Q24151：
老師；我早前用26.7入左海底撈；現在跌至20左右；我可以溝嗎？
龔成老師︰
我地決定加注與否，要睇幾個因素，記住，並不是「拉低平均買入價」為目的。
第一，要分析這股的質素，如果無質素，就再跌都唔加。
第二，這股的類別，如潛力或增長或收息類等，是否與你的財富組合匹配，比例是否適合。
第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。
第四，現價是否有投資價值率，要平，或起碼合理，不能貴。
第五，你要在加注後，仍有現金剩。
記住，重點不是「拉低平均價」，而是組合比例與配置。
海底撈（6862）本質是不差的，長遠仍會正面，不過中短期會弱。中央推節約飲食，對佢會不利。佢現時更要關分店。
另外有兩點都要注意，第一，管理層有講過，之前市場對佢地公司過度樂觀，估值偏高。第二，管理層話公司面對中國的市道，其實業務不是一直都好的。
加上這股之前貴，相信中短期股價仍一般。
不過以長遠來說，這股仍有質素的，佢以「海底撈」品牌經營火鍋店及外賣業務，火鍋菜單由鍋底、醬汁蘸料以及在鍋底烹飪的食材三個主要部分組成，可點單鍋、鴛鴦或四宮格鍋底組合，餐廳提供多種調料及食材，以及供應小吃、酒和飲品。
在中國有好多分店，以及外國都有。
有規模，有品牌，整體正面。相信長遠仍有發展的。但相信以佢的情況，仍要弱一段時期。
這股市場之前比佢好高估值，就算近期回落，最多只能稱為合理區中間至中下，一定未平。
現價係可以加注，但由於行業仍有不確定性，故投資時必須要控制注碼，唔好比佢佔組合比重太高。
Q24152：
Ar Sir 好，我係你的學生。睇完你80後千萬富翁書後，致富有多條路，其中團隊就是資產這思維令我好奇保險行業，然之後好快速考了paper 1,3,5，都溫到死死下，
9月上完你堂後，立即溫書考試出了agent code…..
最後先知同自己工作有抵觸，部門是不批准做地產保險工作的，本身工作好穩定，想撈埋多樣嘢搵外快或如果保險行業有被動收入超過幾多先考慮轉唔轉工的，但現在如果
秘撈要超低調。。。1516中
我有一個6歲小朋友，人工2萬8到每年加少少，無什麼憂慮，mpf類似公積金，即退休相對保險行業好。。。入了那保險團隊都好正面，覺得同自己都好夾，覺得佢哋都好叻，
教做人，相處之道等等。。。自問人脈一般，之前識的同學都冇contact….
團隊人員好輕鬆說你想識就有啦，腦有就有，做好自己，吸引力法則的影響力，我都知這行業要與時俱進，非常有挑戰性，身邊人很多都話唔適合我之類說話，
但我唔個做咩好快速就考曬啦
我有些迷失，所以搵ar sir指點迷津，最近都冇咩溫書，來緊會溫下，買的股票大部分都坐艇了
跟朋友學雙外幣掛鉤，由5月到現在都係倒蝕，雖然話要玩3年，每7日掛鉤一次，操控好密，自己都未摸熟匯率的改變及風向，自己都未摸熟，跟朋友掛
我渴望可以快d買到屬於自己的單位。
龔成老師︰
你睇完80後千萬富翁書，應該明白"團隊"只係其中一個選項，你仲可以考慮成為專家、物業投資者、股票投資者和企業家。
其實，保險銷售係一個值得嘗試的範疇。至於是否放棄現有工作，全力投身。定係低調秘撈，你可以自己去衡量。
不過，你預初期1,2年收入，都唔會太穏定，記住要留有儲備，支援短期生活開支。
另外一個方法，就係透過現時工作收入，去進行投資。令自己有一定資金，足夠你創造被動收入，去支援基本生活，才去作新嘗試。
雖然時間會長左，但相對可能對你生活壓力無咁大。
至於外幣掛鉤，背後操作係好複雜，不是無風險項目。而且，本身要分析匯率已經係好難。唔建議你再用這些投資工具，集中翻係優質股會較好。
Q24153：
早晨龔sir，想請問下3隻股
1128 880 2282
可以入嗎？謝謝你龔sir
龔成老師︰
永利澳門（1128）、澳博（0880）、美高梅（2282）受續牌影響，令近期股價回落不少，但整體都仲有投資價值。
當中美高梅（2282）質素比過往減左，但不是劣質。不過，賺錢能力就比過往減少左。加上之前虧損，因此將企業估值調低左，現時質素算是中等。
現時賭牌進行初步的諮詢，仍有好多變數，從就業及澳門長遠角度分析，佢得到賭牌仍有過半機會，但政治是一些不能預測因素。
要留意，現時賭牌的條款，要求加入政府人員，這無可避免地影響了企業長遠的賺能力，優質度及估值都會略減。
另外，全球疫情反覆，都對佢有不利影響，不過，相信這只是中短期，以長遠的角度分析，疫情因素影響不算大。
這些股票投資價值仍在，但由於優質度減左，以及有不確定性。
現價算合理區中至中下部，可以分注。但由於不確定性暫時都較高，故不宜太大注。
Q24154：
感謝你回覆
其實都有諗過主要生意下滑原因，因為上年疫情生意可能異常地好係有依個可能，暫時睇返自己對上唔計疫情嚴重嘅時候，業績其實差唔多，
但因為上年開啲“食材陳列室”（即係網站食材嘅倉＋小小門市）令營運成本高咗，如租金、人工、水電費等等…
仲有今年嘅食材成本已經加咗最少2倍…根本我咗無轉賣嘅空間，同多咗好多食材店，大家都好似鬥做爛市咁……啲和牛只賺10～20蚊塊……(當然我唔會咁…)
另外，原本我公司品牌有係hktvmall開店，原本用自己公司品牌名有3～5萬營利，但由於partner成日唔上心，只係貪方便，將啲唔靚嘅食材賣返出去，
令到品牌形象受損(有客人直接搵我投訴)，所以我轉咗另一個品牌上架～上架後partner 自己負責，但賣嘅全部係平價食材(質素都係差)，營利唔高，
如果做同一個營業額我最少賺2～3萬，佢賺嘅只係得幾千……變相唔夠自己出糧。所以，我諗住另外開多間店上hktvmall自己管理返…
股票方面我有買美股
原本幾睇好spce 買咗後試過升咗幾蚊，點知升就出新聞要停飛，仲要改下年年尾先再飛，依家仲要跌咗好多，但仲未放，諗緊長唔長揸住先…
龔成老師︰
其實你都大致掌握到個問題所在，市場惡性競爭，有時係在所難免。
你現時做的方法，暫時都唔見有大問題。令客戶清晰翻個品牌定位，係十分重要。除左要人記得你，仲要係即時諗到，你係買緊乜野品質架食物，而點係好重要。
Virgin Galactic Holdings Inc.(SPCE)2004年成立，為首家上市太空旅遊企業，主要業務是為個人和研究人員提供太空飛行服務，公司為維珍集團的一員。
由於業務是一些很新的技術，故有一定不確定性。由於佢商業飛行時間，相信你進一步推遲，所以股價必然會出現較大回調。
這間企業不是無投資價值，但係不確性好高。如果研發成功，又可以做到商業化，有機會好好賺。但能否成功，幾時會成功，而家都無人知。
所以，若你投資係可以，但只宜小小注去博下。
Q24155：
龔成老師，可否麻煩你幫手睇下我既持倉，俾少少建議我
12、66、1705、939、2158、1137、1830、6993、9992
恒基同港鐵係諗住長揸，其他本身想短炒，後坐左艇
龔成老師︰
你要記住，唔好做短炒，係好難玩，這是經驗之談。
我地投資一定係長線，你見全世界最成功的投資人巴菲特，都只會做長線投資，唔會短炒。
因為中短期股價，可以因為好多因素影響，有些因素甚至跟企業無關，所以無得計。但長線企業價值，必然會反映在股價上，只要長線持有優質股，就自然會有理想回報。
你本身打算短炒的股票，大致上都有質素，可長線持有。除左賓仕國際（1705），質素上較一般，不宜投資太多外(最好沽少少走)。
雖然佢地都有長線投資價值，但你都要注意翻以下幾點。
完美醫療(1830)、醫渡科技(2158)、香港科技探索（1137）都係不確定性較高股票，你可以投資，但長線不要佔組合太高比重。
建行(0939)只係收息股，增長力不高，不太適合你年紀。
另外，你這些股票的買入價都偏貴，若你不太懂定平貴，我建議你未來投資，最好用月供模式去進行，以平衡風險。
Q24156：
老師，你點睇內房違約呢件事？會唔會真係好似小金人咁講，爆既機會高，禍延全球？
內房高息債恐逾半違約 禍延全球 富豪輸身家 蔡金強：「慘過金融海嘯 內房會落地獄」
龔成老師︰
內房違約唔出奇，因為本身不少內房過往的經營模式，太過進取。你見內房股，好多負債比率都好高。
當整個市場氣氛良好，內房企業可以貨如輪轉，用高槓桿發展當然問題不大。但當好似而家咁，整個經濟和樓市開始冷郤，就會出現周轉不靈的情況。
而且，問題嚴重程度，係有機會超過我地帳所見，因為有不少負債被隠藏。(有興趣，可以睇翻我恆大個POST，有詳細解釋何謂隠藏債務)
中央政府相信會盡力控制個情況，避免出現違約。但相信目的不是保住企業，而是確保不會對社會，造成好大衝擊。
現時除了已開名的內房企業外，仲有無其他會開始出問題，無人知。所以，暫時內房股風險都唔細，最好不要投資住。就算投資，都只宜好小注博下。
Q24157：
謝謝老師花時間回答
因為我見50隻穩健收息股 是2018~2019年版，怕未update，定還是都可以照睇住
阿sir 頭先上堂聽得唔太明，想問如果潛力股，未有盈利股or高增長股果部分
用唔到PE估值，應該用咩去估
謝謝解答
龔成老師︰
50隻穩健收息股，你可以照睇住先。因為有質素的股票，較少機會在短期內，出現巨大變化。
至於一些未有盈利的企業，用一般估值方法，都會較難得出一個穏當的答案。
因為，佢主要投資價值，都係來自「未來」，是一個未知之數。
但唔代表我地無野可以做，我地可以透過深入了解，佢現時財務結構、行業狀況等，去估算佢將來成事機會。
或者係成事前，集團有無能力，一直維持正常營運。例如有無足夠資金支持研發、市場推廣等工作。這些因素，我地都可以在分析財報中找到答案。
令我地係「估」算將來發展的同時，有較「踏實」的理據，在背後支持這個答案。
至於高增長股票，我地就只能從佢未來發展，加上現時整體質素，去做個估算。因為佢增長好快，用PE估值法去計算時，好大機會會低估左佢架狀況。
所以，只能自行調整去做估算。雖然未必咁準，同好睇個人投資經驗，但這樣去做，個估算才算得上較合理。
Q24158：
如想幫長老買入股票 0405或0123較好？
先謝謝
龔成老師︰
若是給長者投資，我會較建議用越秀房產基金（0405）。因為佢係收息股，可以為退休人士創造被動收入，同時間，風險性都無越秀地產（0123）咁高。
越秀房產信託基金（0405）業務為持有物業收租，基本上投資於中國廣東省物業，有一定質素。
不過，最近越秀地產（0123）出售國際甲級寫字樓廣州越秀金融大廈予越房管理的越秀房產基金（0405），代價約$80億。而越秀房產信託基金則以供股模式進行。
因為內房唔想自己負債太多（近期這方面較多問題），因此，越秀房產信託基金（0405）以股權集資模式，去轉個圈支持翻越秀地產（0123）。
問題有少少，因為利用405小股東，去幫123減債。
但由於所買的是有質素的資產，因此又未到好不利，但供股始終市場不太喜歡，股價短期會不利，但長遠又未算對兩間公司有核心性不利。故0405給長者投資，依然係可以。
不過，唔好成個組合完全集中晒佢身上，要平衡，要有不同行業的收息股，才算理想。
以下都是一些有質素的收息股，適合退休人士，你可以參考下。現價合理，可以分注慢慢入貨。
目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。
另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。
Q24159：
- 早晨龔sir，想請問
1177
3319
情況如何，謝謝
- 老師早
可唔可以另外解釋下
如果中國行數據稅
- 合理性
- 對科企盈利影響
- 會否延伸影響 其他行業 謝謝
龔成老師︰
- 中生(1177)和雅生活(3319)雖然最近回調不少，但未見本質有明顯轉差，有貨可以照持有。
現價計，中生在合理區中間，而雅生活在合理區中下部。
不過，要留意內地房地產市場有明顯放緩情況，特別係住宅類。雖然，雅生活較其他物管股，相對業務分散，有住宅類之餘，也有不少商用、公用項目，分散風險能力較強。
但始終都會有D影響，你預佢中短期都會較弱，但長線係看好的。
- 市場有傳內地或向科技企業，徵收「數據稅」，目的相信跟早前共同富裕政策有關。市傳有機會稅率，達2-3成。
當然，現時好多野未落實，我地都係估估下。最終何人要被徵收、盈利那部份被徵收、稅率多少，都係未知之數。
不過，這令市場擔心，對科技，甚至一些較大型，而過往又好賺錢的企業，會不會將出現同類型風險。
暫時，我地唔知長線影響有多大，但政策風險度又高左，特別係對科技股。所以，暫時投資唔好太進取，再觀察下往後情況，才再作決定。
Q24160：
老師你好啊，我係見到你嘅信箱成日有回答所以我諗住係到問下你意見。
本身我供緊樓，一個月唔係好多，$6500，但係因為之前欠下債務，加埋成$450000，
依家每個月淨係還債都要$9350。本身我嘅人工唔高，淨係一萬七千幾，所以依家都搵左份pt做，大概每個月額外多$5000左右。想問下我可以點做，
因為依家越做覺得越辛苦。我今年25歲，黎緊可能有機會係下年九月讀書，到時少左份pt就更加吃力…
我以前唔識諗，淨係係咁借錢先係未來錢，依家好後悔
龔成老師︰
其實你仲後生，而家識得諗都遲。只要用正確方法，慢慢修正好你的財務狀況，再努力學好投資，長線相信你財富都可以有唔錯增長。
首先，你現時供樓以外負債都唔輕，如果息口較為高，你必需要先進理好這部份，才進行投資。
你可以試下，會唔會有一些息口低，年期較長的借貸計劃，去取締這個高息貸款。另外，如果你個物業係自住，睇下可唔可以先搬返屋企，再將佢放租以減少財務壓力。
到你財務負擔無咁大，每月有一定儲蓄，你就可以用每月資金，去做財富增值。
你25歲，應以增值為主，建議你用「平穏增長股」 + 「潛力股」作組合，去創造一個增值平台。
每月可先用5成儲蓄做月供。其餘先儲起，用一邊月供一邊儲蓄的策略。
由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。
至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。