今日收市後恒指公司將宣佈季檢結果，青冰在不同媒體都講過好多次，今日唔再講了，但較令青冰意外的是，近日這股W股染藍熱稍為降溫，龍頭ATM明顯無咗動力，尤其大哥騰訊(0700)被美國盯上，短期內難有運行，即使次季業績遠勝預期，都係倒跌收市，操盤最忌同市作對，竟然佢哋要抖抖，戰友亦不妨將注意力轉至其他板塊。
早前提過聯通(0762)有機會在今次季檢被踢出恒指，昨天乘著好業績爆升26%，堂堂藍籌在爆升後今年仲要跌21%，可見被市場唾棄的程度；而近年被視為藍燈籠的中移動(0941)，上半年純利輕微倒退0.5%，不過派息仍然都keep到，以現時的市盈率及股息率來看，已經等於一隻傳統公用股了，沒增長但穩定，但較諷刺的是，最受歡迎的幾隻本港公用股，市盈率都比中移動高，只有電能(0006)的息率比中移動高少少，但專家薦收息股，仍然都係話兩電一煤呀。
中資電訊股雖穩，但並非青冰杯茶，升市跑得慢，係靠個別消息才有一兩日醒神，實在消磨意志，而另一個板塊這幾天表現唔錯，就是內需股，尤其幾隻飲食股表現更省鏡，海底撈(6862)、九毛九(9922)及頤海(1579)，都在本周創52周新高。
海底撈及九毛九的營運在上半年深受疫情打擊，但股價調整幅度都唔算太大，即使兩者都在七月初發盈警，都好快收復失地，而專做火場湯料的頤海更加癲，3月底位是39.2元，現價已經升了一倍半，而北水昨天淨買入兩億元的海底撈，打入北水成交十大，值得留意。九毛九上月在盈警後配股，兩個壞消息齊出，都只是短暫影響股價，加上今日恒指季檢，極有機會被納入恒生綜合指數，換言之亦是潛在北水標的，以北水鍾愛海底撈及頤海的程度，屆時或有一番炒作。
相信未來幾星期板塊輪動會是市場主調，直至騰訊的形勢有好轉，季檢如順利納入兩隻W股，都對氣氛有幫助，萬一只係得一隻的話，科技指數肯定要挨沽了。
--