隻中煙(6055)炒到上太空，最終都係敵不過地心吸力，有戰友話佢似美圖(1357)，又係爆炒幾日然後跳涯式下跌，但青冰更覺得佢似希瑪眼科(3309)，早幾日私下同朋友吹水，嘩呢隻中煙咁似希瑪喎，當年希瑪由招股價2.90元，四日內炒至19.90元見頂，累升5.8倍，中煙以招股價4.88元計，升到28.5元見頂，是4.8倍，雖不及亦不遠矣。

當年希瑪上市，超購1569倍，保薦人是招商證券，中煙生於貿易戰及反送中的時間，投資氣氛相當曳，但仍錄得102倍超購，算係犀利，聯合保薦人是中金及招商證券，咦，又係招商喎。

希瑪甫上市就爆炒，4日內急升至19.90元，首天升幅係76%，次天係44%，第三日係32%，第四日一度爆升104%，最後散水狂插，收市仍升58%。中煙比較慢熱，頭兩星期都相對克制，但克制中都在十日內累升93%，真正的瘋狂在上周五開始，急升18%，之後再升52%，周三再升44%，於28.50見頂。

保薦人行使超額配售權的日子，亦相當有趣，希瑪是在2018年1月19日開市前公佈此消息，按通告內文，是指在1月18日行使的，而爆升見19.90元的日子，就是在1月18日。中煙就在剛剛7月1日晚上公佈超額配售權，按內文就是指在6月30日行使的，兩日都係假期，換言之7月2日才反映此因素，而股價就在7月3日高見28.50元。所謂超額配售權，是保薦人可預先向大股東借貨，批畀承配人，例如佢啲客啦，到行使此權利時，就按招股價額外發行股份，還畀大股東，通常額外發行的上限是上市發行股本的15%。照咁睇，行使超額配售權之時，都係一個催命符。

究竟幕後是否同一班資金炒作呢，青冰不是內線人，真係唔知，但半新股有冇炒作價值，除了貨源歸邊及概念獨特這些疑幻似真的原因外，更重要的就是有冇蟹，相信中煙今星期都累積咗唔少喇，當年希瑪都係，雖然希瑪昨天高見6.10元，係7個月高位，但比起上市第二天的高位7.44元，仍有頗大段距離，可見蟹貨是值得尊重的，至於中煙業務前景及背景嘛，當日傳媒都有報導，希瑪的老闆林醫生同好多大孖沙有交情，仲入埋股，公司概念又獨特，發展前景應該看高一線的，結果係點大家都看到了，至於中煙嘛，青冰pass。

Fb個人專頁 http://www.fb.com/chingbing888