候，真係可以好高增長。你都試過業務快速增長的時候。

但優質股好多時拉平均，都係每年10-15%增幅，所以我才會話生意增長潛力係較大，不過當然風險都高。

如果你想穏陣d，你係可以將部份生意所得，投資優質股。這樣也可以令你財富組合更平衡，令風險更有效地分散。

至於你生意部份，你一定要找出生意下滑原因。是你本身業務策略錯左，定係大環境出左問題(例如你做開餐廳客，但好多餐廳倒閉左)。

嘗試找出導致生意下滑的核心問題，去加以解決。因為你這個現狀，已維持半年多，唔係短時間的事，應該係有些問題出左。

速銷和折扣，係可以增加短期的現金流，但核心問題都係要解決，否則會令你業務處於不利狀態，要留意。

Q24090：

龔 sir, 想問一下保費融資有咩風險？

龔成老師︰

保單融資，其實就係透過借貸，去以槓桿形式放大回報。相比傳統儲蓄保險，佢增長潛力會相對較大，同時風險會相對較高。

若保單實際回報，係多於貸款利息，投保人自然會因為槓桿操作，而令回報放大左。

但由於保單本身，好多時回報和利率都係不保證。再加上貸款利息，多為浮息。在低息環境，固然會受惠。但進入加息週期，利潤將進一步被蠶食。

因此，用保單融資去投保，係有一定風險。

其實係財富增值上，最好集中係優質資產上(如物業、優質股)。

"保險"只係一種產品，主要係用作防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但最好係一些較傳統儲蓄保單，而非這類有槓桿性質的產品。