馮氏家族決定將利豐(0494)私有化，每股作價1.25元，不過本周一雖然曾大漲一倍，但最高都只係1.05元，星期三仲低見0.89元，距私有化價竟有四成空間，近年私有化中，真係好少見到有咁大距離，究竟市場點解咁唔睇好呢？

按通告披露，要約人馮氏家族及一致行動人士，持有33.23%股份，換言之無利害關係股東有66.77%，根據一般私有化條件，只要有10%無利害關係股東投反對票，已經可以將私有化拉倒，而利豐的股權架構中，基金股東持股比例頗高，話晒都係昔日藍籌嘛，而當中揸最多的是Silchester，持有約一成股份，最後一次增持是去年5月，平均價係1.263元。心水清的戰友，應該可以看到兩件事，第一，無利害關係股東的10%，即係持有6.677%，已經可以否決私有化，而Silchester一個已經遠超此數，第二，不知是否馮生是否有心玩嘢，你最後入市價係1.263，私有化的價就定在1.25元。

Silchester首次申報買入利豐，是2017年7月，入貨價係2.8615元，之後兩年持續買入，但股價就一直尋底，公佈私有化消息前，股價係0.50元，中間輸幾多，青冰都費事計喇。既然馮生知Silchester否決便可收工，相信不會明知衰梗而照做，但Silchester真係輸好多喎，你出價比最後入市價還低，很難說服對方吧。按這幾天的交易披露，由於Silchester是主要股東之一，有買賣就必須申報，而在周三，他們減持了1346萬股，不過青冰就唔太明，他們為何持有14.13%，而不是權益披露中所見的10.08%。無論係14%還是10%，他們仍有完全的否決權，但減持的舉動，就似乎是想投降，亦間接地表示，他們亦不看好私有化會成功，所以才會放棄1.25元，而直接在市場沽售。

真正的絆腳石，可能就是利豐的註冊地，是百慕達啊，換言之私有化的條件中，係要數人頭，出席的股東要過半數贊成，才可通過，數人頭呢家嘢係好難搞，當年電盈都搞到要種票，利豐近年累散戶輸咁多錢，亦可投反對，一拍兩散吧，所以馮生的勝率似乎唔高。

好喇，究竟點解馮生明知有Silchester及數人頭兩大因素，仍然咁勇去私有化呢，或許是睇中現時市況極差，大小基金都冇水，股價由低位倍升，的確係一個幾好的離場價，如果大家攬炒，跌返落去馮生亦無損失，之後大家可留意Silchester是否繼續沽，佢沽得愈多，私有化的成功率會相應提高，最終亦會反映在股價上。