Q24171：

龔sir，你好，想問下你點睇1337雷蛇？是否值得長線投資？如值得長線投資，幾錢入為之合理價錢？

龔成老師：

雷蛇（1337）有潛力，但本質好波動，盈利不足，所有的市值，都只是基於「將來預期」去產生，這個預期可以變得好快，因為大家都只是「估」。

同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。

另外，佢近年都有發展一些新興業務，潛力度有的，但仍左有不確定性。

因此，這股有前景，但有風險，無人知真正的價值。而佢另一些業務較是較新興，同樣有危有機類，所以，佢有可能有潛力，但風險方面就要注意。

Q24172：

龔sir, 我想問下 現時買樓自住風險大不大？ 家人怕近年樓價會大跌，不知道龔sir有何建議

龔成老師：

最重要是睇你有無自住需要，以及是否供得起，比起分析樓價走勢，你自己的情況會更加重要。

我認為香港樓，長期會向上。

首先，我用身邊的朋友去分析（因為佢地都是適婚年齡的），我見到一個現象，唔少朋友結婚後，買唔到樓，要同父母用住，這幾年都係咁，而且人數不斷增長。

佢地正在儲錢，正在等樓價跌，只要在適當時機，就會搬出去住，你知道這是甚麼？這就是潛在的購買力，而且不斷累積！

香港樓長期供應不足，需求正不斷累積，這將會令樓價保持向上，跌少少，又會升過。

另外，你要明白，樓是資產，現金不是真財富，所以物業長期一定向上，中間會有上落。這是財富系統最典型的模式，詳細概念你可以睇《財務自由行》，當中會話你知，點解資產長期一定升，現金一定跌。

當然，香港政府將會增加供應，令樓市有可能波動，但相信未必大跌，最多只是令長遠樓價的升幅，不會太大。

Q24173：

老師你好，想問8391基石科技控股

龔成老師︰

基石科技控股(8391)主要於香港提供商業印刷及財經印刷服務。

集團規模好細，業務性質都無太大獨特性。見佢過去幾年，營業額一直滑落，多年來都處於虧損狀態。

初步睇，唔見有明顯投資價值，建議你沽出。

Q24174：

龔成老師，我有入阿里巴巴同小米，唔係高位入，中間有溝過貨，但兩隻股價越跌越低，到底我應唔應該再溝貨好呢? 好迷茫呀！

麻煩老師解答，謝謝

龔成老師︰

我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

睇翻2隻股票，雖然近期回左唔少，但投資價值依然存在。

小米（1810)近期受全球經濟疲弱、晶片緊張等因素影響，令佢出現較大回調。不過，長線本質未見有明顯變差，依然有投資價值，現貨可長線持有。

阿里(9988)受政策風險影響，風險高左。雖然都係有投資價值，但暫時不宜持有太多。你預要等佢慢慢適應現時個市場和政策轉變，才會慢慢變好。

Q24175：

龔成老師，請問#9988 長缐持有的建議是否仍然不變呢？萬分感謝！

龔成老師：

阿里（9988）業績差，相信阿里中短期仍較弱，但股價已到合理區中下的水平。阿里質素比過往略減，但不是無質素的。

阿里巴巴第二季度收入同比增長約3成，而純利逾53億人幣，同比跌8成，非公認會計準則淨利潤285億元，跌4成。

盈利大跌，其中一個原因是上年度同期，有較多投資收益（投資在上市公司，股價上升帶來會計上盈利），如果以較反映經營層面的數據分析（即是不考慮會計、一次性相關因素），盈利下跌約4成，這個數字，當然是不理想，其中一個原因是支出增加，反映行業競爭加大，同時，增長力減少。

另外有一點值得投資者留意，該集團指，調整2022年財政年度的總收入指引，預計2022財政年度的總收入同比增長為20%-23%（而過往預期是30%）。

以最新的業績，以及阿里收入的收入修正，相信中短期的經營環境，仍會較一般，投資者要明白短期股價波動，但長遠來說，阿里始終本身有優勢，慢慢能適應新經營環境，現時股價處合理區中下部，因此仍有長遠投資的價值。

如果你持貨過多，可能就減少少，但如果不過多，仍可守住先。

Q24176：

1772之前買在太高位

現在龔sir也會建議小量入場攤平成本嗎？

龔成老師：

贛鋒鋰業（1772）是潛力股，但估值較難，分析時的確資料較少。由於上市年份少，我地較難有長期數據分析。

佢為鋰化合物、金屬鋰及鋰電池等鋰資源生產商，業務涵蓋上游鋰資源提取、鋰化合物深加工、金屬鋰生產、鋰電池生產及鋰二次利用及回收。集團提供涵蓋五個主要類別逾40種鋰化合物及金屬鋰產品。

其實佢的產品應用都廣泛，包括電池相關產品、化學品、藥品及新材料等，而客戶主要包括電池材料公司、電池製造商、化學品製造商、製藥公司及電子器件製造商。產品主要於中國、韓國、日本及新加坡等十多個國家出售。

我相信佢長遠有潛力，有長線投資價值，問題只是平貴度的問題。現價略貴，小小注好了，之後等佢回落先正或入，始終行業有一定的變化。

Q24177：

啊sir!! 上完你整個股票班 想講多謝你最後五分鐘嘅personal sharing！

我自己都係個無任何父幹 不過好彩都唔叫有負擔， 可能已經好過好多人

同齡朋友買晒樓 當然係父母比首期 有時灰灰地覺得好似比人搵少咗幾十年錢 打緊hard Mode

不過諗返 其實我覺得自己都過得還好嘅 但當然可以再好啲

其實 信念真係好緊要

好似畢咗業出嚟做嘢幾年 信念好似越嚟越無 所以你最後幾分鐘係個很好嘅提醒

等我隔多陣再返嚟睇下呢個message 先

希望自己都會係隻潛力股！

龔成老師：

加油！每個人都有佢的目標及想做的事，而成功與否，好多時是我地的堅持。

有時生活上的壓力，可以成為我地進步的動力！

首先，要相信自己，另外，要堅持！

希望你保持著一團火，要自己不斷進步。

我期待你完成更多目標同我分享，加油！

Q24178：

龔sir,我是你的學生，有個問題想請教

因家中有變，家人過身後，留有一筆大約100萬的資產給我，而本人小孩剛出生，另屋企有兩個物業，一層供滿，一層尚欠90萬mortgage.

今年投資失利，已輸10幾萬，好像沒有信心再投資下去。

或者我應該買完股票唔好太在意睇，以免被股價，現在只持有小量股票

2382 $209 400股

669 $156 500股

美股 voo 50股

請問應該點樣處理自己既情緒再出發，或者老師有咩意見，先多謝你

自己好想將屋企人既錢增值，唔想敗係自己手上，想可以將資產留比個仔

龔成老師︰

睇翻你以往投資的股票，質素上都無問題，可長線持有。但不少買入價都偏貴，相信係你虧損的主要原因。

你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

只要隻股票係有質素，唔好太多意中短期波動，因為佢實際價值，必然會在長線體現出來。

如果你自問無信心，控制到個情緒，最好就係唔睇股價，由佢長線持有。當然，大前題係要這些股票有質素。

這100萬，我建議你先扣後部份，作為生活上的應急資金，其餘才用來投資。

但由於你定平貴能力未算掌握得好，我建議你分注去入貨。例如將資金分成3,4注，現價先入一注。只後每回調10%左右，就再去加注，直至資金用完。

以下股票，都係適合你年紀，你可以參考下，再慢慢去儲貨。

Q24179：

老師～ 我就黎上完你的初班，想問下如果日後想做年報分析。

你會建議我從簡單的優質企業開始（你可以推薦10-20間企業給我做練習嗎？）

還是從我現在持股的企業開始？（我會較有興趣，但科網股多，可能較難）

唔該老師

龔成老師︰

我會建議你最少先做2,3隻簡單的，先去掌握好個技巧。

之後，你才再按自己興趣，或者想審視的股票，再去進行分析。

頭幾隻股票，你可以考慮一些行業較簡單，或者堂上教過的股票，咁你會較易掌握。好似六福(0590)、福壽園(1448)、領展(0823)、陽光(0435)、莎莎(0178)等。

科網股唔係唔得，但佢本身較複雜，加上係較波動的潛力股，係分析時需要加入更多調整元素，初學者用來做練習，可難會有點難。

Q24180：

sir,我屋企人轉咗匯豐股票比我，叫我幫佢看管或任我處置，想你比d意見

1200股 $80買入

800股 $58買入

我應該買出後入港燈做收息好，還是一半水桶1一半水桶3？

我嘅步驟應該係點行，謝謝

龔成老師︰

首先，匯控(0005)增長力差左，但都算有基本質素，是一隻值得持有的收息股。但如果佢全個組合只得匯控(0005)，就太過集中，必需調整。

個別企業和行業，不要佔組合15%和30%以上，銀行業更加不要高於組合20%，否則會有過度集中性風險。(盈富由於係一籃子組合，故不受此限。)

另外，要再考慮佢地年紀。如果佢地係中年人士，尚有5-10年才退休，建議將部份換碼至平穏增長股，作適度增值。

若你家人已經近退休之年，甚至已退休，就應集中係收息股，去創造現金流，支援退休生活開支。

你可以睇翻佢地人生階段，去幫佢地調整組合。

可投資平穩增長股+收息股，以收息股來說，可考慮：

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

至於換碼操作，你只要盡量同時間去一買一賣，咁就可以。