華富財經 Quamnet.com Logo
龔成
2021-12-15 10:00:12
【龔成問答信箱】(Q23811-Q23820)

Q23811:

龔sir, 正在努力學習你所教嘅嘢,但對分析公司仍未熟悉。想問下,之前見你喺書入面有講到港交所0388 十分優質,想問下最近政策,包括北京會成立新嘅交易所,

及剛開始交易的MSCI A股期貨分別會對0388有咩影響?

同埋,想問假設0388盈利下降,對佢係咪影響唔大,因為記得你講過佢係會自我成長嘅公司,只要日後交投好返,佢就會多返盈利,價值自然會升返?

而且佢唔係依靠盈利而成長,所以中短期盈利跌都唔會影響佢太大?

同埋想問返如果想入,咩價位入比較合理?

謝謝

龔成老師︰

北京會成立新嘅交易所,其定位跟港交所(0388)不同,係無直接影響。

而MSCI A股期貨,會令港交所(0388)交易量增加,係正面。不過實際成交金額唔好大,真正盈利幫助唔大,純粹令港交所產品更多元化。

若港交所(0388)盈利下降,你要睇翻係中短期市場波動,還是一些長線因素變左。若是前者,你照持有等佢升翻就可以。

如果是後者,你就要調整投資策略,有機會要減持。

其實任何企業長線成長﹐都必需有盈利在背後支持。佢能夠自我成長,唔係話唔洗要盈利,只係佢生意模式特別,唔洗去發展好多野(例如買新機器、增加新設備等),不斷去加大資本投入,都可以持續增長。

Q23812:

老師,想請教:

  1. 退休後投資組合

0778 10%(達5.5%息率)

1398 10%(達6%息率)

2638 10%(達5.51%息率)

3110 10%(達5%息率)

6823 10%(達6%息率)

0027 5%

0066 5%

0388 5%

0823 5%

1038 5%

1928 5%

2800 5%

2822 5%

3067 5%

BRK.B 5%

龔sir, 請你看看我上面的組合如何?打開退休時組建

2, 會否太多隻股票?

3, 是否需減去一兩隻?

龔成老師︰

  1. 大致可以,不過盈富(2800)、銀娛(0027)和港鐵(0066)其實派息率不高,主要係收息加穏定增長。你納入組合都可以,但不要高於比重5%。

南方A50(2822)和安碩恒生科技(3067)是潛力型股票,不太適合退休人士。

  1. 若你資產總額,達100萬以上,15隻都勉強可以。但少於100萬的話,就最好保持10隻以內。

  2. 最少你要減去南方A50(2822)和安碩恒生科技(3067)

Q23813:

龔sir你好,經過差唔多3年既月供計劃,終於到左第4個10萬啦。

背景: 26歲公屋仔,月入20k,月儲$10000-$11000,其中$7000為月供股票。

龔成老師︰

恭喜你,但緊記月供係一個長線計劃,如果無特別原因,就最好一直維持這個習慣。

另外,現時大市只在合理區,緊記要留3-5成現金,去等大跌市機會。

而且,你別忘記跟我之前教你方法,調整好個組合,長線集中係10隻左右的股票,咁你會易管理好多。

Q23814:

多謝老師百忙抽空回覆, 我係希望每年收六萬蚊利息 唔係每月呀,我支出唔多又可以承受較高風險 是否可保留一些增長股留待過幾年再轉去收息股呢?

我一直都有睇老師你嘅文章同書籍 覺得老師嘅見解好有前瞻性 和好適合長線的投資者,一直都好想上你堂跟老師詳細學習 但我嘅工作係返夜班所以時間一直未夾到,

明年半退休後就可以認認真真跟老師學習了

龔成老師︰

先多謝你的讚賞!

若你目標係每年6萬,以股息率6%計,只要100萬本金就可以。因此,你可以將一半股票,慢慢換成收息股,去創造這每年6萬的現金流。

其餘股票保留作增值之用,係可以的。不過,始終你係將退休人士,我唔建議持有過多潛力股。

美團(3690)、騰訊(0700)、小米(1810)、京東(9618)、平安智能及機械人(3023)、京東物流(2618)、眾安在綫(6060)、韋爾股份 (603501)、GBTC、DQ、ARKW都係潛力股,唔建議持有太多。

建滔積層板(1888)質素較一般,建議全數換為收息股。(但要分段沽,唔係一次過清晒)

黃金部份,你可以保留。但因為黃金唔會創造出現金流,純粹用來對沖黑天鵝事件,因此唔需要多,故不要再加注。

現金部份,你可以因應自己情況,預留部份作應急錢。其餘現金,就等有大跌市出現,才去入平貨。

其實我間中都會開星期六班的,通常一年開1、2次,星期六下午時間,你可以睇下夾唔夾到。

但預下次在2022年年頭。

你或者可以預早留位,只要whatsapp 55457212我同事,打「留位星期六班」就得。我地有具體資料就會 whatsapp。

Q23815:

龔sir 你好!我岩岩follow做你2個星期 覺得你既分析幾好 所以想向你請教一下

我爸媽就快退休 仲有1年就可以攞返啲mpf 想問一下有無咩收息股適合老人家

麻煩你

龔成老師︰

其實退休除左買收息股,去創造穏定現金流外,都可以配合其他產品,以個收息組合更多元化和平衡。

你父母可以將這筆退休金,分成5部分。

第一部分投資收息股,你可以建立一個收息股組合,你可考慮港燈(2638)、香港電訊(6823)、恆生(0011)、工行(1398)、置富(0778)、陽光(0435)、深高速(0548)等,大多有5%股息

另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、富豪產業(1881)、互太紡織(1382)等(記住,股價略波動,不能太過大注)。

(你可睇下《50穩健收息股》當中仲有好多)。

你平衡的投資這些股,除了可以得到穩健的收息收,同時可有效的分散風險。

第二,投資債券,你可以選擇A評級的債券,年期較長都可以,但利息卻不高。你可以到銀行問問。

第三,投資年金,你可以睇睇,這是適合你們的產品,零風險,可以有穩定回報。

第四,你亦可投資銀行低風險類的產品,你可自行到銀行了解下,總之是「低風險,持續現金流」的。

第五,持有現金,以備不時之需。同時,若投資市場大跌,你也可以考慮買到更多的收息股,因股息率會進一步上升。

只要佢地平衡地分配在上述的項目上,就可以做到平衡風險,同時有穩定的現金流。

Q23816:

你好,我有啲問題想問下,我宜家手持以下股票,但宜家既價錢已經比我買入蝕左大約10萬,我想問下,我應唔應該放左*部份再投資落其他到?謝謝﹗

788 @2000股 平均價$1.26

3 @1050股 平均價$11.62

9988 @200股 平均價$240.1

2160 @1000股 平均價$21.5

*9990 @2000股 平均價$18.44

6618 @250股 平均價$124.6

*9633 @200股 平均價$49.5

*6993 @1000股 平均價$10.9

909 @3000股 平均價$32.583

6862@1000股 平均價$43

700@100股 平均價$425

謝謝

龔成老師︰

這個問題,要睇翻你本身的股票,有無長線投資價值。

我地唔會因為佢中短期跌,就去沽貨,或者換碼。只會係佢本質變差,我地才會作出調整。

你手持的股票,都係有質素。但你好集中係潛力股類(除了0003,6993,9633外),佢地波動性較大,不宜持有過多。

就算你係年青人,潛力股最多也只宜佔組合5成。若你投資經驗較淺,或者年長些,比重更要進一步下調。

特別係微創心通醫療科技(2160)、祖龍娛樂(9990)、京東健康(6618)、明源雲(0909),這幾間企業不確定性都較高,長線只宜小注投資。

現時的持股,你可以照長線持有。未來時間,你就要加大翻平穏增長股部份,令組合更平衡。

Q23817:

請教阿Sir,點睇同埋667中國東方教育1313華潤水泥控股

之前兩隻都係8.x買咗,唔知應該放走定係等佢升返?

謝謝

龔成老師︰

中國東方教育(0667)為中國領先職業技能教育提供商。主要涵蓋四個行業領域,即烹飪技術、信息技術及互聯網技術、汽車維修及時尚美業。

早前中央推出政策,打撃校外課程,對部份教育股造成影響。但近期中央提倡加強職業教育,反而對企業有利。

不過,職業教育現時在內地人眼中,會比常規教育睇低一線。簡單咁講,佢地會覺得讀唔成書才會去讀職業教育。因此,雖然政策支持,但最終會否提升集團利潤,尚要觀察。

睇翻佢過往數據,盈利都較波動,賺錢能力唔算好強。整體而言,投資價值中等。

若你持貨不多,可以守住先,再觀察。

華潤水泥控股(1313)本身有質素的,不過業務就較有波動,佢過往的盈利數據上落都大,因此股價的變大亦會較大。

佢之前公布的中期業績,業務有回落情況。長遠計,房屋、基建發展等因素,都會利好水泥股。因此長遠是正面,現價合理,現貨若佔組合比重不高,可以照長線持有。

Q23818:

龔老師你好,我是投資新手。我係一個投資App(富XXX)開左所謂港股及美股孖展戶口,想問下係咪只要我唔向證劵行融資就無太大風險?

因為我都係自己入錢落証券戶口去買一啲大企業股票。

龔成老師︰

你股票戶口,只要你唔做任孖展借貸,咁就無問題。

其實你作為投資新手,對企業估值,點去定平貴未必會太了解。最好先利用月供模式(而非直接買貨),去做增值,可以減低買貴貨風險,對你而言會較理想。

你可以去銀行或證券行,開個可以月供股票的戶口,之後將每個月的一半儲蓄,放入去做月供。其餘一半儲起,等大跌市機會。

Q23819:

龔成老師你好,首先多謝你選中我的問題回應,本人37歲,有穩定職業,月入約$45000,10年後如無職升就頂薪$62000左右。

今年9月剛用496萬9成按揭買入掃管芴恒大珺瓏灣,期待作投資用途,想問問老師看法,覺得現時恒大情況,這個盤的樓價於將來有機會升嗎?

如沒有就會影響我現金流投資的取向。

因為現時有小米1810在手,28.9蚊買入手持2400股,正輸2萬元,另外持有阿里巴巴9988,264蚊買入700股,正輸8萬多。

共輸緊10萬,想問老師繼續長線等升?橫掂層樓當投資。

定係放左去將淨返十幾萬買其他股票?因為對層樓嘅升值能力無太大信心。

最後,想問下老師,你嘅課堂會唔會有zoom教學,因為工作關係都好難出到灣仔上堂,祝老師身體健康,希望有機會跟你學嘢!

龔成老師︰

其實我基本上99%讀者提問,我都會回答。但由於問題眾多,你預要一般都要一星期左右,先至會覆你。

屯門本身位置,跟傳統商區和市區,都有一定隔離,係一個扣分位。不過西鐵開通後,這區及鄰近地區的交通大幅改善,樓價有一定的增長潛力。

未來東大嶼和相關基建發展,令交通和就業方面都會有改善,會利好該區。不過,現時有好多政策都未落實,暫時此區份整體質素仍然只屬一般。

至於股票方面,你要明白一個概念,我地持有一隻股票與否,關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。

小米(1810)和阿里(9988)都有質素,你現時出現帳面虧損,主要係買貴左少少。但佢地都有長線投資價值,你可以照長線持有。

不過,我地唔好成個組合,只集中係1,2隻股票身上。

最重要是建立一個長期的「財富組合」,要優質,要平衡,要適合你的年齡與風險承受程度,新舊經濟各類股都要有。

同一行業不能高於組合30%,同一股不能高於組合15%。要平衡,建立後長期持有,不是買賣賺差價,而是成為你財富組合一部分。

所以,你再有新資金,應先投資其他優質股,以免出現過度集中情況。以下是一些適合你的股票,你可以參考下。

但你現時持有的2隻股票,都係潛力股和科技股類。以你年紀,潛力股最多佔50%好了。新資金你可以優先投入平穏增長股,咁會較平衡。

至於股票班,由於內容太重要,只有實體班,唔會開網上課程。

因為之前實體股票班試過比人偷拍,之後放左上網賣,最後要搞到報海關先處理到,好煩。所以,網上類的教學,都好擔心有偷拍問題,風險太高,因為好多課堂內容,都唔想太公開,只想自己學生知,所以暫時都唔會搞。

其實我會有閒日班和星期六班﹐而且都有補堂機制,你可以睇下夾唔夾到你。

係未能上堂之前,你可以先睇我架《80後百萬富翁》、《財務自由行》和《股票勝經》,都適合初學者。

Q23820:

想問下老師個估值問題,上堂教完估值。如果我係買之前有幫企業做評估,了解佢既業務同埋做估值既話,係佢出左中期/年度業績後發現係幾唔錯/正面,

我需唔需要急於幫企業向上/下調個估值?

例如小米舊年係中期業績後就急升,但亦有好多股票係業績公佈後既股價都冇即時既改變。

咁業績出左後,係咪可以等多一年半載睇多陣間公司發展/方向先再調整都未遲?市場好似未必會因為一份業績而係短時間內有急劇既調整?

龔成老師︰

市場係有機會因為一份業績,而出現估值大幅調整。但所有野最終都要睇翻企業基本面。如果只係中短期正面因素,最終企業都會回到合理值。

你要睇這個正面業績結果,係你估值時預期中的增長幅度,還是優於/遜於你預計。

若是預期中,當然唔洗做調整。但如果係優於/遜於你預期,你就要睇翻個原因,係因為中短期因素,定係長線質素改變左。

假如係長線質素有變,我地就應在估值上,作出應調整。

至於個估值係即時大幅調整,定調整住D先,再觀察。其實好睇個本質改變原因,例如政策而家比某公司,可以做獨市生意,估值就應即時調整向上。

如果係某公司的技術提升,以生產效率有明顯改善。我地可以上調估值,但都要再觀察,到底這個優勢,是否對企業盈利增長,有明顯的正面影響。