華富財經 Quamnet.com Logo
青冰
2020-05-22 09:41:53
B股不是人人啱玩

2018年港交所批准同股不同權(W股)及生物科技股上市,來到2020年終於踏進大時代,恒指公司經諮詢後批准W股加入恒指及國指,最快8月生效,而生物科技股,坊間俗稱B股,今年真係收成期了,龍頭大哥康希諾生物(6185)今年累升逾三倍,每逢有B股招股,市場定必熱烈認購,上市後表現亮麗,直到昨天的疑似爆煲。

上月曾在本欄寫過「別跟生科股談戀愛」,重點都係叫戰友,抽新股後夠水位就要識走,始終B股仍然是沒收入甚至沒盈利的公司,最後研發到隻藥或搞掂一個醫療產品上市,可能會升十倍,但總括來說都是一將功成萬骨枯。雖然作出善意的忠告,但要估B股之頂,實在係無可能,亦都無需要咁做,自命能嚴守紀律的,跟市場癲個夠,完全無問題,但如果戰友係揸藍籌股深潛都唔肯斬的,真係千萬不要進場玩,極其量都係抽新股,採hit and run的策略。

在爆煲的前後,青冰發現有兩種不同的有趣看法,爆之前,見到市場人士開始將B股估值合理化而作出分析,例如同類股份在外國是非常渴市,如有些B股能蛻變成為國內的龍頭,現時估值絕對合理,這個感覺勾起青冰年少時回憶,睇到科網股爆破前,分析員將一些沒有PE的股,創造更多的財務比率,企圖合理化或量化科網股,從而作出估值;爆煲後,坊間亦會有更多「一早話咗呢啲股唔得架啦」,「當個個都叫人買就是爆煲之時」。

兩種聲音青冰都絕對尊重,只是受眾不同而已,青冰贊同這些B股日後總有幾隻可以成為行業龍頭,但記住一將功成萬骨枯這句,亞馬遜能成今天的霸主地位,2000年科網爆破時,它也試過跌九成,其他同業的死傷者不計其數,最後死剩的,才能成為現時的霸主,B股現時就像當年科網股亂炒之時,真正爆破後,才有可能找到一個小霸主,現時隻隻B股都喪炒,唔通隻隻都係霸主咩?所以都係那句,你對自己的紀律有信心才去入場,別當每隻都能成為騰訊啊。