近期有種生意係比較好賺的，就是賣口罩，需求激升，供應又未能在短時間內跟得上，所以邊度有得賣，即使貴啲，都會有人排隊，但青冰日日刨通告，發現有一種生意是更「穩賺」的，就是準備去製造口罩。

最著名而最正氣的，當然是王維基的香港電視(1137)，如果有跟開他們的專頁，就會知他們尋找口罩機的過程，購買後幾時付運，去邊度搵材料，一切都較透明，而看港聞版，仲睇到甚麼工聯會等等都籌備緊在香港製造口罩。

昨天有兩間公司在開市競價時段大升，分別是威高(1173)及建溢集團(0638)，前者係做時裝，先講疫情對佢生意的打擊，再提到話將用現有廠房設生產線，亦已經買到口罩機添；建溢個廠本身係做電子產品，都話改造現有設施，先做口罩，之後再準備搞埋醫療防護衣。威高及建溢昨天分別高開約250%及50%，青冰無再詳細睇成交咗幾多，只知收市都升幅削半。之前仲有幾間公司都有同樣情況，有廠就有機會囉，但之後做唔做得成，有冇錢賺，都是後話，首先可以做到的，就是開出一個天價開市價，然後就，你懂的。

比起整口罩，有些藥股也話自己對新冠狀病毒有臨床研究云云，之後如何如何，最重要的分別，就是青冰無能力知他們真假，因為生化股難懂嘛，可能真係整到呢，而口罩股，應該好易分得出。

總括而言，青冰的感覺就是這個生意門檻真的不高，王維基雖然有心有力，但竟然由諗，到買機，買料，到真正做到口罩，所需時間只一個月，係極之有效率，還是真係較易入行，相信兩者都有，跟住又進而推論，個個見口罩好搵，個個都一窩蜂轉行做，你再睇吓日本那幾隻炒到癲的口罩股，有理由相信，之後真係唔愁供應了。

-- Fb個人專頁 http://www.fb.com/chingbing888