Q24011：

老師，剛睇完股票勝經，認為環保行業有前景，257，596，807，579，如果要選兩隻做長期投資，應該那兩隻比較好

龔成老師︰

光大環境（0257）主要在中國從事環保能源項目建造及運營，例如建造及運營垃圾發電廠、沼氣發電廠、污泥處理處置項目及餐廚垃圾處理項目。以及環保水務項目建造及運營等。

業務本質不差的，不過負債不斷增加，令風險度提高左。其實有長期投資價值計，現價合理區中下部，不過就唔建議太過大注。

上海實業環境（0807）由上海實業控股（0363），項目橫跨污水處理、再生水利用、污泥處理、供水及固廢發電領域的行業價值鏈，大部分項目乃根據服務特許經營安排進行，採用ＢＯＴ、ＴＯＴ或ＢＯＯ項目模式，亦運營及維護Ｏ＆Ｍ項目模式下之第三方設施。

市場對這類企業的估值唔會太高，因為會擔心可持續發展的問題。

從過往的財務數據可見，企業本質不差，但增長力不強，加上規模唔大，投資價值只是中等。現價算是合理，小注投資都可以的。

京能清潔能源（0579）主要於中國從事燃氣發電及供熱，風力發電、光伏發電、水電及其他業務。

業務不過不失，過往生意平穩增長，但不是高增長。而股價有點波動，要注意風險。這股現價合理區頂，但唔建議大注投資。

投資值博率為中等。

浪潮國際(0596)相信你是打錯號碼，此股跟環保無關。

若要選較有質素，會係光大環境（0257）。其餘上海實業環境（0807）和京能清潔能源（0579）投資價值相若，唔算係好高。

Q24012：

非常感謝龔sir！！本人今年34歲～932很多年前誤聽人說買了，然後就跌到現在這價位，虧損很多，這個建議全沽嗎？

而1337是由新股持有至今，中間加注了才調整到現在均價2.814，12@800股 可在大約什麼價位加注？

美股VOO現在價位在429一直都平穩上升～這價位會否過高？

非常感謝

龔成老師︰

順騰國際控股（0932）唔見有明顯投資價值，建議你沽左佢。

雷蛇（1337）佢雖然係有潛力，但本質好波動，盈利不足，所有的市值，都只是基於「將來預期」去產生，這個預期可以變得好快，因為大家都只是「估」。

同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。

另外，佢近年都有發展一些新興業務，潛力度有的，但仍左有不確定性。

因此，這股有前景，但有風險，無人知真正的價值。而佢另一些業務較是較新興，同樣有危有機類。因此，記住雷蛇只宜小注，否則你股票組合個風險會過高。

而恆基(0012)現價算合理區，你預每回10-15%左右(視乎你資金多少)，就去加注，咁就可以。

至於VOO，現價已係合理區頂位，至略貴水平。所以，你若想儲貨，現價只宜小注，或用月供去進行。

最後，你要記住，我地買入一隻股票，一定要知道佢質素、行業前景、財務狀況等，才去投資，唔好只係聽日講，或者聽消息。

如果你連間公司點賺錢、行內有乜優勢、點解未來有發展和增長潛力，都答唔倒自已，咁就要停一停，唔好投資住。

若你有上過我股票班，就會明白，我地的同學好小心投資的。課堂會派一份6頁紙的「企業評估表」，我會逼佢地填好6頁紙，先可以進行投資，所以佢地的投資都好穩健。

Q24013：

龔sir，我有啲關於買唔買樓嘅事想請教，想聽聽你嘅意見。

我係32歲女，未婚，同父母住喺由佢地買嘅公屋，兩個哥哥將會搬走，其實我一直都想有私人空間（細個時想要一間房，大個左就想一個人住），

我估計將來都不會結婚和沒有仔女，所以就諗值唔值得買啲300萬樓下嘅公屋。因為宜家住緊呢度，到兩老過世後不知會否留給我，我怕到時唔知瞓邊。

龔成老師︰

首先，你要睇翻而家這間公屋，到底適唔適合你未來生活。講緊係未來10-20年。

如果係適合，你就睇翻到底公屋有無留你名，同埋萬一父母都不在，你是否可以繼承現有公屋居住。

如果無問題，就你就無買自住樓的需要。反而應用現有資金，投資優質股去做增值。當然，長線財富組合，都需要有物業類。

但由於現時香港整體租金回報率不高，故投資收租用的物業，唔需要急住去買，反而先用優質股去做增值，個效益會更大。

但如果這個公屋不適合你，或者公屋無你名，那自住物業就變成一個必要課題。

不過，你中短期都無自住問題，故買自住樓計劃唔洗急。你可以邊物悉目標，邊有優質股增大個本金，令自己有更多本錢，買入心儀物業。

Q24014：

成哥，有只美股想請教你，滴滴的風險是什麼，及有長缐投資價值嗎？

龔成老師︰

滴滴 (DIDI)是一家經營出行技術平台的內地企業。主要業務為共享出行，為消費者提供各種不同的出行服務。

之前其APPS被內地下架，對佢造成一定影響。由於主要股東是包括UBER、軟銀等外國企業，令中央擔心內地數據外流。未來或對其營運模式，施加限制。

本身集團業務係有投資價值，但現階段尚未有盈利，故不確定性較高。

再加上集團股權結構，或造成政策上風險，故投資時，不宜太大注。

Q24015：

你覺得6185上升空間大嗎？

龔成老師︰

康希諾生物（6185）主要於中國從事研發疫苗產品，業務性質令佢不確定性好高，研發成功有機會好好賺，但都機會研發失敗，令研發成本白花，甚至出現資金鏈問題。

只能說這樣企業，是有危又有機的種類。集團都是近年才有盈利，長遠發展成點，而一刻好難去做一個穏當的估算。

只能說，長線投資價值係有，但風險度都唔細。持有該股係可以，但只能小注。

Q24016：

龔成您好，之前問過你問題，不過冇跟您嘅建議去做月供股票，反而今年2021年去左短炒股，本來都賺緊，但冇諗過今年中央不斷出手段調整股市，令我所有股票價錢都跌左一半，

因為我喺高位買入，現後悔不已。想請問以下股票還適合繼續持有嗎？還是需要止蝕沽出部分？如果股價大跌時，再購入同樣股票去溝淡股價可以嗎？

以下全於2021年購入:

3690 美團

16/2 $440 (100股)

18/2 $430 (100股)

22/2 $409 (100股)

5/7 $285 (100股)

1024 快手

18/2 $394 (100股)

3/3 $316.6 (100股)

19/7 $142 (100股)

24/7 $130 (100股)

6618 京東健康

17/2 $172.5 (100股)

24/2 $147 (50股)

1/3 $143 (100股)

4/3 $135 (50股)

981 中芯國際

25/1 29.7 (100股)

我今年32歲，未婚, 月薪約37k, 與家人同住，家用每月約10k, 個人開支約每月5k, 另外幫屋企人借左卡數，每月要還款7k(還有20幾個月), 屋企人經濟改善時會還，

扣除開支後我每月還有15k左右，現金儲蓄有150k。

如果想扭轉以上股票蝕錢情況，好好儲錢，請問有什麼投資方案可建議給我呢？我暫時沒有置業及結婚需要，但想儲錢計劃將來移民，謝謝你

龔成老師︰

你現時持有股票，都係有質素。但問題是，你全部買入價都係貴，所以令你出現較大帳面虧損。

記住，長線投資的回報，短時間看來未必吸引。但只要你選對正確股票，在合理，甚至平宜的價位買入，並長線持有，自然會有唔錯成果。

你睇翻全球投資最賺錢架巴菲特，佢都只會做長線投資，唔會去短炒，你就明白箇中道理。

現時你持有股票，雖然係有質素，除了中芯(0981)，其餘都係不確定性偏高的股票，唔建議你持有太多。你可以將部份，換碼至其他增長股會較好。

另外，信用卡借貸利率高，建議你優先處理左這部份，以免佢拖垮你長線投資回報。

至於你未來投資計劃，你視乎你將來移民時間。若你在2年內會移民，而香港股票要全數套現的話，就只宜投資一些較穏定的收息股。(若不足1年，只可做定期)

如果有3年以上時間，或者你移民係可以保留香港股票，你就可以用平穏增長股和潛力股(比例可以去到各一半，但你而家經驗較淺，暫時潛力股佔3成好了)，去進行投資增值。

你可以用每月一半儲蓄，去做月供，選一些有質素的股票進行。餘下一半就儲起。

現時大市只是合理區，你現有15萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

Q24017：

現代牙科（3600）I buy in at 6.2

1M

龔成老師︰

現代牙科（3600）有質素，但質素未算去到最優質個個水平，故不建議持有太多。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

你可以睇翻持股量，會唔會已經佔組合比例偏高。如果係偏高的話，最好沽少少，換至其他優質股，去平衡一下風險。

Q24018：

你好，龔sir。我覺得買入容易要止賺好困難，係咪每次買入都set 止賺？如果長揸就唔使做止賺？

龔成老師︰

你要明白我地投資股票，就係等同投資在一間企業，希望佢未來自然成長，以達至財富增值的目的。

因此，投資係一個長線計劃，講緊未來3-5年，甚至更長時間。只要佢長線投資價值無改變，基本上我地唔會因為中間出現股價波動(升或跌)，而去沽貨。

但又不至於永遠都唔沽，其實我地都會做出沽貨動作，而整個模式是長期性，我地不是今日賣，明日又買翻的短線操作。

而是買入貨持有多年，如果牛三，明顯貴的時候，我地會沽出部份。之後耐心等，可以等待以年計的時間，去翻平宜價時，才再入手。

不過，由於賣出後無人知能否買得翻(特別係優質股)，所以要去到真的貴，先有機會賣，同時唔建議全部沽出，必需留有部份。

Q24019：

Hello 龔成老師 我今年30歲 零股票投資知識，明年大約6月會離開香港。近兩年才開始儲錢，約有10萬。

正職月入2萬4及有網店生意平均每月15000收入(今年8月才開始）

想問如何透過股票投資盡快儲到50-60萬或即時到外地生活都有利息收取。

現時有吉利1手(成本$17.5）及小米4手(成本$12.25）；應否繼續持有？我另外按我情況，月供股票應該每月供幾多及有建議嘅股票嗎？

另外，我今年30歲 沒有投資知識，由去年才儲蓄現金約10萬，工作每月$25,000

現時有吉利1手(成本$17.5）及小米4手(成本$12.25，中遠海控3手(成本$12.12）應否繼續持有？我另外按我情況，月供股票應該每月供幾多及有建議嘅股票嗎？

謝謝

龔成老師︰

首先，你要明白我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。由於係長線計劃，你唔好預期佢對你短期財務上，會有任何幫助。

你明年6月就要離開香港，若你要將香港股票全部套現的話，現時餘下時間太短，唔建議進行任何投資，最多做定期存款好了。

若你就算離開香港，投資計劃依然係可以繼續，以你30歲年紀，可以投資一些有增長力股票，去進行增值。

你現時持有的吉利(0175)、小米(1810)和中遠海控（1919），都係有質素和適合你年紀，可長線持有。

另外，你每月可以用5成儲蓄做月供。其餘先儲起，用一邊月供一邊儲蓄的策略，可投資平穩增長股，及潛力股。

由於你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到將來你有一定投資知識﹐潛力股比重才可以相應調高，佔組合約3-5成，視乎你當時投資知識多寡和了解這些股票程度而定。

Q24020：

kung sir，衷心請教,本人有八百萬現金,但沒有物業,,每月要交 18000元租,想投資風險低的股票,目標 4-5% 回報,, 請問以下的基金股可以嗎？或請指點其他 謝謝！

823、2778、405、87001、435、1881、808、1426、1503

還是其他公用股？

2638

中电

煤气 ？

Thanks you

本人已50歲了

龔成老師︰

若你希望用低風險股票，去達至每年4-5% 回報。投資目標，可以集中係一些優質收息股身上。你附圖中的房托股都係可以，領展(0823)、置富(0778)、陽光(0435)會係當中較有質素。

而其餘房托不是不值投資，但由於佢地物業組合關係，風險會較高，故這些房托不宜持有過多。而且，要有8%以上，才有投資價值。同時風險較高，只宜小注。

另外，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。(盈富由於係一籃子組合，故不受此限。)

由於附圖中全是房產類股票，若你全數投資其中，會太集中係房產類別，而造成風險。個別行業，最多佔組合30%好了。

其餘資金，可以平衡分配在其他行業的收息股。你提到的中電(0002)、港燈（2638）、煤氣(0003)都適合。但煤氣(0003)股息率較低，加上本身升，都可以做到4-5%。

以下都是有質素的收息股，你可以參考下。

收息股的組合，目標是5%、6%的股息率的收息股，例如深高速（0548）、香港電訊（6823）、工行（1398）、恆生（0011）、。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

(你可睇下我本《50穩健收息股》當中仲有好多)

最後，每個人都有自住需要，若你長期租屋，會承受租金波動的風險。

建議你都用部份資金，去買一間自住物業。現時樓市雖然唔平，但因為係自住，只要佢配合到你長線生活所需。而你又有信心，長線可以"供得起"，咁就可以考慮入市。