華富財經 Quamnet.com Logo
青冰
2019-10-11 01:55:00
再談平保買匯控

匯控(0005)連續兩日打入港股通十大,淨買入分別有七億幾及五億幾,換言之兩日約買了二千零萬股,不其然又令市場想起,又是平保掃貨了。過去幾年,青冰都寫過幾次平保買匯控,由2017年8月盲估,至平保真的持有超5%要舉牌,之後再探討過跟平保買匯控,無論是短炒定揸長,似乎得益都不大,今次再炒冷飯,估吓佢幾時要再向港交所(0388)申報。

只要戰友去披露易睇吓,平保首次舉牌係2017年12月5日,增持1000萬股,持有5.01%,之後是去年2月9日,增持3722萬股,股權是6.17%,最近一次係去年的11月1日,增持537萬股,股權是7.01%。心水清的戰友自然睇到,每次申報都是向上跳了一個百分點,這也是證劵及期貨條例中,權益披露的一個規定,有興趣的戰友可在證監會網站睇睇,換言之,下次平保需要作出申報,就是持股升穿8%之時。

青冰以前都寫過,平保主要都是經上海那邊的港股通買貨,所以你從CCASS的數字可睇到端倪,check返去年11月1日,通過滬股通持有匯控的,有14.57億股,佔7.20%股本,咁同申報的7.01%相當接近,都正常吖,唔會係全部都由平保揸嘛,再睇2月9日,滬股通持有匯控6.4%,而平保申報是6.17%,兩次都有約0.2%的差距。

按現時最新的CCASS數字,滬股通持有14.96億股匯控,即7.27%,當中未包括最近兩日的增持,因為T+2未完成交收嘛,再加二千幾萬股,滬股通都係持有7.40%股權,如果要升穿8%,再計算埋有0.2%的誤差,滬股通要買多1.65億股,先會到8.20%,以現價計,即係要動用約95億港元,如果以過去兩日的速度,每天平均買6億元,都要買多16日先夠貨,即係要十月尾囉。當然,這個速度可加快的,睇返過去5年的港股通數據,滬股通最勁試過單日買4368萬股,係去年2月,如果係咁狠的話,4日就買齊要申報喇。

不過亦再次提醒大家,按過往幾次申報,申完都唔會有太大刺激,遠嘅唔講,就講最近兩日,雖然係大手買貨,但你都唔見隻大象推得郁,獲利機會似乎欠奉。在現時這個局勢下,平保講明係長線投資,也未必會有人信,但股票市場只要公平公開咁增持,你亦無佢乎嘅,況且持有7%,也沒有要求派代表入董事局,8%亦應該唔會,不過,有冇發揮到影響力,你懂的。

Fb個人專頁 http://www.fb.com/chingbing888