Q23881：
你好，龔老師，本人二十歲，還是一名學生，家中經濟還好，從細到大自己都有儲錢習慣，現時有大約二十萬左右資金，現時也沒有做兼職。
自己也是因為上一個女朋友的分開，讓我體會到現實的殘酷以及無能為力的絕望。所以自己有一個很大的決心，希望增加財富，變得更優秀。
今年也去了英國讀書，因為時差問題，每次都只可以留意股市的後段。今年八月，初入股市，一直都係以低買高賣策略#700以及買正反ETF，亦有少量投資虛擬貨幣。
現時開始看一些投資書籍，發覺自己有的是時間，可以利用時間賺取最大利潤，自己亦很想用時間為自己帶來收入。亦知道價值投資的重要性，
但是自己對於價值投資完全沒有方向，仍然不懂得分析一間企業嘅價值，自己亦在Youtube上學習如何閱讀financial statement ，但是效果並不大，
未來自己亦會在大學讀Business and Finance之類的科目，希望對自己有幫助。希望老師可以就價值投資以及我的情況提供一些寶貴的意見，謝謝。
龔成老師︰
其實價值投資，就係找出一些有長線升值潛力的企業。再用一個合理，甚至平宜的價錢買入，並長線持有。讓其自然地慢慢升值，以達至財富增值目的。
所以，你其實唔需要好貼個即時情況。反而，你現時閱讀financial statement，去增加你分析股票長線投資價值的知識，會係更重要。
另外，你所講的時差，其實無影響，巴菲特從來不睇股價機，只分析企業，要成日「睇住個市」，只是散升思維，並不是有錢人思維。
另外，你除了學會計知識，去方便自己解讀企業年報外。你還要去多讀投資相關書本、新聞和相關課程。努力去累積相關知識，令你可以向正確方向發展。
書本上，你可以睇我寫架"80後百萬富翁"、"財務自由行"和"股票勝經"，都適合初學者。
同時間，你可以用現有儲蓄，你買入一些優質股，去累積財富和實戰經驗。
當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。
以你現時20歲去計，是財富增值的黃金時期。你可以投資「平穏增長股」和「潛力股」，作為增值平台。
你現時投資騰訊（0700）和一些正向ETF(要無槓桿)都係可以。
但反向ETF我就不太建議，因為我地投資唔係去估走勢，而係去找有長線成長力的企業，故反向ETF唔係咁適合。
特別係好似ＦＩ二南方恒指（7500）這類反向ETF，佢投資目標係反向追蹤恆生指數每日表現。如果恆指跌1%，你就會獲利2%(另扣管理費)。但若然恆指向上，你就會虧損。
我對這類產品有保留，恆指在過去數10年反覆向上，所以長遠計對投資者"不利"，一定多於"有利"。
但你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。
到你有一定投資知識﹐潛力股比重可以相應調高，佔組合約3-5成，視乎你當時投資知識多寡和了解這些股票程度而定。
現時大市只是合理區，你現有20萬資金可以先投入5-6萬，用"分注"形式，慢慢買貨。餘下資金，就等大市出現一定程度的下跌，才大力度掃貨，然後長線投資。
到你將來有工作，開始每月有穏定儲蓄，你就要開始月供股票。每月用5成儲蓄做月供。其餘先儲起，同樣係等大跌市時，才去動用。
虛擬貨幣，以本質來說，這是人為創造出來的，絕對不是「資產」，有沒有真正的價值，如何定義真正的價值，未知。
這些人為創造的貨幣，因為關注度由很少變得大，價格會大升，但這背後是否有真正的支持，我不知道。只能說，投資這些貨幣，投機味好重，可能大賺，亦可能蝕到一文不值，因為，當中有沒有價格，我不知道。
但這不代表佢無價值，佢可能好勁，只是我自己不知佢好勁定好差。
佢長遠的價值，取決於「有多少人用」，即是說，雖然無真實價值，但可以有「交易價值」，如果長遠好多人用，的確可能有高價值。
因此，這些虛擬貨幣，由於我無法作出專業分析，所以，我不會投資。
但如果你分析到佢長遠的交易大，大家都持續關注，就有價值，就值得你投資。
我並沒有支持或反對投資虛擬貨幣，只能說，虛擬貨幣風險高，因此不建議大額投資。或者你可以用以下的心態投資，首先，你預期可能會大跌，心態上只用「閒錢」投資，就算不幸大跌對你都無影響，但你的要求回報一定是倍計，博虛擬貨幣有多倍計的升幅，絕不要升少少就賣。
另外，中央近期對加密貨幣都加強打壓，禁止相關交易活動。香港會否跟隨，還是未知之數，故你要明白會有這方面的風險。
Q23882：
龔sir 請問點睇1477 歐康維視生物？
龔成老師︰
歐康維視生物（1477）係中國眼科醫藥平台公司，從事開發及商業化眼科療法。
佢有幾隻眼科候選藥物，例如ＯＴ－４０１（ＹＵＴＩＱ），這是佢的核心產品，其為玻璃體內植入劑，用於治療慢性ＮＩＵ－ＰＳ（累及眼後段的慢性非感染性葡萄膜炎，葡萄膜炎是造成失明的主要原因之一）。已在中國啟動橋接ＩＩＩ期試驗。
坦白講，這類股有危有機，好難分析，因為要推算佢的藥，是否成功，以及能為佢帶來多少經濟效益。
只可以話，投資不是不可，但不能大注，買入後要長線，等佢收成。
Q23883：
阿sir，想請教下完美醫療(1830)現價$5.69合理位嗎？之前升了上去$10.5，之後回落徘徊在$6左右，它的質素有沒有改變？謝謝
龔成老師：
完美醫療（1830）長遠有發展，本身有一定的質素。
質素無變，只是之前貴，加上監管，因此跌左，$6是合理區頂位。
睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。
加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。
這股有長線投資價值。
之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。
所以，如果無貨，先小注，然後等跌多d先正式分注投資。
如果本身有貨，就長線持有，但這刻就不要心急加注。
Q23884：
老師你好，眼見現在股票市場風氣不如以前好 不停被消息及政策操控 前境亦不明確 ..
我持有6手阿里@$233，作為你嘅股票班學生 我深明「短期價格上落 長遠不影響企業價值」..
但睇住佢$190-》$170 低過招股價-〉到今時今日$130。我真系有啲忐忐忑忑，好想問吓我是否應該繼續SH .
周邊好多負面嘅聲音，亦都有炒股嘅家人笑我不理智，慢慢令我有點動搖。好想得到丫Sir你嘅意見
今次都係一個好好學習嘅機會，以前上堂講得多成日話心理質素要好 唔好成日睇唔好成日理
經歷咗呢兩年上上落落以為自己OK，原來到自己睇住股票資產蒸發嘅時候，都真係會有離場嘅念頭。
理性0分的不才學生上
仲有2手 恒生 @181，係好耐以前買落嘅。我想問 我繼續持有 定放左佢呢?
龔成老師︰
首先，我地持有一隻股票與否，一定係睇質素。以往我手上比亞迪(1211)，曾經跌左超過9成（由$88跌到$12），但我1手都無沽過。因為我相信佢有質素，長遠點都會上翻去一個更高位置。
如果你著眼點係長線，係抱著儲資產心態，其實唔洗太在意中短期波動。
中短期股價可以因為好多因素影響，有些因素甚至跟企業無關，所以無得計。只有長線持有，企業價值才會有效反映在股價上。
好多人會話，跌就沽左先，等平D再買翻就得。但其實這個做法好危險，因為無人會知你沽左，佢之後會唔會再跌。如果佢係不停升，你就要用更高成本，去再入翻貨，變左得不償失。
所以，你見佢係咁跌，感覺依然持貨好似好笨。但其實好多野，我地係無能力估算到。長線持有一直下跌中的優質股，中短期成績未必好睇。但長線計，一定係最理想和理智的做法。
正如你所講，這個是一個好好提升心理素質的機會。
因為就算你計好晒數，係用一個平宜價入貨，都係有機會再大跌。但只要你抱住儲優質資產的想法，你反而會開心，因為出現左一個平價買優質股的機會。
當然，唔係平就不停入貨，都要考慮組合平衡性。以你為例，如果6手阿里(9988)已經佔你組合一定比重，就算再平都唔好加注了。
阿里(9988)近期受大市氣氛和政策風險所影響，令到股價有較大回調。雖然估值上都有少少調整，但核心質素無大變﹐依然有長線投資價值。
恒生(0011)都係有質素，但主要係收息，加少少增長力。以尚年輕，這類股票不宜持有太多。故現貨可持有，但唔好加注了。
Q23885：
老師，你講過有錢人利用銀行去將窮人財富分配到手，換句說話講，係咪銀行同有錢人夾埋去呃啲窮人？
龔成老師：
應該話這是財富系統的其中一部分，而有錢人懂得利用系統，而窮人則被這個規則，令「富者愈富，窮者窮者」。
其實除左銀行外，發行現金都是系統的一部分，當現金不斷貶值，人工自然貶值，但增有資產的有錢人財富就會升值。
Q23886：
老師，我是一名退休的長者，一路上都是你的忠實fans，實在有太多問題想請教老師。本人現時手頭上擁有以下之股票，大部份都在虧損中，
9988、6088、762、6123、232、265、683、966、8620、778、1810、286、1024、1789、270、6993、1448、2160、1643
現手頭上還有100萬，可以怎樣運用才能為自己帶來自動收入，有朋友說買入美債券可以每月收息又是否可行，由於已沒工作，所以希望既保本又可以每月帶來少少收入，
請老師指點迷津。
龔成老師︰
由於你已經退休，投資應以創造現金流，去支援退休生活為主。故選股上，應集中在收息股類別。
持股當中，中國航空工業國際(0232)、亞洲速運(8620)質素不佳，建議優先沽出。
餘下股票，都係有質素。但除了中聯通(0762)、置富(0778)、粵海(0270)係適合你之外，其餘股票風險都較高，不適合你年紀。你要分段慢慢沽出(唔係一次過，係分開幾次去做)，將佢地轉換成收息股。
以下是一些有質素收息股，你可以參考下。
收息股，你可以考慮港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息
另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、富豪產業（1881）、互太紡織（1382）等（記住，股價略波動，不能太過大注）。
（你可睇下《50穩健收息股》當中仲有好多）。
其實退休人士，除了收息股外，應再加入不同收息資產，去令組合更平衡。
你餘下$100萬，分成4部分。
第一部分，投資債券，你可以選擇A評級的債券(例如美國國庫債券)，年期較長都可以，但利息卻不高。你可以到銀行問問。
第二，投資年金，你可以睇睇，這是適合你們的產品，零風險，可以有穩定回報。
第三，你亦可投資銀行低風險類的產品，你可自行到銀行了解下，總之是「低風險，持續現金流」的。
第四，持有現金，以備不時之需。同時，若投資市場大跌，你也可以考慮買到更多的收息股，因股息率會進一步上升。
你可以將$100萬資金，平衡地分配在上述的項目上，再加上收息股組合。對你來說是最好平衡風險，同時有穩定的現金流。
Q23887：
老師，我想問如果我有30萬後 我想拿10萬黎投資 另外戈20萬未諗到點分配 但目前我有幾隻股揸手 可吾可以比d意見我
港股有823、9988 (目前想考慮入880/27/）
美股有FB, Wynn (目前想考慮入QQQ & VOO)
但我睇我目前都係以科技股同賭場股多 會吾會分類去投資下吾同既領域好d? 定你覺得呢d都係潛力股 長揸都無問題 最後 我戈10萬點分配會比較合適？
另外戈20萬我想做基金/月供 但新手做基金風險會太高？
龔成老師︰
其實係投資配置時，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。(盈富由於係一籃子組合，故不受此限。)
在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。
你現時持有股票，都係有質素，可長線持有。
澳博(0880)和銀娛(0027)現價都合理，你無貨可以首注。質素上，銀娛(0027)會較為高。
但由於續賭牌問題，令佢地有一定確定性，故暫時不宜太大注。
至於QQQ和VOO係一籃子股票的組合，QQQ個風險會較高，算係潛力股。而VOO，則是平穏增長型。2者都在合理區頂，至少少貴水平。無貨都可以首注，有長線投資價值。
由於佢地係組合，而非個別股票，所以持有多少少，都無問題。
而基金，其實你要睇翻佢長線回報，係唔係可以最少跑嬴大市。因為基金一般費用率都高，長線會蠶食你不少回報。所以唔係表現明顯優於大市，未必值得投資。
現時你可以用這10萬，去買入目標股票。餘下20萬，就等大市有明顯回調，才慢慢大加注碼。
Q23888：
成哥，最近聽到我同事炒274 如果佢係幾萬咁炒就算啦。但原來佢係成副身家咁炒。
我初步睇過 274 無盈利 市值低 流通量低 連佢做咩都唔係好清楚。
我認為似老千股，但係佢就話，佢大佬識人，係公司董事，好有信心會到一蚊 ，我叫極佢都唔聽，有啲擔心，想請教下成哥
- 可以點做先令佢醒
- 274係咪真係似有問題 謝謝，祝工作順利 身體健康
龔成老師︰
你分析得無錯，這股有問題的機會係唔細。
中富資源(0274)本身規模好細，而且多年都係處於虧損狀態。
這去不只一次做合股動作，2020年財務數據，核數師更表明"不表示意見"，可見這隻是財技股機會唔細。
我建議盡快沽出此股，會較好。
其實你現時同佢講投資，講基本分析重要性，佢都唔會聽入耳。你唯一可以做，係比D以往類似騙案架新聞佢睇，希望佢可以從中理解到一些問題。
另外，你要提醒佢，唔好一味只係諗自己會點賺。你諗下萬一係蝕，會有乜野損失，會有什麼樣的後果(可能多年儲的錢，會無晒，甚至債台高築)，等佢自己去思考。
Q23889：
老師，想問問你意見，270 粵海， 這股質數無改變過對嗎？我平均$11.7 買入，佔13 % ，而家想加多小注，增強我整體平穩增值股既比例，你覺得係時候嗎？
還是應該再等？如果加，咩位置加比較理想？
還是加注152 深圳國際？我平均$12.08，佔13.5 %
龔成老師︰
粵海投資（0270）長線依然正面的，暫時唔見佢質素有明顯轉差，你有貨的話，可以照持有。
現價算係合理區中下部，雖然價格係吸引，但佢已佔你一定比例(個股最好不要佔超過組合15%)。所以，你現價最多只能好小注。最好等佢真係有明顯跌幅，才再加注。
深圳國際(0152)都係同樣情況，佢本質無大變，但你持貨比重較高，最好等佢再有明顯調整，才再加注。
Q23890：
首先多謝老師的分享, 自從認識你，已看過你大部份的書，3年內由$0儲到而家資產6位數字
還不停推薦你給身邊人，家人也有資產增長，有心唔怕遲。
未來2年會進修degree，現月入加part time 2.8萬，目標5年100萬，現月供$5500(已供3年)，儲現金$6000，現金資產8萬，持34萬股票如下:
1211 45%
1177 7%
2388 6%
0003 8%
0027 8%
0823 12%
2800 14%
潛力股 52%
收息股2%
平穩增長 46%
現月供$5500如下:
0027 $1500
0823 $1000
1177 $2000
2388 $1000
Q1: 因為1211之前月供, 但之後升左好多已停供。現潛力股月供只有1177。以下組合可以嗎? 需要調整供多一隻潛力股嗎?
如果加潛力股[安碩恒生科技(3067)或舜宇光學（2382）]會否科技股佔太多?或需要其他調整令自己資產盡快有100萬?
補充：美股VOO 只有2手
龔成老師︰
多謝你的支持!
比亞迪(1211)近年升左唔少，已經係偏貴，暫時唔好月供住。
你現時月供和持股組合，大致上係無問題。但要留意銀娛(0027)由於續牌問題，現時不確定性較高，加上你已有一定持貨，建議你暫時唔好再供佢住。
這空出來的$1500，你可以用$1000去供多一隻平穏增長股。
至於中生(1177)係可以，但供款金額大點多(因為你有一定貨係手)。你可以減少少，例如變成$1500。
這樣你就可以利用這餘下$1000預算，去供多一隻潛力股。安碩恒生科技(3067)或舜宇光學（2382）都係合適選擇，而且你組合中並無科技股，所以無問題。