炒細價股，戰友最喜歡就是聽到貨源歸邊四個字，貨乾易炒總成為不少專欄的常用字，咁青冰都有用過嘅，只係盡量都只會當係其中一個利好因素，而非促使你買入的唯一原因，只要你股齡夠深，聽得多看得多又交足學費，肯定講得出十隻八隻業務冇乜問題，貨源夠乾的股仔，但係唔炒就唔炒架啦，無需要向你解釋，或者你遇著的Mr. John係比較孤寒，就只有呆等，甚至被震完出來先升。

供股係其中一個加速乾的技倆，所以每逢供股，好多炒友都睇實，點供法、幾時除凈、邊個包銷、供股結果及派送日期，當然就唔會得一套formula就知隻股玩唔玩得過，牽涉的因素太多，只能憑經驗及靠估，去年印象較深刻的是中國星(0326)，0.25供股，遇上大市跌，得49%供股，龍五咁樣供一供持股就由20.63%升至51.86%，爽皮，你可能會話，仲有四成幾街貨啊點叫乾呀，但你睇吓由8月兩毫幾起步，年底升到一蚊，兼公佈派特別息0.15元，咁你話街貨多唔多呢？

近期見唔少人都睇住隻華商海洋能源(0206)，就係睇中佢未供過股，58%供股，得六個股東申請，咁樣搞一搞真係乾晒喎，開個通告睇，唔計包銷商及關連人士的公眾股東，由供股前的32%減至16.34%。供完之後又的確炒過一浸的，由供股價0.45起步，都炒到0.66，但來得快去得快，最近已經連跌5天，跟供股價又好近喇。

這股前稱TSC，2017年底賣殼予有招商局背景的基金，原大股東亦持有1.2億股，約8.15%股本，並承諾在認購協議完成後12個月不會減持，單刁完成日期是2018年2月9日，換言之兩星期前已經解禁喇。再細心看月初的供股結果通告，招商局及中集這兩個一致行動人士都有供股，分別持51.94%及6.3%股份，但原大股東Global Energy就沒參與供股，仍持有當初的1.2億股，但百份比就由8.15%降至4.07%，即係話佢在市場沽貨，已經不用披露了。

近日急回係唔係佢咃沽呀？咁又未必嘅，睇過CCASS數據，四大持股劵商分別是通海、摩根士丹利、國泰君安及匯豐，全部持超過1億股，通海係包銷商，而CCASS顯示供股前佢地得100萬股，咁應該唔係前大股東啦，大摩由原本持有9280萬，供股後多了9280萬股，比較易睇，就是中集囉，至於國泰君安及匯豐，在供股後股數沒明顯增多，似乎都有嫌疑，但他倆在過去幾天都冇大手沽啊，反而最大手沽的是包銷商通海。

青冰暫時沒興趣再深究，因為市場熱鬧，仍有不少機會，不需要太早睇住有疑點的公司，但如果有日見到1.2億股大手上板，又或者CCASS有異動，再睇都未遲啦。

Fb個人專頁 http://www.fb.com/chingbing888