Q24001：

想請問呀sir，見好多人話港股已死….但又見呀sir話港股佢有投資價值，但只係價值低左，可否解釋下點解價值低左?

龔成老師︰

現時全球的經濟結構，會愈來愈重視新經濟類，美國較多這類公司，會受惠，而香港較多傳統經濟企業，因此股市增長會慢左。

其實，香港都有新經濟企業，但在中國政府加強監管下，賺錢能力減少左，因此，令香港股市弱左。

但在長遠，香港股市又不是永遠差，會慢慢好轉（但不是高增長），這是由於當疫情過後，市場會漸漸對傳統經濟估值提高，同時，當監管慢慢減慢，企業餘適應新環境，同時股市會估值高翻D，所以，港股不是完全無價值。

Q24002：

成哥，的士現在仲係有質素的對嗎？

長期持有 我起碼持有3年到疫情完？

龔成老師︰

的士牌依然有價值，但個增值能力，比多年前係弱左。

因為市場多左競爭，不過前景依然都係偏向正面。只不過係增值力唔會太高，主要係創造現金流。

其實你一直持有都可以，但新資金就投入一些較有增長力的資產類(如平穏增長股、潛力股等)。因為你都算後生，需要將個組合增長力拉翻高，會較為理想。

Q24003：

老師 想問 1117 和9997點睇

龔成老師︰

現代牧業（1117）係中國採用大規模工業化散欄式乳牛畜牧業務模式的公司之一，所有標準化畜牧場乃以各個畜牧場。

按畜群大小計算，集團是中國最大的乳牛畜牧公司及最大的原料奶生產商。

整體都有質素的，不過行業變化大，原奶的價格令佢盈利較為波動，長線投資價值都有，但唔建議太大注，現價合理區中上部。

康基醫療（9997）睇翻佢的資料，佢係中國最大的國內微創外科手術器械及配件(MISIA)平台。

根據資料，按銷售收入計，2019年中國MISIA市場規模達到人民幣185億元，集團在國內廠商中排名第 一，在所有廠商（包括國際和國內廠商）中排名第四，所佔市場份額為2.7%。

根據資料，2019年銷量計，集團在中MISIA市場的多個細分領域，包括一次性套 管穿刺器、高分子結紮夾、第三類一次性電凝鉗以及重複性套管穿刺器和鉗中亦排名 第一。

佢不是無質素，不過由上市開始一直都唔平，所以之前貴，現價仍未平。算是合理區中間位置。

Q24004：

老師你好，想問868係屬於穩建收息定係有增長力的，我42歲，有70萬左右股票，想揀多隻股票買，868. 285. 960呢三隻應揀邊隻？本身已經有968

龔成老師︰

信義玻璃（0868）在技術上有優勢，相信長遠仍是正面，不過就未必是高增長的類別，潛力度比過往略有減少，算係平穏增長股類別。

加上佢不斷將較高增長的業務分柝左上市，令現時的信義玻璃增加，只是平穩類。

現時估值在合理區中上部，可以開始分注。同時，你預佢中短期會比較波動，要長期先見到收成。

以你42歲計，這幾隻都適合，不過你本身有信義光能(0968)，由於信義玻璃（0868）係同系股票，2隻加埋唔好佔太多，最多佔2成左右好了。

另外，你上述股票都係潛力股(除了0868)，佢地雖然有增長潛力，同時風險都較高，不宜持有過多。

以你年紀，潛力股可佔約4成，餘下應用以下平穏增長股。若你投資經驗較淺，潛力股比重，要再調至2成以下。到你學到一定投資知識，才慢慢調高。

你可以審視翻整個組合，潛力股有無超標情況。如果有，你就要加大翻平穏增長股部份，令組合回復平衡。

Q24005：

成哥，我本身剛剛開始做了月供股票

1177 中國生物製藥 $2000

1810 小米 $2000

剛剛加了人工 多左$2000

用e $2000蚊 月供 1211 （因2845 無月供 ）或簡 銀河娛樂 27邊隻好D

假設 月供到下年 澳門政府發賭牌後再 決定情況之後供吾供

本身每月巳草一半人工等大跌市掃貨

龔成老師︰

你現時每月用儲蓄一半月供，一半儲備用的策略，係正確。

以你情況，由於現時供緊個2隻，都已經係潛力股。若再加入同是潛力股的GX中國電車(2845)，你個組合就會太高風險。

我建議選銀娛(0027)，但你要明白，再發賭牌仍有好多變數。銀娛(0027)在澳門有正面的貢獻，從資產質素、澳門發展、就業等角度，佢都做得不差，賭牌好有機會得到，不過，政治因素就是不確定，這點好難準確分析影響是否大。

初步分析，佢得到賭牌會過半，但政治是一些不能預測因素。

要留意，現時賭牌的條款，要求加入政府人員，這無可避免地影響了企業長遠的賺能力，優質度及估值都會略減。

此股長線投資價值依然存在，但風險度係高左。你可以月供佢$1000，再加其他指數基金平衡下。

到下年賭牌問題落實，再睇下有無需要調整策略。

Q24006：

阿Sir想請教您3798

個人分析近幾年嘅財報以及同行嘅財報，發現利潤增長唔錯，而同行嘅話有相同增長力/ 潛力都去到PE 十幾

其次 業務發展穩定，潛力大，未被市場關注

如果依家考慮買入，是在合理區下，請問我的分析對嗎

龔成老師：

家鄉互動（3798）市盈率的確好低，但你都要了解翻，市場點解近半年，不將調低佢的估值，主要就是監管因素，所以你一定要小心分析，監管對佢會否有長期性的影響，是否賺錢能力會減少。

現價雖然合理，但長遠發展更重要。

Q24007：

老師，美國股票

DIS 迪士尼

ADBE Adobe

長遠發展可觀嗎? 值得長期投資嗎？

龔成老師︰

迪士尼(DIS)是一家綜合娛樂公司，有投資價值。其業務包括媒體網絡、公園體驗和產品、影視娛樂等，有很強的品牌效應。

集團過往賺錢能力，都算唔錯。但受疫情所影響，2020年出現虧損。但相信疫情只係中短期影響，長線發展都是正面的。

現價算合理區頂位置，可以小注，但你預佢中短期都會較波動。

Adobe Inc. (ADBE)為一家軟件公司，業務主要為不同類型客戶，創建、管理、測量、優化和促進引人注目的內容和體驗的產品與服務。

雖然佢營業額和盈利﹐都維持唔錯增長。但近1,2年升左唔少，現價已經係略貴。

長線投資價值係有，但最好等佢有明顯回調，才開始入貨。

Q24008：

你好，我50歲有多。我月供 1177-$3000, 2800-$3000 都有一至二年

現見部份股票到合理價錢，想將 2800轉供 小米，285 或 買 1448應如何選？

因1448 沒有月供，我之前買了一手 @6.50

龔成老師︰

唔建議你咁做，因為你已經5X歲，係一個較接近退休年紀，投資選項上要開始保守少少。

0285, 1177, 1448都是潛力股類，風險比較高，唔建議你再加注了。潛力股比例上，只宜佔你組合最多2成。你未來投資時，應慢慢轉移至一些「平穩增值股」和「收息股」。

若你想進取些，可集中「平穩增值股」，相反你想保守少少，可以集中在「收息股」上。但比重要隨著年齡增加調整，你要慢慢上調收息股比例。到退休時，你收息股比例，應提升至100%。

以下是一些有質素的「平穩增值股」和「收息股」，你可以參考一下。

以收息股來說，可選目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

Q24009：

你好呀，我有一個一歲嘅小朋友，暫時幫佢儲到約兩萬。但覺得留現金好蝕抵。想問我係咪應該要月供一啲股票實際啲?

如果係，係咪應該供盈富/內銀較好?

另外，知唔知同一銀行，可唔可以開兩個證券戶口? 因為想分開我個人同小朋友嘅資金。

謝謝！

龔成老師︰

同一銀行，開2個戶口，我自己未試過，應該係可以。不過最好，你問翻銀行個邊。

至於小朋友儲錢，由於佢可以投資時間較長，策略上十分簡單。你可以儲指數基金。

若你想增長力較高，可以儲安碩恒生科技(3067)。但此股波動性會較大，要睇翻你自已風險承受能力。

基本上，以你小朋友年紀計，持有以上股票都係可以，但你明白當中風險。

儲股票方法，最理想就係月供，去長期進行，咁就可以了。

Q24010：

Hello 龔sir 有個小小問題無知一問。

請問資產嘅定義係咩？因為有好多人都有唔同說法，希望有個清晰嘅定義，再重要安排增加資產，

我依家有(自己公司/股票/儲蓄保險/Mpf)依啲算唔算？因為身邊無人同我背景一樣，大多只係打份安穩工就夠，所以想請教下你，thanks

因為最近生意無上年咁好，同我公司同類型嘅公司都有好多，雖然我已經做咗3年(有穩定客源)，不過依家咁嘅環境都有下跌，令到心理壓力好大，

更有人叫我打返份工就算(當然我唔想)但成日都有啲迷茫，唔知自己辛苦建立嘅嘢，對將來有無幫助，依家好辛苦~

龔成老師︰

首先，你要明白我地的財富系統，過往在金本位年代，現金是有限以及等同黃金的，但現時我地所用的是「債本位」，現金無價值，加上政府不斷發行「現金」，所以，長遠現金只會不斷貶值。

我地現時持有的紙幣，只是「政府借據」，無任何價值。所以，如果只會累積現金，根本無法累積真財富，當你每月收到人工時，你並無收到任何財富，你只收到「政府借據」。如果你想有財富，就要做多一個步驟，就是將現金轉為「資產」，你才擁有真財富。

甚麼才是資產，土地就是其中一項，所以，土地衍生出來的物業、車位、商舖等，都是可投資的資產項。

另外，優質企業同樣是資產項，因為佢會持續地產生現金流。因此，優質股票是資產項，但一般股及劣質股不是。

你現有公司(生意)和股票(若是優質)，都算係資產。MPF由於都係投資優質股，都算係。不過佢會被MPF和基金公司，從中抽取不少費用。相效直接投資優質股，個效益會較差。

儲蓄保險，純粹係一種產品，增值能力不高，不宜持有太多。

至於你生意上發展，我建議你睇長線少少。因為現時大環境，經濟都唔係咁好，生意下係正常。你要考慮翻，到經濟環境回復正常，你生意係唔係可以重拾升軌。

如果只係中短期經濟問題，我唔建議你放棄盤生意。因為一盤生意營運得好，回報係會比打工(除非你是專業人士)，甚至投資優質股高好多。

但若果係長線本質出問題，令競爭力下跌，你就要去努力找到解決方案，令業務重上正軌。