早前看過某些專頁有這個警世金句，邱吉爾說：「悲觀的人在每個機會中看到困難，樂觀的人在每個困難中看到機會」，用這個來形容上個月的環球股災，實在很貼切。

坦白說，作為經歷過雷曼事件的青冰，上月那個市場氣氛，其實仍然未及得上雷曼，不過以股份的下跌速度，及帶來的連鎖反應，應該比雷曼更強。在3月中旬的時候，股債金匯全部反艇，戰友在媒體中看到的大小專家，基本上都極為悲觀，那些著名的末日博士，當然侃侃而談啦，股樓債有排未見底，經濟要衰幾耐，之但係市場就很喜歡跟你開玩笑的，一致睇淡嘛，是挾淡又好見底又好，總之就從低位狂彈。

是否見底，永遠是事後才知道，但經過了一輪急彈後，青冰跟戰友討論時，不約而同發現，不論是美股或港股，這幾天指數的確係轉弱了，但心目中想趁回吐而撈的股份，完全冇畀機會，仲愈升愈多，當中唔少係早前靚撈後太快食糊，苦等機會再上車。

日日睇住個指數，係幾氣餒，不過如周三晚道指曾跌六百多點，但你睇那些龍頭科技股，跌六百點時仲係升的，港股亦一樣，恆指早兩日支陰燭的確肉酸，但醫療、物管及ATM，這幾天都屬強勢，跟市低開後都會掃返上去。點解咁兩極呢，須知道恆指及道指內，金融股的走勢都舉足輕重，近日美國銀行股首季業績都麻麻，自然弱勢，我們恒指又有隻匯豐(0005)，邊有力走得遠吖。

換一個角度講，現時市場已經逐漸回復正常，正常的意思未必是見底，只係話資金不再驚慌，不再亂咁掟貨，慢慢揀股來買，你硬要糾纏在指數見底未，青冰也答你唔到啊，市場亦從來唔會有個代言人，走出來話：喂見底喇，快啲入貨啦。

最後補充返，青冰上網fact check過了，邱吉爾係冇講過那兩句嘢架，不過以下呢句係堅而青冰又幾鍾意的「Now this is not the end. It is not even the beginning of the end. But it is, perhaps, the end of the beginning.」，用來提醒大家繼續防疫不鬆懈，非常啱用。

--  Fb個人專頁http://www.fb.com/chingbing888