來到年尾總會有很多來年的預測，青冰習慣上都會all skip，查實大家真係相信有人可以準確估到下年個市點行嗎？現時搵資料咁方便，大家不妨找找去年12月專家們講乜，相信都冇乜邊個，包括青冰，可以預測到今年咁曳，其實唔單止去年，兩年前又有邊個諗到，去年慢牛可以升咁多呢。

相信話今年好難玩，大家一定無異議，睇返過去十年，較近似的市況，應該是2011年的歐債危機，當時又係全球都唔掂，但以港股為例，都係跌咗約11個月，而自今年1月至今，已經11個月喇，如果話這個浪已經跌完，相信只有少數人會認同。

回想當年歐債危機，全球仍在放水的狀況，所以跌浪在一年內完結，都可理解，但今次美國收水，已經有兩年幾，加息都加了9次，預期下年仲會有兩次加，香港幾時先會跟，我哋暫不作討論，但流動性趨緊，是不爭的事實，內地經濟問題，亦只係剛開始浮現，所以你會見到炒得最勁的高增長高PE股，近幾個月跌得最甘。

經常都會收到戰友inbox問，嗰幾隻跌得反晒艇的，撈唔撈得過，都係嗰句，博反彈留畀高手做，青冰自問低手，寧願睇少隻。現在睇返，幾隻反肚藍籌9至10月見底，11月反彈，但呢幾日又率先再破底，高位跌去一半甚至七成，咁嘅牌面青冰寧願揸cash都不會撈，花些精神做吓功課，細細注博下啲細股，還更心安理得，專家話長揸藍籌唔怕喎，但青冰只怕佢哋下年連藍籌都冇得做喇。

如果年頭有人同你講，定存有3厘息，不如去做一年定存啦，相信99%的人都會嗤之以鼻，痴線架咩，咁嘅市況去做定存，但現時如果畀大家再揀，一定會揀做定存啦，全球主要指數今年都係見紅，輸錢亦屬正常，相信跑贏定存的基金經理不會太多，今年亦正正係考牌考功夫的時間，年結後不妨睇吓你手上的基金或強積金，年頭、年中及年尾揸緊乜，再對比吓個回報，好自然就睇到基金經理的功力，日後有機會，再另文探討吧。

Fb個人專頁 http://www.fb.com/chingbing888