華富財經 Quamnet.com Logo
青冰
2019-01-11 01:08:00
減持電能有後著?

昨天長江基建(1038)公佈,減持2%電能(0006)股權,每股作價52.93元,套現23億,減持後,長建仍持7.67億股,即35.96%電能。消息都算係比較突然,市場有點錯愕,瑞銀引述管理層話減持有助降低負債比率,未來將更有條件進行併購活動。

長建現時手持96億現金,長短債共300億,咁套現了23億,其實對減債作用係咪咁明顯呢,多咗23億會唔會幫助併購呢,作為一間市值有1614億的公司來說,相信戰友都應該明白,所以管理層所說的話,就同普通公司賣嘢後話會撥作一般營運資金,本質上應該一樣,都是廢話。

電能在2014年分拆港燈(2638)上市,套現後現金多到滿瀉,有六百幾億,但電能之後無即時派特別息,令市場失望,最後拖到2015年,長建宣佈以換股方式私有化電能,成事後會派5蚊特別息,股東表達不滿後輕微加價,換股比例提高2.5%,特別息加碼至7.5元,咁手緊的方案,最後落得失敗收場。之後2016年兩次業績,對小股東都冇表示,但失驚無神在2017年1月,非公佈業績的時候宣佈派5蚊特別息,殺市場措手不及,最近兩年合共派了18.5元特別息,等值接近400億,而長建就收到當中154億。

現時電能持有現金及投資約70億,再豪派的機會唔大,去年上半年盈利有41億,當中22億是來自英國,澳洲亦有約8億的貢獻,相對於從港燈攤佔獲取的3億幾盈利,其實現時最影響電能的,可能是英國硬脫歐喎,按半年業績所述,電能的貸款主要為澳元計值,所以現時研究電能,不能仲抱著舊思維,以為香港電力市場對佢好大影響,而忽略了英國及澳洲業務的重要性。再講,電能現時持有港燈33%,國家電網持有21%,卡塔爾投資局持19.9%,兩個外人加埋仲揸得多過佢啦。

好喇,扯到咁遠,又講返單減持,青冰不會妄自猜度霍大班及Victor的用意,反正無咁易估到,但有幾樣嘢就要知清楚,減持之後,私有化電能的可能性大減,如果真係想套現,應該要再大手啲沽,23億實在太濕碎喇,斷估亦唔會咁蠢分幾次沽吧,以為會愈沽愈高價咩。最後只有老套地總結,Victor應該有後著,拭目以待啦。

Fb個人專頁 http://www.fb.com/chingbing888