小米(1810)配股及發換股債，共集資逾300億元，同日龍糊(0960)亦批股抽水23億元，而比亞迪(1211)也向中證監申請增發H股，事先張揚隨時批，執筆之時移卡(9923)在上市半年禁售剛完之時，亦急急抽水10億，似乎愈近年尾，大家都求財若渴。
配股集資，是股票市場的最重要功能，實不必妖魔化此舉，作為一介老散，只要你集資後在業務上及股價上生生性性，真係唔介意你批股的，當然基金及機構投資者要求就會高啲，睇你折讓幾多，有冇集資需要，個故仔講得是否動聽。
小米剛在11月尾公佈季績，業績非常靚仔，不過股價不升反跌，現在睇返轉頭，春江鴨應該收到風會抽水了，所以先行獲利。季績內亦睇到小米在第三季末，手持現金有302億人仔，單係第三季，從經營中已獲得122億現金流，可謂絕對唔缺錢，咁三百加三百，現時都有逾六百億彈藥，市傳話管理層想力谷下年手機銷量，所以儲定錢入定零件，不過青冰都唔排除佢哋想搞收購，增強物聯網的實力。
而換股債的條款亦幾特別，是七年期的零息債，仲要以溢價105.25%發行，而換股價係36.74元，較現時股價仲有四成幾距離，持有換股債，其實即係債券加一個認購期權，行使價就是換股價，咁一般情況下，換股價必然比現價高幾成的，但今次有趣在，換股債持有人係收零息，青冰翻查過近半年較大型上市公司發換股債，粗粗地點都有兩厘息，換言之，小米換股債持有人的回報，就係取決於股價表現，如果這七年都上唔到36.74元，這段時間就要蝕機會成本呀。
對小米來說，今次發債都幾著數的，零息啊，但對於債券持有人，表面上就幾蝕底，究竟係咩人咁慷慨呢，但可以肯定的是，他們都是對小米有幾大信心的投資者，目標唔止睇36.74元。不過又要提返戰友，換股債最後都只會兌換成1.8億股，而今次的先舊後新配股部分，係有10億股，所以無論揸換股債的人幾咁把炮都好，批出來的10億股，係隨時可沽的，這個應較影響短期走勢了。
除了小米，相信在年尾前仍有公司陸續伸手，現時港股市場資金充裕，不少股份今年都倍升，青冰想起有位戰友的口頭蟬就係：唔批就笨喇。
--