青冰記得去年寫過一篇關於新股的，內容大致係話熱爆的新股，並不是長相廝守的對象，反而上市時火花唔多，高開又唔多，甚至穿過底再在短時內上返的，可能是明日之星。近期密集式上咗幾十隻新股後，七、八月應該會靜返啲，下一個高潮應該是阿里巴巴，就趁今日回顧吓過去一年的新股吧。

去年下半年，新股市場可謂非常慘淡，因為當時的股市也很差，七至八月的新股，幾乎清一色會穿底，即使強如鐵塔(0788)，頂咗一星期都要穿，一個月內最低跌過兩成半；九月嚟咗隻海底撈(6862)，又是頂咗一星期就穿；11月上市的新城悅(1755)及12月的佳兆業美好(2168)，兩間都是當炒的物業板塊，不過上市初期都只係幾巴仙的上落。總括而言，個市愈差勁時上市的，大家定價都唔太進取，上市頭段時間仲要乏人問津，但歸納到的是市值有返咁上下，業務及保薦人不是古靈精怪的，其實值得再深入研究，是否必升冇得寫包單，但值博率是頗高的。

踏入2019年，雖然個指數回升，普遍股份都反彈唔少，但新股市場就是旺不起，穿底成為常態，偶爾有一兩隻首日升兩三成，最後都無以為繼。真正撻著大家團火去玩新股，來自中煙(6055)，超購一百倍，首日只微升一成，但六月尾開始的七個交易日內，由8蚊炒到28蚊，升到你唔信，早前青冰亦撰文講過，現時既然炒爆咗，上面段段蟹貨，實在沒太大短炒價值。

在六、七月上市的新股，有幾隻都會密切注視，因為符合了以上的條件，市值唔細，升得少，業務睇得明，如錦欣(1951)、華檢醫療(1931)、中匯(0382)及中梁(2772)，錦欣其實算係概念獨特，但股價走勢就認真曳，相信要畀多啲時間先可確認得唔得，華檢的情況差不多，但上市幾日就忽然大插，之後又發盈喜炒上，咁嘅手法真係令人卻步，還是要觀察。至於中匯呢，BNP保薦的教育股，給予信心，舊愛中教(0839)都係上市時死吓死吓，之後跌穿招股價震死晒大家，之後先慢慢做嘢，相信中匯的手法亦會相近，中梁是一隻溫州龍頭內房股，去年銷售額逾千億，在內房唔當炒之時用平價上市，仲承諾今年度派息比率有四成，照推算有9厘，由於市值逾百億，可以豁免25%街貨的規則，老闆持84%股權，街貨疏，水位係充份嘅，唯一令人擔心的，就是原來好多行家都有推介，或者要炒上震落整暈大家，隔一陣先至嚟料喇。

Fb個人專頁 http://www.fb.com/chingbing888