Q24281：
龔成先生, 請幫忙重組組合, 已退休, 想增加收息及有增長.
( #11 恆生 9%)
(#27銀娛6%)
(#388 港交所39%)
(#700 6%)
(#939 健行 3.3%)
(#981 中芯1.5%)
(#1810 小米1.8%)
(#2318 平保7.6%)
(#2822 ETF9.5%)
(#3033 ETF 1%)
(#3690 美團3.5%)
(#9988 BABA 6.2%)
港交所 及內銀是多年前買入的…另想加移動 及公路股作收息, 你意見如何? 咁多年, 組合好像都沒怎增長..希望你可幫幫…謝謝..
龔成老師︰
由於你已經退休，再無全職收入。我建議你將投資重點，放係收息(創造現金流)，而非增長上。
你現時組合股票，都係有質素。但除了恆生(0011)和建行(0939)係收息股，適合你之外。其餘都係增長股，部份波動性仲要係偏大。
建議你將其他股票，慢慢分段換成收息股，去創造被動收入，咁會較好。就算你唔想轉晒，都最好轉走大部份。
以下是一些有質素的收息股，你可以參考下。
目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。
如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，只能小注）。
(你可睇下我本《50穩健收息股》當中仲有好多)
Q24282：
龔SIR , 想問下1044 及 1313 , 中長線持有, 現價是否合理?
龔成老師︰
恆安國際（1044）主要業務為在中國生產，分銷及銷售個人衛生用品，零食產品及護膚產品。
恆安擁有多個品牌，如「心相印」、「安而康」、「品諾」、「安爾樂」等，而業務大致可分為紙巾產品、衛生巾產品、一次性紙尿褲產品、零食產品。
恆安具有品牌，本身不俗，故此企業都算是優質股。不過，市場競可能令毛利略為受壓，加上增長減慢，都是不利因素。
長遠來說，恆安不差，但增長力不強，故有投資價值的。成本上升，令佢略有風險，因此投資價值中等，現時大約在合理區中下位置。
華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。
佢之前公布的中期業績，業務有回落情況。長遠計，房屋、基建發展等因素，都會利好水泥股。
因此長遠是正面，現價合理，但就要留意股價上落會較大，自己要注碼上控制。
Q24283：
龔老師。有好朋友介紹我找你有關財富增值的意見。因為佢跟了你開始獲得成功。
年紀：37。無資產，沒有流動資金，人工22k, 家用10k, 雜費5k（買餸，搭車之類）, 學習費1.5k, 卡數3k（壞了物品要更換，醫療費用之類）, 欠債60k （輸在感情）。
現開始嘗試每月供$500 1810hk 和 $500 2800hk. 想2800 轉港燈或其他高增值，例如中生制藥。
- 請問組合上有否問題？或者應該供多些？
- 或者如何更快增值到，好似其他人般可以在港生存。 感恩老師。
龔成老師︰
- 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
你37歲，應以增值為主，建議你用「平穏增長股」 + 「潛力股」作組合，去創造一個增值平台。
你現時月供的股票，係適合你。港燈(2638)這類收息股，增長力不高，不適合你。
你現時月供金額，佔你收入好少，未來要努力加大供款比例，才會有更好效果。以下是一些適合你的股票，你可以參考下。當你資金較多時，可以加入部份。
現時大市只在合理水平，每月最好可以另外留起少少錢，當大市出現一定程度的下跌，就可以動用這筆現金去投資，去掃平貨，然後長線投資。
如果你想組合較高增長，可考慮3067，但要明白風險高左。
- 如何生存，這個定義每個人都不同，好難有個明確答案。你可以先用上述方法，做好增值，去增加自己生活本錢，令自己未來有更多話語權。
同時間，你要努力吸取更多知識。不論工作上、投資上都要，令自己係財富增值路上，能達至更佳效果。
投資方面，除了透過以上月供方法，去累積資產外。同時間，你要去努力增進投資知識，來提升你財富增值效果。你要多讀投資相關書本、年報，新聞和報讀相關課程。
書本上，你可以睇我寫架《80後千萬富翁》、《財務自由行》和《股票勝經》，都適合初學者。
另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。
Q24284：
龔SIR，你好，本人46歲，以前月薪約2萬，餘錢不多。去年得到一筆遣散費，再開始買股票，未來兩年因家事未能找長工，只可找每月4-5千元左右的兼職，
每月生活費還要在儲蓄每月補助。持貨如下，有以下問題請教：
1/ 想沽清2828和3032，轉為買入其他股票，但2828想沽時連續大半年價位不停下跌，應怎麼辦﹖
2/ 希望重整投資組合，有何意見﹖
3/ 應否沽ibond轉為收息股? 如恆生?
4/ 美股是否波動太大，初學者不宜沾手，應否沽蘋果? 有見過龔SIR建議 VOO 500，要轉為這隻嗎?
5/ 供緊一份儲蓄退休保險(已供了15年)，每月$2300(年繳形式)，55歲才可取回，到時會有約75萬。但無諗過會因家事而未必能找到長工，收入大減，變成有點負擔，
應該斷供，還是繼持當keep住有儲錢?
因為未來日子未必會再有新資金投資，希望在現有財產管理成比較理想的組合。謝謝你。
2828 1800股 / $108 (早期與家人合資，持貨約7-8年)
2800 3500股 / $25
0011 500股 / $143
9988 400股 / 200@$178、200@$138
2382 100股 / $229
3032 600股/ $7.3
0823 400股 / $67
1373 8000股/ $2.9
美股蘋果 30股/ $155
ibond 7手
人民幣10萬定期明年2月到期
另有現金約25萬
龔成老師︰
以你46歲年紀，都尚有一定增值需要。但由於你未來2年收入會大減，建議你先預留一筆資金，助你過渡這2年。餘下部份，才用作投資。
- 你唔好用買入價或帳面賺蝕，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。
但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。
恒生中國企業ETF（2828）和恆生科技(3032)都係有質素ETF，中市現時氣氛疲弱，佢跟大市下調係正常。但相信只係中短期，長線依然有投資價值。
-
你現時持有股票，問題不大，可長線。但隨著年齡增長，你要開始保守少少。好似2828,9988,2382,3032這類潛力股，佔的比重要慢慢下調。50歲後，潛力股建議只維持2成。
-
IBOND只係收息產品，唔係資產。建議你沽出，換至一些平穏增長股。
-
美股波動性係會高恆指少少，我地投資唔好太著眼中短期波動，應該係要睇隻股票，長線投資價值。
蘋果係有質素，我建議你持有。Vanguard標普500指數ETF〈VOO〉，是追蹤標普500指數的ETF，是一籃子優質股票。
由於佢唔係單一企業，故分散風險能力較高。若你對美股不太認識，你可以直接只買這隻。但現價不平，建議用月供儲或者分注去儲貨。
- 儲蓄保險，一般已供年期愈長，每年回報會愈多。你已供了15年，我建議保留。但你可以問下你個AGENT，有無一些暫時停供的選項，以減低你而2年的財務負擔。
但緊記，就算有這個選擇，你都了解下，對你份單有無負面影響。因為始終不同儲蓄保險，設計可以好唔同，最好你問翻AGENT個意見，來做最終決定。
你現時投資組合，係可以。只要按你年紀，慢慢調低潛力股比重，換入平穏增長股就可以。
而手上資金和定期，你要用來先處理好生活，確保你未來2年，唔會出大問題。之後，餘下部份才去做投資。
Q24285：
老師，我股票還有救嗎？金沙應該放嗎？
（2382、700、1810、384、788、1928）
龔成老師︰
你上述股票，不是劣質，雖然部分增長力減左，但可守，當然，部分未必值得持有過多，但你預中短期弱，長遠仍可守。
金沙(1928)受續賭牌影響，仍有好多變數。金沙(1928)在澳門有正面的貢獻，從資產質素、澳門發展、就業等角度，佢都做得不差，賭牌好有機會得到，不過，政治因素就是不確定，這點好難準確分析影響是否大。
初步分析，佢得到賭牌會過半，但政治是一些不能預測因素。
要留意，現時賭牌的條款，要求加入政府人員，這無可避免地影響了企業長遠的賺能力，優質度及估值都會略減。
此股長線投資價值依然存在，但風險度係高左，故暫時要控制注碼。你現時持貨不多，可以照持有，但暫時唔好再加注太多。
另外，你而家太偏重左係潛力股(2382,1810,0700,0788)，佢地雖然有增長潛力，同時風險都較高，不宜持有過多，而788潛力度減左。
就算你係偏年青，潛力股都最多佔5成好了，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。
未來時間，你就要加大翻平穏增長股部份，令組合更平衡。
Q24286：
你好啊sir，我想請教你
0345維他奶 $24.8入 應唔應止蝕
龔成老師︰
維他奶(0345)近期出現下跌，主要由於早前公關事件，對內地銷情造成負面影響。
睇翻佢最近業務，所有地區營業額同比都錄得增長，但唯獨內地出現較大下跌。而內地分部本身，盈利能力都係較高，故令集團盈利出現明顯下跌。
短期股價相信依然不利，但會否造成長遠核心性影響，我地要再觀察。
長遠來說，佢仍有質素，有品牌、有銷售網絡。不過而一刻，未知內地市場長線發展，會否出現核心性影響，所以最好保守少少。
現價仍未唔平，大約為合理區中間左右。你本身有貨，只要貨不多，可守，但有心理準備中短期弱，要耐心持有。
Q24287：
龔成老師你好，我今年28歲。因為細個貪玩所以負債幾年，今年6月先還哂錢。
我好希望盡努力追反幾年前失去既時間金錢，我由0開始學點投資，由玩月供股票開始學習。
暫時每月供銀娛2千，港鐵2千，領展1千，小米1千。
我現時月入萬8，現金有12萬左右，而每月扣除開支生活費後剩餘6千都拎黎月供股票。
請問老師我現時投資組合有無改善地方或者有無更好建議比我點樣為未來打算，謝謝！
龔成老師︰
當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。
以你現時28歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。
你現時月供組合，係無大問題。但銀娛(0027)由於續牌問題，令佢有一定不確定性，我暫時唔建議月供太多，你供住$1000先會較好。
多出$1000，你可以月供一隻潛力股，去加強你組合增長力。
現時大市只是合理區，你現有12萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。
另外，每月除了月供外，最好都留少少資金，用作大跌市時掃貨之用。
Q24288：
本人33歲，月入3萬，自置公屋供完，有以下投資
港股386-3手 $3.25
9626-1手ipo
9988-1手$13x
6601-1手ipo
（全部被逼長線）
Ibond-5萬
Crypto-5萬
駿利亨德森平衡基金 3萬
現金60萬
好似有點保守呀可？現階段入手美股可以？老師請建議
龔成老師︰
你現時已無自住問題，所以資金可以優先投資在股市，令組合更平衡。
我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
你33歲，應以增值為主。
IBOND只係收息產品，唔適合你年紀，建議沽出。Crypto係可以，但風險唔細，由其一些非主流加密貨幣，故長線不建議持有太多。
至現有持股，都係可以長線有。但留意嗶哩嗶哩(9626)不確定性較高，不宜持有太多。
未來時間，建議你用「平穏增長股」 + 「潛力股」作組合，去創造一個增值平台。
現在你每月先用5成儲蓄做月供。其餘先儲起，用一邊月供一邊儲蓄的策略。
由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。
大市現處於合理水平，那60萬資金，你可以先用20-30萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。
Q24289：
老師你好，請問#1789愛康醫療同#6098碧桂園服務，現價可買嗎？
龔成老師︰
愛康醫療（1789），以長遠業務分析，正面的。
佢以「愛康」品牌從事設計、開發、生產及銷售骨科植入物，並專注於髖關節及膝關節置換植入物。
睇翻佢的資料，佢的產品包括用於初次手術的骨關節植入物，以及為置換、修復或升級前次手術的植入物或部件的翻修手術而專門設計的骨關節植入物。都是有前景的業務。
這股業務不差，有增長潛力，盈利增長，這反映企業有實際的價值提升。
不過，投資時要考慮價格風險。現價合理區中至中上部。小注都可。
碧桂園服務（6098）由碧桂園（2007）分拆上市，主要於中國提供物業管理服務等服務。
例如包括保安、清潔、綠化等，物業管理組合涵蓋住宅物業、商業物業、寫字樓、多功能綜合樓、政府及其他公共設施、產業園、高速公路服務站、公園及學校。
佢無論在業務本質、規模、品牌、財務數據、前景，都是理想的，反映這企業有一定的質素。
不過，要留意內地房地產市場有明顯放緩情況，會對其增長潛力，有所影響，但長線都係偏正面。
現價算合理區中間，投資要分注，同埋預佢中短期都會較波動。
Q24290：
龔成老師，你好！本人上年開始follow 你，由不買股票，慢慢開始買小小。多謝你啟蒙。
我入了alibaba (average price 190) , 700 股。人生第一次買咁多。
擔心delist 一無所有，現在應否放了算，還是長keep ? 請指點指點。
本身40 歲，有返工，收入ok . Keep 住唔放也沒有生活問題。
兩孩之母。現在不知為何，有點內疚，唔敢話比老公知。
龔成老師︰
其實過往阿里的確試過私有化，所以唔能夠完全話無可能。但如果佢再做多一次，其實將來再係市場集資，難度會高左好多。所以，暫時機會唔大。
阿里(9988)業績差，相信阿里中短期仍較弱，但股價已到合理區中下的水平，長遠投資價值呈現。以下會先簡單講業績，然後再深度分析阿里前景。
阿里巴巴第二季度收入同比增長約3成，而純利逾53億人幣，同比跌8成，非公認會計準則淨利潤285億元，跌4成。
盈利大跌，其中一個原因是上年度同期，有較多投資收益（投資在上市公司，股價上升帶來會計上盈利），如果以較反映經營層面的數據分析（即是不考慮會計、一次性相關因素），盈利下跌約4成，這個數字，當然是不理想，其中一個原因是支出增加，反映行業競爭加大，同時，增長力減少。
另外有一點值得投資者留意，該集團指，調整2022年財政年度的總收入指引，預計2022財政年度的總收入同比增長為20%-23%（而過往預期是30%）。
以最新的業績，以及阿里收入的收入修正，相信中短期的經營環境，仍會較一般，投資者要明白短期股價波動，但長遠來說，阿里始終本身有優勢，慢慢能適應新經營環境，依然有長遠投資的價值。
但由於政策風險高左，暫時不宜持有太多。若佢佔你組合較多，我建議你將部份換碼，至其他優質股，去分散風險。