百威(1876)星期一終於成功上市，雖然係take two，但上到就得啦，過多兩年邊個記得你第一次上市跣腳呢。今次雖然以下限定價，但上市三日表現都唔錯，昨天一度突破30蚊大關，累積升逾一成。

作為近四千億市值的公司，乜嘢主要指數當然都會入，只是時間問題，MSCI及恆生綜合指數，都會在10月16日納入百威，而富時指數，就會在10月9日生效，所以戰友見到呢幾日買盤強勁，都係有原因的，尤其是富時指數，由宣佈至生效，只有四個交易日，指數基金要做嘢會是下星期二，適逢收市競價將於下星期二擴展至所有股票，所以唔好諗住收市前指數基金會狂掃呀，大家識做會在競價時段交波架喇。

而MSCI及恆生綜合指數同日生效，以往係比較少見的，不過，跟綜合指數做嘢的基金屬少數，影響較輕微，綜合指數最大的功用，都係港股通標的股參考，至於是否會納入，還要等上交所及深交所的公佈，由於百威屬綜合指數的大型股，所以算係上交所港股通標的，按經驗就是生效日前的周末，便會有公佈，以百威的情況，99.99%會納入啦，但戰友又唔需要太興奮，咁大隻股，北水即使幾愛，都未必掃得高。

至於染藍，就不是一時三刻的事了，根據恆指公司的恆生指數編算細則，一般股份要上市兩年才合資格，但如果你市值夠大，就仲有一條快速通道畀你嘅，如果市值是全港頭5位，上市三個月就合資格，如是6至15位，就要上市半年，16至20位，便要上市一年，而這個市值，是按上市後每個月結的市值作準，上市6個月就6個月結的平均數，12個月就12個月結平均數囉。先唔講咩平均數，就以現時市值睇，按彭博資訊顯示，3933億的百威，排名14，換言之當你現價企穩，都要半年後先合資格，明年3月就夠半年喇，即係話在5月檢討時就有力染藍。

明年嘅事明年先算，先留意返上文提及的兩個日子，10月8日及10月15日收市後加入百威，換言之指數基金就要掃啦，但另一邊廂，指數基金都會沽出其他股份，大市值股當然會影響返大市值股，你再睇吓現時每天的成交，只得五六百億，成交深度不足，隊低咗個別股份幾巴仙完全唔奇，屆時睇吓有冇機會執到平貨吧。

Fb個人專頁 http://www.fb.com/chingbing888