Q23891：
如果2800,66,1211點睇？
老師，中銀冇3067,2845。有冇邊間證券行有可以推介比我做月供？
中銀只能直接買入3067
如果我每月4000供2000蚊2800,1000蚊1211每月直接買一手3067這組合可以嗎？
龔成老師︰
我都唔清楚，邊一間會有安碩恒生科技(3067)和ＧＸ中國電車(2845)月供。
因為安碩恒生科技(3067)每手金額唔多，你可以自己每月去入貨，都會做到月供效果。
但ＧＸ中國電車(2845)1手成本較高，這個會較難。或者你要一直儲錢，等佢有明顯回調，才去入貨。
不過，你唔好用比亞迪(1211)去代替，因為佢現價比2845仲貴，暫時不值去月供，最好等到$200才開始月供。
Q23892：
早晨！我叫Roy。本人已婚有一位小女孩，現在環境下，期望學習投資 達致財富增值和增添收入來源。因晚上需照顧女孩，未能抽空出席你的投資課程。
所以，想同老師了解下，有何提議/你的其他渠道我可以今日開始進行學習。先感謝你花時間閱覽本人來函
龔成老師︰
我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
我相信你係年青至中年人士，你現時應以增值為主，建議你用「平穏增長股」 + 「潛力股」作組合，去創造一個增值平台。
雖然你現時無投資知識和經驗，對企業估值，點去定平貴未必會太了解。但唔代表你完全唔可以進行增值，但策略上就要調整。
建議你先利用月供模式，去做增值，以減低買貴貨風險，對你而言會較理想。現在你每月先用5成儲蓄做月供。其餘先儲起，用一邊月供一邊儲蓄的策略。
投資「潛力股」係需要一定經驗和有一定波動性，你現時經驗較淺，可以先小注，大約佔組合3成左右，甚至先集中係平穏增長股上。到你係有一定經驗，你可以投資到約5成比重。
至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。
學習方面，你要去多讀投資相關書本、年報，新聞和課程。
書本上，你可以睇我寫架"80後百萬富翁"、"財務自由行"和"股票勝經"，都適合初學者。
而課堂唔係只有得閒日晚上班，我都會間中開星期六班，通常一年開1、2次，星期六下午時間。
下次在2022年年頭。
你或者可以預早留位，只要whatsapp 55457212我同事，打「留位星期六班」就得。我地有具體資料就會 whatsapp。
Q23893：
本人36歲，月入70K，有一物業近期買入值9.8M, 首期2.5M,月供31K
每月可儲8至10K作投資退休之用，另有200K現金，180K人仔定期
股票有:
700 $540 x 200
9888 $ 210 x 100
1337 $2 x 10000
2318 $55 x 500
857 $4.06 x 20000
- 想買收息股，平衡個倉，諗緊3988定1398好?
- 想入一注1833， 但個跌勢好急，入唔入得過?
- 現金要留幾多等機會?
- 2217係咪潛力股? 龔成老師︰
- 其實以你年紀計，算係較年青。我比較建議你先集中在一些有增長力的股票，去累積起一筆資產。
因為收息股主要係創造穏定現金流，但增長力不高，較適合年長人士。
若你真係好想加入收息股，你所講的2隻都可以。現價計，中行(3988)值博率會較高。
- 平安好醫生（1833）長遠有發展力，不過監管因素令佢估值跌左，風險大左，要小心控制注碼，但長遠發展仍是正面。
佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。
平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。
企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。
雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。
因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區中下位。
我唔知佢短期仲會唔會跌，但長線投資價值是有的，不過不確定性高和會好波動。你可以用月供儲貨，如直接買入只能小注。
- 以現時大市水平，現金大約佔組合3-5成。
你現時持有的人民幣，如果無實際用途，我都建議你換回港紙，作投資之用。
- 譚仔國際（2217）不差的，但算不上潛力股。
佢有品牌，有規模，以及有穩定的顧客，現金流強，整體不差的。不過，香港飲食業競爭大，同時入行不難，對是對佢扣分的地方，加上香港人好貪新鮮，因此佢都不能一定話品牌永遠穩固。
睇翻佢資料，譚仔及三哥品牌擁有超過二十年歷史，合共經營148間餐廳，包括覆蓋港九新界18區的72間譚仔餐廳及72間三哥餐廳、中國內地深圳的1間譚仔餐廳及新加坡的3間三哥餐廳。
根據2019年的餐廳數目，調查機構歐睿將譚仔列為香港亞洲粉麵專門店的第1位。
根據佢招股書資料，假設顧客每光顧譚仔100元的生意，食材成本佔22.9元；有31.1元是員工；約23是租金及折舊，扣除其他開支後，譚仔的純利仍有19.7元，扣除所得稅開支後，亦有17.8元的淨利潤，以香港經營食店來說，是高利潤的（不過，數據都是上市前的數據，所以不排除會執靚盤數上市）。
譚仔打算大力發展海外市場，以及中國市場，這會有危有機，如果成功當然潛力不能忽視，但過往不少香港食店打上內地都失敗，因此，存有未知數。
整體上，這企業都有質素，但不能定為最高質類，同時有危有機，這股如控制注碼，都可投資的。
另外，你現時持有的股票，都係有質素。但係中石油(0857)只係商品類股票，產品定價能力不高，所以質素只係中等，不宜持有太多。
你而家太偏重左係潛力股(9988,0700,1337)，佢地雖然有增長潛力，同時風險都較高，不宜持有過多。
你算年青，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。
同時間，你都好偏左係科技股類(9988,0700,1337)。我地組合要平衡，任何企業或行業，唔好佔高於組合15%和30%，以免出現過度集中性風險。
創建組合初期，資金較少，比例超標都尚可接受。但長線，你要慢慢調整好個比重，才算理想。
未來時間，你就要加大翻平穏增長股部份，令組合更平衡。
Q23894：
老師，我在$473購入一手騰訊，見到跌幅達幾十蚊時，就想再入股，我怕我忍唔到手溝貨
你認為什麼時候才值得溝貨？
謝謝老師
龔成老師：
我地決定加注與否，要睇幾個因素，記住，並不是「拉低平均買入價」為目的。
第一，要分析這股的質素，如果無質素，就再跌都唔加。
第二，這股的類別，如潛力或增長或收息類等，是否與你的財富組合匹配，比例是否適合。
第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。
第四，現價是否有投資價值率，要平，或起碼合理，不能貴。
第五，你要在加注後，仍有現金剩。
記住，重點不是「拉低平均價」，而是組合比例與配置。
騰訊（0700），有質素，雖然中短期較一般，但長遠無問題，你有貨可持有，至於是否加注，要睇這股佔你組合%，以及現金情況，如果現金足都可加，你可以比你買入價，跌8%-10%加注。
Q23895：
龔sir，港股今年跑輸美股超過一萬點，美股晚晚創新高但港股都係跌，美股跌港股就大跌，其實港股仲有投資價值嗎？
龔成老師：
短期的確較弱，但長遠會好翻D，當然要睇個別股票，中國、美國，在接下來10年、20年，都是全球兩大經濟體，因此都有投資價值。美股當然不能忽視，但港股不是無價值的。
其實我地投資，不要太著重短期因素，我見有部分投資者，認為納指永遠向上，思維上要小心，其實網指2000年時是5000點，之後大跌，要去到2015年才重上5000點。因此投資者不能只以這刻上升去衡量好與壞。
Q23896：
我之前，入左3800,由3.5入，之後跌，我係唔係要離場呢，不過我都買咗少少，當係學習睇股
龔成老師：
保利協鑫能源（3800）復牌後升翻，主要是業績唔差，同時停牌期間，多晶硅價格上升不少，加上行業對產品一定需求，都令股價反映過往停牌時的利好因素，不過，我對這股有D保留。
佢之前有核數師請辭(雖然已再任命新核數師)，但我對這類股票，會較有保留。
睇翻2020年度業績，收益錄得146.21億人民幣，按年下降24%，毛利37.02億元，下跌20.9%。虧損由2019年度1.97億元，擴至56億元。
到2021年中期業績，盈利約24億元。
你會發現，盈利的波動好大，其實好受多晶硅價格影響，而價格其實可以有好大變動，令投資這股都有風險。
另外，獨立核數師提出關於持續經營的重大不確定因素，不過，並無發表保留意見，算是好轉翻。
這股唔建議你持太多，你可以考慮減持。
Q23897：
你好龔sir, 我今年24歲，人工17000，平時草錢每月都草6000，我買左以下幾隻股，領展5手，煤氣2手，香港電訊2手，兒家都只剩得幾萬，黎緊想買一d潛力股，
見越秀房產近排跌落，但想請問佢大唔大機會升反？
都見到龔sir提到六福集團同完美醫療，仍有興趣購入，但因為我資金唔多，請問我應該首先可以去留意或買d咩股票先？
龔成老師︰
當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。
以你現時24歲去計，相當年青，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。
你早前買入的領展(0823)和煤氣(0003)都係合適，但香港電訊(6823)和越秀房產(0405)只係收息類股票，增長力唔會明顯，純粹用來收下息，唔適合你年紀。
你現有2手香港電訊(6823)，可以照持有，但唔好再加注了。
策略上，你可以投資「平穏增長股」和「潛力股」，去作為增值目標。
你每月5成儲蓄，即是用$3000做月供。其餘先儲起，用一邊月供一邊儲蓄的策略。
如果你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。
若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。
現時大市只是合理區，你現有幾萬資金可以先投入多少少，用"分注"形式，慢慢現時無持有的股票(現有股票暫不加注，以免過於集中個別企業)。餘下資金和每月所儲倒的資金，就等大市出現一定程度的下跌，才大力度掃貨，然後長線投資。
至於六福(0590)和完美醫療（1830）都適合你，現價大致在合理區中上至頂部，你可以入首注。但完美醫療（1830）不確定性較高，唔建議持有太多。
同時間，你要去多讀投資相關書本、年報，新聞和課程。
書本上，你可以睇我寫架"80後百萬富翁"、"財務自由行"和"股票勝經"，都適合初學者。
另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。
Q23898：
龔sir你好，想問一下1931同838點睇？
龔成老師︰
華檢醫療（1931）主要在中國從事分銷ＩＶＤ（體外診斷）產品。
業務波動，加上企業獨特性不強，整體的投資價值只是一般。
現時股價算合理區頂至略貴，回多1,2成才入，值博率會較高。但預期增長力只屬一般，故不宜大注。
億和控股（0838）團主要從事設計和製造金屬沖壓模具；製造金屬沖壓零部件及車床加工零部件；設計和製造塑膠注塑模具以及製造塑膠注塑零部件。
由於佢是TESLA其中一個供應商，因此，TESLA發展對佢都會有正面，但睇翻佢過往業務與過往財務數據，只是一般般，反映企業的賺錢能力，本身不是好強，只是由於TESLA而向好。
但這刻未能完全確定企業向好，加上股價近期上升不少，投資值博率仍未算高。如果投資，只建議小注進行。
Q23899：
龔sir，你好，我幾年前一直開始留意你，第一本書係財務自由行追看到現在，我覺得你無私既分享好好，我同老公都覺得你好真，真心為人著想教我地理財知識，令我地獲益良多。
但係呢幾個月我真係好唔開心，因為買入左隻恒大物業，我高位$16買入，溝左幾次貨之後就用左成副身家，成本價都要$10，我揸住8萬股，而家我好後悔，因為我筆錢本身係首期，
因為好想快啲上車，所以先咁進取，但係而家呢隻股票日日跌，走又唔係留又唔係，我真係唔知點算好，龔sir，請問我可以點算，呢隻股票可唔可以睇長遠？
萬分感謝
龔成老師︰
恒大物業（6666）原本業務不是劣質，但因母公司令佢質素向下。
佢係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。
類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。
佢絕大部分物業管理服務收入，來自集團控股股東恒大集（3333）所開發物業提供的服務。
因此，現時母公司恆大(3333)營運上出了大問題，有可能影響到佢將來獲得物管合約的數量，從而拖累盈利增長。
暫時此股不是零投資價值，不過風險度係高左。
但你最大問題，係太過集中係佢身上。我地投資任何股票都好，一定唔可以太集中。因為就算再優質股票，都有機會出現突發性問題。
個別企業和行業，不要佔組合15%和30%以上，銀行業更加不要高於組合20%，否則會有過度集中性風險。
建議你將部份持股，換至其他同業的優質股，去分散風險。
不過，你先要睇翻首期會係幾時用。因為投資優質股，係一個長線計劃，透過企業自然成長，去達至財富增值目標，所以係要時間。
如果你1-2年內就要置業，你就唔好再投資住，因為時間太短，中短期會有好多不確定性存在。
因此，若你短期要用這筆錢，現時就應開始分段沽貨套現。
相反，你若你較長時間(3年以上)，你可以慢慢換成一些平穏增長股，去增值這筆資金。
Q23900：
老師 3067, 7500 ， 700 及 9988 是否歸同一類行業？謝謝
龔成老師︰
3067,0700,9988都係科技股類別，加起唔好佔組合3成以上，以免有過度集中風險出現。
而ＦＩ二南方恒指（7500）係反向指數ETF，其投資目標係反向追蹤恆生指數每日表現。如果恆指跌1%，你就會獲利2%(另扣管理費)。但若然恆指向上，你就會虧損。
我對這類產品有保留，恆指在過去數10年反覆向上，所以長遠計持有這股對你"不利"，一定多於"有利"。
若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。