華富財經 Quamnet.com Logo
青冰
2019-05-10 05:28:00
貿易戰有冇得大逆轉?

如果將今星期命名為大奇蹟週,大家應該會同意,星期二的哈電(1133)私有化投票前先急瀉後反彈,午後公佈過關後倒升,一來一回折煞唔少小股東,之後連續兩晚的歐聯準決賽,都上演大逆轉,兩支英超球隊在瀕死邊緣回魂,最後仲反敗為勝,這兩天同戰友傾開都話,世上真係冇嘢係冇可能的,今星期守尾關的貿易戰談判,究竟會否出現超乎想像的賽果呢?

按現時侵侵的強硬姿態,及中國商務部及外交部的口硬,相信就絕不可能傾得成協議,在美國時間星期五加徵關稅,似乎是市場共識,執筆之時,人仔離岸價CNH已突破6.86關口,由侵侵出tweet開始,已經累跌2%,市場已經price in傾唔成,所以將重施故技,以貶值來對沖被徵稅,減低影響,如果星期五正式收稅後,雙方口水戰再升級,相信好大機會挑戰年內高位6.98,甚至考驗7元大關。

以上嗰段,就是市場的預期,及以市場行動去反映這個消息,而中港股市,在過去四天亦插完再插,消化這個消息,青冰在專頁也說過,其實現時的貿易戰亂局,跟去年冇乜唔同,如果以侵侵出tweet的頻率及力度,舊年仲勁,但由於今年貿易戰係緩和咗,美國經濟仍不錯,唔再加息亦唔減,中國經濟又冇想像中咁差,市場的樂觀情緒不斷累積,股市升完再升,恆指升了四千幾點,唔少股都升了六七成,抗跌力自然較在25000點時低啦,基金手上的都是獲利貨,見到侵侵又癲,減倉鎖利潤是理所當然。

牌面上,現時市況絕對係落後三球嗰隊,但亦唔係完全冇還擊之力嘅,雖說好大機會加徵關稅,但中國談判團去得美國,斷唔會乜都傾唔到,傾唔到一百項,都可能有二三十項呱,大家傾完出來,講幾句有誠意有進步,其實已經是一個平淡倉的借口,如果侵侵攞完威後,補一句中國都有誠意嘅,好啦畀多最後一次機會你哋啦,咁可能就挾得更急更快。

青冰最擔心的不是唔彈,而是往後的發展,現在睇吓頭幾個月的熱炒概念股,差不多回到起步點,市場領先指標港交所(0388)連250蚊都失守,昨天50隻成份股有47隻跌,最唔想見到的那隻藍燈籠中移動(0941)報升,所以如果今星期,或長假後有逆轉走勢,戰友應該幫自己計下數,又是去蕪存菁,將爛牌打返出去的時候了。

Fb個人專頁 http://www.fb.com/chingbing888