華富財經 Quamnet.com Logo
青冰
2019-02-15 00:59:00
OLED概念股睇真啲

股市由年初完全冇人睇好,變為現時開始有人相信牛市已開始,歷時只有個半月,雖然市旺令人欣喜,但近日都發展到亂炒一通,令青冰甚有戒心,舉個例,今星期有傳Samsung會推出首款摺mon的手機,跟住內地就開始爆炒OLED概念股,京東方、深天馬及維信諾等股連續幾日漲停,反應快的投資者,即刻會聯想到港股有隻京東方精電(0710),及一隻手持維信諾股權的冷門股億都(0259),青冰之所以話亂炒,因為兩者跟OLED的關係不大囉。

京東方在2016年收購精電,起初市場(包括青冰)會認為京東方會將精電打做成海外上市旗艦,日後會逐步注資,但這沒有發生,買殼後股價由6蚊迅速腰斬,係2017年的牛市爆炒幾日上過7.50,之後一直跌到上月低位1.92元。業務亦是乏善足陳,近兩年只係賺兩千零萬,主要做較低檔的TFT面板,汽車的單色顯示屏,聽見都唔開胃啦,同OLED的關係就是,業績話未來或會同京東方開拓歐洲及中國車載OLED市場,咁手機摺mon又關佢咩事呢。

冷門股億都在兩年前都品題過,賣點就是手持OLED公司維信諾的股權,作為聯營公司,每年都貢獻一千幾百萬的收益,不過查實佢哋在去年8月已出售股權,並將錄得2.5億元的特殊收益,所以億都也是跟OLED無關的。

不過睇真啲,雖無OLED但都有點投機價值喎,按通告,單刁將於1月31日前完成交收,現時雖未有通告確認完成,但買家係國企公司昆山國顯光電,應冇甩拖。億都股價從2017年高位5.01,跌至11月低位0.94,可謂非常慘烈,不過老細李國偉自公佈交易後便不斷增持,由1.5元買到落1蚊,5個月內增持了2%股權,約2100萬股。

大家都知港資背景的股,老細前景吹乜唔重要,身體就一定誠實,所以佢身體力行,值得尊重。星期三股價炒高,成交增至797萬股,昨天的權益披露睇到,原來老細又增持了230萬股,換言之是當天的29%成交,昨天成交增至1155萬股,唔知係咪老細又大手掃了。現時每股NAV係1.69元,如果收埋嗰2.5億,NAV將增至1.95元,難怪老細咁重手啦,不過公司由始至終都冇講明在交易後派特別息,一切只係炒憧憬,不過拍埋京東方精電嗰度,同樣冇OLED,億都點都靠譜啲啦。

Fb個人專頁 http://www.fb.com/chingbing888