Q23821：
老師，我跟你意見自己做咗資產負債表及收支表，我今個月由基金本金中取了2.5萬到储蓄戶口，咁需要響收支表度顯示系一個收入嗎？
另外又響储蓄戶口取了2萬投資股票，咁需要當系一個支出嗎？
龔成老師︰
<今個月由基金本金中取了2.5萬到储蓄戶口>
在資產負債表︰
+) $25000 儲蓄戶口
-) $25000 基金
收支表︰
+或-) 投資基金賺取或虧損 (計算你買入和賣出價的差，同時REMARK低，係一次性收益或虧損)
<储蓄戶口取了2萬投資股票>
在資產負債表︰
+) $20000 股票
-) $20000 儲蓄戶口
收支表︰
不是支出，故不用作任何入帳。
Q23822：
老師你好，一直有睇你Facebook, 多謝你的資料。
本人過去遇到裁員，搵工，人工一降再降，現金存款越來越少，想買樓更難，可能根本沒有可能了！𣾀豐股票又坐艇，灰到一個點。
想向你請教怎樣可以極地反彈，本身年纪已大，想做多份兼職又攰，怕影響日間份工！
龔成老師︰
要面對裁員壓力，再加上投資不理想，的確會令人感到氣餒。
但我地要客觀去了解翻件事，現時香港因疫情關係，令經濟放緩。所以，工作和收入受到影響，主要係大環境問題。唔係因為咁就氣餒，或者否則自己的能力。
𣾀豐(0005)雖然有質素，但正如我上次講，佢增長力已大不如前。你預佢主要係收下息，增長力唔會明顯。
中短期個香港以至全球經濟，你預都係會較弱。
而你要做的，就是保持正面心態。同時，唔好比大市氣氛或自己情勢，影響投資決定。
現時要找理想工作，可能會較困難。但換個角度，你可以嘗試一些未試過的新行業，可能會在當中，找到人生的正確道路。加油!
Q23823：
龔sir 你好，之前做了一個很錯的決定。
在大約2年半前 買了一個質素較差的單位，暫時出租，現在還有半年到 就到差3年，很想賣掉這單位 讓我甩身
所以我想請教一下 出賣時有沒有技巧？
獨理放盤 還是搵多幾個代理放盤？
因為該區 一個代理放算 都會搵了很多同行幫手。我買入的價錢較貴 以這質素計 約350萬
當然我願意蝕讓 但開價有沒有技巧 讓對方還價的空間，還是直接 以一個較低市場價錢 嘗試吸引？
謝謝你 ！
龔成老師︰
你可以先找個代理(較有規模，你又覺得有信心的)，比佢可能1-2個月獨家，同佢講之後就會找其他代理一齊放盤，咁一般佢都會落力D。
之後，如果都放唔倒，你就找多幾間代理去一齊放。
價格上，你可以比合理價高少少，等有議價空間。同買家討價還價時，你要比人感覺到你是有條理的人，明確知悉物業優缺點。
同時，唔好比人覺得你趕住賣，否則會影響你議價能力。
Q23824：
龔sir，我今年30歲，我大概兩年半前請教你之後開始月供股票同埋買股票，以下係我既組合，目前投資跟現有可用現金比例為6:4，有幾樣野想請教下。
00002 $78.48 966股
00066 $42.58 1790股
00823 $70.23 1259股
01211 $38.55 500股
01928 $25.81 1200股
02388 $25.20 3476股
02800 $26.61 4942股
09988 $148.24 100股
月供方面2 66 823 2388供2500，2800供4000，目前仍進行中。
- 我慢慢累積左少少投資經驗，我發現中電唔適合我而家既年齡同情況，我打算暫時keep住月供，直到上返$80左右先放出，呢個策略有冇問題?
- 我仲睇中幾隻潛力股心思思想等佢到合理區低位/便直買入，例如1177 285 1810，但係再買一兩隻就會有接近十隻股，會唔會太分散?
- 目前投資左兩年半，想問下以上組合整體如何? 有冇咩可以改善更好既地方? 龔成老師︰
- 中電(0002)增長力唔高，以你30歲年紀，其實不宜持有太多。我建議你將佢換成一隻潛力股，會更適合你。
但因為佢有質素，現貨可以照保留都得，只要唔加注就可以。如果你想減持，你可以分段或者每有反彈就去換碼，唔洗等去到$80。
潛力股︰安碩恒生科技(3067)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。
- 多1,2隻，其實問題唔算好大，只係你定期去審視佢地質素時，可能會辛苦D，因為太多隻。
你所講的3隻潛力股，都有投資價值，現價合理，已可以入首注。
- 你現時月供計畫、持股和股票現金比例，大體上都無問題。
主要係中電(0002)過於保守，另外你可以加大少少潛力股比重，以你年紀佔4-5成都可以。但若你經驗和知識較淺，暫時維持2-3成，等你知識提升後，就再加大翻個比重，咁就可以。
另外，金沙(1928)受續賭牌影響，仍有好多變數。金沙(1928)在澳門有正面的貢獻，從資產質素、澳門發展、就業等角度，佢都做得不差，賭牌好有機會得到，不過，政治因素就是不確定，這點好難準確分析影響是否大。
初步分析，佢得到賭牌會過半，但政治是一些不能預測因素。
要留意，現時賭牌的條款，要求加入政府人員，這無可避免地影響了企業長遠的賺能力，優質度及估值都會略減。
此股長線投資價值依然存在，但風險度係高左，故暫時要控制注碼，暫時不要再加注。
Q23825：
老師你好！本人50歲！早三個月開始月供股票！2388，1382，285，3067，939，每隻1000，這個組合可以嗎？會不會供得太多隻？
龔成老師︰
你所選股票，質素上係無問題，而隻數都唔會太多。
但以你50歲年齡，其實要開始為退休做準備，投資增值係可以，但我建議太進取。
你現時組合之中，比亞迪電子(0285)和安碩恒生科技(3067)都係潛力股類，對你而言風險有少少高。就算想供，要只宜小小注。
你可以考慮保留安碩恒生科技(3067)，因為佢係一籃子科技企業，更有分散風險能力。而且，組合當中都包括比亞迪電子(0285)，可以同時配合到你投資比亞迪電子的要求。
而空出來的每月資金，你可以先儲起，等大跌市出現時，才動用。
Q23826：
龔老師 你好。有以下問題 想請教你，謝謝老師！
本人於2018/01︰
買入 #2628中國人壽
買入價 $26.4
股數 10000
是否可繼續持有？ 還是先沽出 再買入其他？
本人今年43歲
龔成老師︰
我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
你43歲，應以增值為主，中國人壽(2628)係合適的。
不過，中國人壽（2628）增長力唔強。同埋企業的賺錢能力不及過往年代。
相信這股唔會再大跌，但要佢大升都不易，長線持有價值都算有，但暫時唔好對股價有太大期望。
若佢佔你組合較多，你可以有反彈時，就沽出部份，換碼至其他優質股。以下股票都適合你年紀，現價都合理，你可以參考下。
Q23827：
- 您好，成功老師！我以數天時間拜讀了您數本大作，找出了亮點：股票要投資得利，必須找出實力股長揸，看出老師不贊成短炒。
但如果真的想短炒又有什麼可減少風險的方法？如果選出短炒股？
- 老師，2800盈富可以長揸？
係呀，我想入1211比亞迪，現在入會遲咗少少？
龔成老師︰
- 我地做財富增值，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。
你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。
你要分析你的投資目標，你想潛力股的比例多少？平穩股的比例多少？組合風險程度如果？即是你想設計一個怎樣的投資組合？長期、優質、平衡、適合你。
短炒我見好多人都係蝕錢收場，股價中短期一定會有波動。而波動架原因可以同企業本質無關，只有長線股價才會反映企業質素，所以優質股一定要長線持有。
你見全球最賺錢架投資人巴菲特，都唔會做短炒，只會係做長線投資。
所以，你要改變你投資方法，唔好考慮做短炒，並以長線投資優質股為目標，會對你較好。
- 盈富(2800)是包括60間質素不錯上市公司股票的組合，適合你長線持有。現價合理，可以分注或月供儲貨。
至於比亞迪(1211)現價已經係貴，唔係一個入貨時機。如果唔夠貨或無貨，而又想買入，只建議月供，在$200以下先月供較好，但如果真的好想儲貨，同時現金足，現價以小注模式去月供，都可以的。
又或者可考慮GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。
持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。
由於近期不少車股被炒起，此股現價略貴。無貨可以現時入少少，到有明顯回調才再慢慢加注。
潛力度是有的，但會比較波動，如投資宜慢慢分注，可長線。
Q23828：
你好龔Sir，本人三十八歲，冇乜投資經驗，同太太加埋有二百五十萬現金，喺幾日前首次買咗5000股銀娛，買入價$41.6，請問現在適合再加碼買入其他股票嗎？
我同太太想運用呢舊錢喺五年內買將軍澳區嘅兩或三房，但唔想借銀行太多錢，策略上我哋可以點做。謝謝你可以解答我疑難
龔成老師︰
由於隔離你置業，尚有5年時間，你可以利用這筆資金，去進行增值，增加置業本錢。
建議你用「平穏增長股」 + 「潛力股」作組合，去創造一個增值平台。除了這250萬，最好你再利用每月儲蓄，去做月供股票，加大個增值效果。
現在你每月先用5成儲蓄做月供。其餘先儲起，用一邊月供一邊儲蓄的策略。
「潛力股」係雖然增長潛力較高，但同時風險都較大。你現時無投資經驗，只宜先小注，大約佔組合2成左右好了。到你有較多經驗和知識，才慢慢加大比重至約4-5成。
現時大市只是合理區，你現有250萬資金可以先投入50-70萬，用"分注"形式，慢慢買貨。餘下資金和每月所儲倒的資金，就等你知識較多，或大市出現明顯回調，才慢慢加大注碼。
另外，銀娛(0027)受續賭牌影響，仍有好多變數。銀娛(0027)在澳門有正面的貢獻，從資產質素、澳門發展、就業等角度，佢都做得不差，賭牌好有機會得到，不過，政治因素就是不確定，這點好難準確分析影響是否大。
初步分析，佢得到賭牌會過半，但政治是一些不能預測因素。
要留意，現時賭牌的條款，要求加入政府人員，這無可避免地影響了企業長遠的賺能力，優質度及估值都會略減。
此股長線投資價值依然存在，但風險度係高左，故要控制注碼，暫時不要再加注。
到你要買樓前1至半年左右，就開始慢慢分段沽貨套現。唔好等到用才一次過沽，因為無人知當時個市況係點樣。所以，你要分段沽貨，去平衡價值波動的風險。
Q23829：
龔sir，我聽哂你之前分享比亞迪心理質素13分鐘嗰條片，好正，好中，心理質素要強！
身邊真係好多人閒言閒語，就好似我媽同我啲同事，不過佢哋有時都出於好心嘅，我就係揸緊吉利，我有幻想過佢會好似比亞迪咁勁，我開始叻喇，因為$12.5買$15.8放，之後$16.x買$19.x放，到而家買完升到$36再落返$15.x之後再多次上上落落我都無放。
之前都問過你，靠你俾咗支強心針我，我而家始唔係成日睇佢，雖然話唔睇，但佢又真係唔係幾爭氣囉，長汽好似仲勁過佢，心理質素都未做到你嘅境界，龔sir,你會唔會買吉利?
龔成老師：
一般人只是散戶思維，如果我地要賺大錢，就要學巴菲特思維，睇「企業長遠」，而不是「當刻股價」。
吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。
長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。
另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。
這些動作不單有利佢有中國發展，同時長遠，可能加快了海外發展速度。因此，這股長遠仍是正面的。
這股可長線，但我暫時不會投資。雖然都有發展前景，但不會去到比亞迪的狀態。
Q23830：
老師你好，想問邊隻收息股最值得買？
龔成老師：
你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。
另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。