華富財經 Quamnet.com Logo
青冰
2019-10-25 01:36:00
兩大主題為巴巴鋪路?

所謂的股災月,已經來到最後5個交易日,市場最擔心的貿易戰及英國脫歐,雖然兩者都未有最終定案,但以現時的發展,應該都是向著較好的方向推進,恆指9月底收市約26000點,至今仍然有近800點升幅,唔算太巴閉,但總算托賴,而十月的兩大焦點,是新股及新經濟股,如果戰友有參與過,相信皆有斬獲,不過近呢幾日,由氣勢如虹變成開始洩氣。

先講新股,計埋今日的登輝(1692),已經有19隻上市,留意返10月至今只有17個交易日,的確係旺,而更癲嘅係,升幅驚人,魯大師(3601)首日收漲2倍,為熱潮加添滾油,之後的全部暗盤起碼升三成,正式上市時更有幾隻升夠一倍,雖然最後氣力不繼,但戰友只要肯抽肯走唔追貨,袋袋平安應無問題。不過快餐帝國(1843)開市升八成,在一小時內瘋漲至187%,再用了45分鐘由倍升變倒跌,散水之快令人咋舌,收市跌16%,昨天暗盤的登輝,雖然超購270倍,但暗盤潛水兩成,令新股市場響起警號,下星期一上市的亞盛醫藥(6855)超購近700倍,未知下場是否相同。

在2017及2018年上市的新經濟股份,命運都是差不多,由九層樓跌落嚟,亦跌咗好耐,今月由龍頭美團(3690)帶領,佢自己升兩成,而其他師兄弟升幅至少都有三成,說也奇怪,新股就話有十億八億可以煲起,但新經濟股份市值幾百億,要推動佢哋絕對需要資金,但只要睇吓大市成交,整個10月都冇一日係過千億成交,又諗吓新股熱潮,都長期凍結了二、三百億,真係錢從何來呢?而又好巧合地,新股開始洩氣穿底時,新經濟股亦從高位急回一成以上,十月將盡,兩大主題是否都同時落幕呢?

新股旺,新經濟股旺,其實是製造了一個良好的環境,迎接超級龍頭巴巴回歸,可能戰友都忘記了,這個傳了近半年的事,由傳聞第三季上市,再傳集資額減半,慢慢變到冇人提起。但內地政策嘅嘢,遲了並不代表擱置,回想港股通納入同股不同權,是去年12月已傾好,當時係話今年下半年開波,去到五、六月時,直頭吹到七月就會納入,結果一拖再拖,十月又忽然間落實,下周一生效,青冰早幾個月在文章講過,港股通落實納入同股不同權,是巴巴回來的先決條件,因為回歸港股,不只是為了香港,也是為了同胞有得買,現時打通條路,只要貿易戰不出亂子,或許未來兩個月就是時機了。

-- Fb個人專頁 http://www.fb.com/chingbing888