執筆之時，美股已經歷本周第二次熔斷，停市15分鐘等大家冷靜吓，書本上課堂上經常聽見，應該在別人恐懼時貪婪，但今星期已出現了兩次恐慌性拋售，有沒有令促使戰友們貪婪呢？   面對如此極端的市況，要求自己做一些神級的動作，實在無謂，最重要還是平常心，青冰「有幸」經歷過兩次大危機，911及金融海嘯，前者係初出茅廬，一舊飯咁，冇乜得著，08年海嘯時在工作上有份落場，感受極深，亦慶幸有那個經驗，在這次亂局中經常提醒自己不要太勇，保持高現金水平，繼續玩心水股而且戰且走，最近幾個浪打埋嚟，當然走避不及啦，輸錢好閒，只要接受自己是常人，不可能華麗轉身沒半點損傷。   近日跟幾位身經百戰的前輩傾開，大家都認同今次的確極度恐慌，但比起海嘯卻截然不同，海嘯的伏線係次按出事，拖了接近一年才出現雷曼爆煲，而爆煲後銀行同業間出現了極嚴重的流動性問題，而彼此間都驚對方出事，所以減少做場外交易，所以有流動性的市場，例如股市，梗係套現為上啦，人踩人因此出現，最後逼令聯儲局要救其他出事的銀行，再狂注流動性，最後出埋QE。   今次之不同，美國及本港的同業市場仍大致穩定，未見到有邊間大行出事，其中一個原因係當年雷曼爆煲後，全球對銀行業(包埋投行)都收緊了監管，有好多嘢唔做得，資金要求又多，愈來愈煩，所以近年你會見到，啲傳統銀行愈做愈唔掂，股價表現跑輸。這件事侵侵在去年曾講過要推翻，話監管太多，阻礙金融業發展，好喇來到今天，市場咁恐慌，都暫時未見有大行出事，系統性風險仍偏低，侵侵是否要多謝監管呢？   雷曼爆煲因流動性出現問題，所以聯儲局注流動性，甚至QE，都叫做係對症下藥，但今次注入流動性，似乎完全冇用，證明呢隻藥對今次個病無效，如果要一個轉捩點，真係要研發到治療肺炎病毒的藥，有戰友話藥唔夠喎，要疫苗先有用，但其實有隻藥喺度，已經減了一半恐慌，起碼知唔會死先啦，之前話美國有藥廠已開始臨床試驗，4月底便會有結果，但4月底太遙遠了，還是注視下周的聯儲局會議吧，相信淡友亦不會一直踩到開會那天，佢哋平倉之時，戰友們要好好考慮如何執倉喇。

--  Fb個人專頁 http://www.fb.com/chingbing888