Q24361：
老師我係你學生，想問下世茂813，因為三條紅線完全踩不中，但股價卻像恒大般大跌，所以想試一試研究它的財報。
上進階班時你講過要小心物業重估的部分，
1.是否在收入部分要減去「投資物業公允價值收益」？
2a 資產部分，「以公允價值計量且其變動計入其他全面收入的金融資產」及「以公允價值計量且其變動計入損益的金融資產」，兩者有甚麼分別？
2b兩者在又是否要在資產中減去？
其實世茂的財報雖不算內房中最優質，但因為最近內房的氣氛和它的負面新聞（疑似違約，加大融資，配股）而導致現今的低位，會不會又是過份悲觀呢？
在21年中期報告中，現金及現金等價物就已經比現時公司市值為高，單純報表上已經十分便宜。
3.不過市場認為世茂有隱藏債務並未於報表反映，我們有沒有方法可以分辨判斷呢？
謝謝你
龔成老師︰
- 要，因為佢係會計數字，而非真正收入。
2a) 其實係會計上，將不同資產進行分類。係做分析時，重要性不高。
2b) 要，佢地同物業重估都類似，純粹係資產價格上變動，所造成會計數字。
雖然世茂(0813)條數睇落，未至於最壞的一間。但你要明白，這些都是帳面數字。有一些隠藏數字，我地係未必睇到。
單從表面數據分析，佢負債水平已經係唔理想，令投資價值大打折扣。加上現時內地樓市放緩，對佢都有好大影響，有機會因周轉不靈，而出現資金斷裂問題。所以，暫時不宜持有太多。
- 其實係無一個方法，可以100%發現到佢隱藏債務。但我地單從佢現有數據，已經足夠判斷，這樣企業存在資金斷裂風險。
你見現時爆出隱藏負債企業，本身面個盤數，都已經見到佢有債台高築。你好少會見到一間企業，負債水平理想，但背後郤有足以令佢倒閉的隱藏債務。雖然有機會出現這樣個案，但相對較少。
所以，透過現有資訊，某程度上都可以判斷到企業負債風險。
Q24362：
阿sir. 我依家23歲，存款50萬，我想囉10萬買移卡，10萬買小米，30買收息股，我冇投過資既經驗，所以想請你指點下我
龔成老師︰
當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。
以你現時23歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。
策略上，你應先集中投資一些較有增長力股票，去先累積好一筆資金。到足夠你財務自由時，才換成收息資產，去創造被動現金流。
因此，我唔建議你用收息股為目標，佢地增長力太弱，唔適合你年紀。至於小米(1810)和移卡(9923)，係可以。
但移卡（9923）是有風險，有潛力的類別。睇翻佢的財務數據，增長快速，但業務變數大，行業有不確定性，唔建議大注，最多佔組合5%好了。
未來時間，你可以用以下「平穏增長股」和「潛力股」，作為投資目標。
除了現有資金，建議你都將每月儲蓄，去進行月供股票，去加快你累積財富速度。每月先用5成儲蓄做月供。其餘先儲起，用一邊月供一邊儲蓄的策略。
你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。
到你有一定投資知識﹐潛力股比重可以相應調高，佔組合約3-5成，視乎你當時投資知識多寡和了解這些股票程度而定。
現時大市只是合理區，你現有50萬資金可以先投入10-15萬(小米你暫時預用2-3萬先)，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。
除了透過以上方法，去累積資產外。同時間，你要去努力增進投資知識，來提升你財富增值效果。你要多讀投資相關書本、年報，新聞和報讀相關課程。
書本上，你可以睇我寫架《80後千萬富翁》、《財務自由行》和《股票勝經》，都適合初學者。
另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。
Q24363：
你好成哥，本人有以下持股，想知道係咪方向正確。
ASM 522 @1 $81.2
中遠海控1919 @1 $11.98
呷哺520 @1 $6.227
特步國際1368 @1 $10.64
三星FANG 2814 @1 $23.8
安碩恆生3067 @1 $13.95
中生制藥1177 @1 $5.61
阿里爸爸9988 @1 $178.6
小米1810 @1 $21.1
另外，因為有左小朋友，我自己上年年尾買左樓，太太做擔保，月供要1萬7，我自己月薪是3萬2，主要供樓係我出，現金做哂首期沒剩係手，每個月都拮据。
我自己目標係想買多層樓既，好似沒咩可能。而家只係希望再過幾年近親轉讓層樓俾阿哥回覆首置，而同時間黎緊幾年自己薪金上漲同太太聯名買另一層。
計劃還計劃，人生好似就咁挷死左，有啲灰，唔知仲有咩其他出路？請指教
龔成老師︰
物業都係一個資產，長線你再加入一個物業，其實係可以。
但你唔需要太急，最好相隔數年，以平衡價值變動風險。現時你要做的，就是將新資金，優先投入股市，去進行增值。
你現時持有的股票，都係合適的。未來時間，你可以利用每月儲蓄，透過月供股票去累積財富。
策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。
如果你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。
若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。
餘下的另一半現金，我地就等機會，當大市出現較大回調，就加大力度掃貨，然後作長線投資。
Q24364：
老師，請問你認為，6699時代天使如何？粗略分析過認為佢行業有獨特性同自己研發技術，好似有投資價值。但現價會略貴嗎？
另外有冇咩App係你推介睇股票資訊比較好，我而家用AASTOCKS睇
剛上左你第一堂同朋友有分享少少，發覺大部份人對長期持有股票呢個concept都係唔接受，大家都係想賺差價，認為長揸係cap著哂d$，
希望我努力証明到比佢地睇長期持有呢套係work既
龔成老師︰
時代天使科技（6699）有質素，長遠仍有發展力。
佢係中國的隱形矯治解決方案提供商。根據報告，市場份額4成。
這企業透過時代天使隱形矯治系統在整個隱形矯治過程中助力牙科醫生，其由關聯的三部分組成：數字化輔助案例評估支持及矯治方案設計服務；隱形矯治器指用於治療錯頜畸形的可移動、透明塑料材質牙套；雲服務平台iOrtho使牙科醫生可在整個治療過程中進行下達訂單。
佢目前銷售四種隱形矯治器，包括時代天使標準版、時代天使冠軍版、時代天使兒童版以及COMFOS。作為隱形矯治系統的核心，集團自研技術及數據平台，即masterForce、masterControl及masterEngine。
佢通過持有第二類醫療器械經營備案憑證的全資附屬公司向醫院及牙科診所直接銷售大部分服務及產品。客戶包括公立醫院、私營牙科診所及分銷商。
企業發展正面，過往的生意及盈利都有理想增長，不過，現時估值都唔平，要注意如果市場估值出現修正，股價可以出現下跌。
整體來說，企業發展正面，但現價就唔平，投資值博率只是中等。
至於APPS，我都係用AASTOCKS。同埋，我都係上網睇多，好少用APPS睇。
好多散戶「賺錢」的思維，都是追求實在的現金，認為要賣出賺到現金，才是賺錢，但我地最重要是講求「財富最大化」。
你試想下，如果比亞迪(1211)也好、騰訊(0700)也好，你用賺差價架模式去操作，係唔會賺到數10倍回報。所以，我經常講優質股要長線持有，就係咁架原因。
係未來架課堂，你會對投資這件事，有更深入的理解，到時你會更明白，點解要咁做。
你見全球最賺錢架投資人巴菲特，都唔會做短炒，只會係做長線投資。所以，你以長線投資優質股為目標，係一定係有利。
Q24365：
Halo，呀Sir～有以下問題我想問問你
30歲，一個月儲到15k，跟你儲錢方法已經成功有100萬啦
呢家持有50％股票同50％現金
原本每月月供股票8000，
2000 銀娛
3000 盈富
1000 領展
1000 小米
1000 1177
- 有每2個月入1次 3067
- 想問問老師銀娛潛力度還有嗎？還有得發展嗎？想潛力大d應否調低月供金額轉供其他
- 如果改成下面組合可以？ 1000 銀娛
2000 盈富
1000 領展
1000 小米
1000 1177
- TOTAL 6000
- 繼續每2個月入1次 3067
- 每2個月入1次美股C(如用銀行手續費就可能考慮3個月先入1次)
- 聽人用Ib買美股，係咪安全呢？ 4.最後，可否問你美股c係幾錢入。如不方便公開可否只係度講。謝謝
龔成老師︰
- 先恭喜你，獲得首個100萬。
你現時現金和持股比例，係可以。你等個大市再回調，就慢慢加大持股比重，咁就可以。
銀娛(0027)受續賭牌影響，仍有好多變數。銀娛(0027)在澳門有正面的貢獻，從資產質素、澳門發展、就業等角度，佢都做得不差，賭牌好有機會得到，不過，政治因素就是不確定，這點好難準確分析影響是否大。
初步分析，佢得到賭牌會過半，但政治是一些不能預測因素。
要留意，現時賭牌的條款，要求加入政府人員，這無可避免地影響了企業長遠的賺能力，優質度及估值都會略減。
此股長線投資價值依然存在，但風險度係高左，故暫時要控制注碼，不宜持有太多。因此，如果你已有一定持貨，例如已佔組合近10%。你最好就停一停，暫時供另一隻先。
唔係話佢無左長線投資價值，但始終不確定性高左，控制翻個注碼，會較為穏當。
- 這樣都可以，但美股C個風險真係好高。因為佢受加密貨幣市場影響，同股市好唔同。加密貨幣市場係可以一日上落20-30%。
所以，你就算係儲貨，都唔好儲太大比重，始終係高風險項目。同埋你預係超長線投資，等個市場慢慢成熟，從而享受當中成果。如果你過度關注佢中短期價格，你會好易放棄。
-
IB暫時睇都可以
-
至於持有價，我一般唔會特別去講，以免影響左大家，因為每個人有資金和風險承受力唔同。
我會用翻一般估值，去等同學自行判斷，那個價位才適合自己。
我唔係想收埋個持有價，唔比大家知。但係咁樣做，會對你地係最好，希望你明白我意思。
如果以現時的交易量計，跌10%-15%就算較合理。
但正如文中所講，佢的平貴是極難計的，因為只是加密經濟大幅向下，所有價值都無。相反，加密經濟大好，現時當然便宜。
Q24366：
老師，想問︰
永利
小米
阿里爸爸
因本身公司本質是沒問題，主要外圍因素影響股價，我看怎樣3年後都會升吧，認同嗎？
此3行業中，現入貨風險大嗎？ 相對應該阿里較難估其政策風險是不是
龔成老師︰
這3隻股票，有長線投資價值。
但永利(1128)受續牌影響，阿里(9988)則受政策風險影響，不確定性都高左。
因此，這2隻股票暫時不建議持有太多，雖然長線依然有佢地架投資價值，但始終風險係高左，要控制注碼，再觀察未來發展。
現價3隻股股票都在合理區，如果你好少貨，係可以加注。但緊記永利(1128)和阿里(9988)，暫時要控制注碼。
Q24367：
龔成老師你好，我在20.4時候買入了1810 小米 。但見近期它有跌幅。你覺得暫時佢嘅前景如何？呢個狀況會維持幾耐呢？
同前排我常試做護膚產品代理，暫時只在IG開切了個ACC 放D啲before /after 相片出來和寫用後感覺，未實質運作。感覺要做多啲research準備。
但係未有頭緒應該點樣增加曝光率！
龔成老師︰
小米(1810)前景依然係正面，但近期大市和環球經濟都較弱，你預佢中短期都會較波動。至於維持幾耐，無人知，長線持有就可以。
其實長線要做得好，重點係你點樣令你架產品和服務，令你客人感受到有增值能力。點解要用你，唔用其他。
IG係一個可用媒介，但文字唔好太多，因為IG文化著重睇圖。重點係你要諗，點樣係個2,3秒，就能停住客人眼球。
你可以參考下一些成功同業，睇下人地點做，自己再作修正。
Q24368：
如果雅居樂債務攪唔掂，3319會如何影響呢？
龔成老師︰
由於雅居樂(3383)和雅生活(3319)係2間不同公司，財務上唔會有直接影響。
但物管股主要收入，來自物業管理。而這些物業很多都從母企中得來，所以母企發展弱左，物管企業都會受影響。
現時內地房地產市場有明顯放緩情況，特別係住宅類。不過，雅生活較其他物管股，相對業務分散，有住宅類之餘，也有不少商用、公用項目，分散風險能力較強。
而且，過去數年集團都不斷開闢母企以外業務，現時母企物業管理的比重，跟同業相比係偏低，所以受母企影響會較輕微。
不過，點都會有D影響，你預佢中短期都會較弱，但長線係看好的。
Q24369：
老師你好，早晨，想問問，我最近想月供股票！之前都有月供港鐵，盈富基金，匯豐，供左2年，依家想加多一隻，因上面3隻呢2年都無咩氣色，
想再供多一隻1000至2000倒，想儲錢同埋升值，呢隻想風險大小小，如果恒大汽車（0708）同耀才證券（1428），選擇邊隻好？
龔成老師︰
這2年，其實成個市場氣氛都一般，所以不少股票都無乜增值，係正常。你現時月供的股票，都係可以照進行。
至於新加一隻，恒大汽車（0708）同耀才證券（1428）我都不建議。前者風險太高，不宜作為月供目標。後者質素只係中等，不太建議儲太多貨，故不太適用於月供。
你可以睇翻你自己年紀和風險取態，去選擇以下股票。
假設你係年青至中年人士，應先做好增值，我一般建議用「平穏增長股」 + 「潛力股」。
但如果你中年至近退休人士，或者想保守D，你應該用「平穏增長股」 + 「收息股」的組合。
收息股︰港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。
Q24370：
-
Interactive brokers如何？
-
見到新聞，滴滴出行在退出美國 改來香港上市
會幫助刺激到的士牌嗎
龔成老師︰
-
IB都算安全
-
滴滴出行（DIDI)退出美股，暫定回港上市，但一切尚未落實。
而且，佢只係股票在香港掛牌，業務上無任何轉變，故不會對香港的士牌有直接影響。