新嘅一年只是兩個交易日，但唔少股份已經跌逾一成，藍籌股有四隻，分別係吉利(0175)、舜宇(2382)、石藥(1093)及中國生物制藥(1177)，加埋隻跌9.7%的瑞聲(2018)，以上的股份可算是兩年慢牛的領袖股，亦是最近三年內加入成份股的。除了吉利之外，其餘四位的市值已跌至五百至六百億，如果未來半年都冇起色的話，好有可能會見到一兩隻被剔除呀。

當中年資最淺的是中國生物制藥，在9月10日正式加入恆指，仲未夠4個月，但竟然可以極速跌了49%，記憶之中應該是破紀錄之快，雖然思捷(0330)、電盈(0008)、富智康(2038)及利豐(0494)這些前成份股都累跌9成，但都未試過身為藍籌期間4個月跌一半吧。

青冰明白藍籌跌到咁殘真係好吸引，始終「藍籌」兩個字係有光環的，但只要開個圖出來睇吓，都會見到樓上蟹貨區重重，相信短期內只會有零星的挾倉，真正的轉勢，似乎未有耐啊，蘋果剛剛才下調第一季盈利預測，按理唔會過一兩個月就話轉為樂觀，至於醫藥股，恕青冰不懂分析國策了，況且近來的消息仲係藥太貴，不用分析都知冇運行。

昨天共有144股創新低，而只有5股創新高，這個懸殊對比的確近月少見，最弊嘅係，創新高那5隻都名不經傳，創新低那些卻是熟悉的面孔，例如恆生(011)、周大福(1929)、華潤啤酒(0291)、長和(0001)及平保(2318)等等。現在最硬凈的就餘下中電(0002)、煤氣(0003)及領展(0823)，不過講真，佢哋的息率都只是2至3厘，現時在龍頭大銀行匯豐做定存，已經有約2.2厘，究竟傳統最強的收息股，係時辰未到，還是繼續以避風港的身份挨過，拭目以待。

講咗幾百字利淡文字，又唔需要太擔心嘅，2019年只是剛開始，青冰不會相信可以跌足一年，即使2018年係好差，仍然在4至6月有短暫小陽春，在11月也曾先破底後急彈，所以不用看得太悲，用輕鬆的心情及倉位去等待時機吧。

Fb個人專頁 http://www.fb.com/chingbing888