今天是3月最後一個交易日，按上市條例，12月年結的公司需在3個月內公佈全年業績，除了5間揀星期日(3月31日)公佈外，今天是最後一個公佈業績的工作天，青冰從港交所的董事會會議通知連結計過，今天主板將有278間公司出全年業績，整個港股約有二千三百隻股票，當中有少數係3月及6月年結嘅，撇除呢啲，戰友自會明白278這個數字係幾咁驚人。

讀書時期，臨deadline先交project，可謂司空見慣，學生們想精益求精，整到至靚先交嘛，所以最後那天先交，唔一定代表質素有問題，不過放在港股的世界，deadline先交，質素相對都係差啲，唔一定盤數有問題，但盈利大增前景秀麗者，按青冰的記憶，的確係少啲。

今年唔知點解，特別多延遲公佈業績，新高教(2001)有董事未能出席董事會，要改到今天先出，有公司話有附屬公司要減值撇賬，要更多時間計算，有公司含糊其詞，只係話要多啲時間準備，不過咩原因都好，結果都係延遲至今天才公佈，咁梗係寫今日嘅，無理由話4月先出到盤數，因為4月1日已經係犯規，遲交功課，老師最多鬧你兩句，遲交業績，首先就要停牌，到真係公佈時先可以復。

昨天終於流下第一滴血喇，慕容控股(1575)午後停牌，因為核數師對公司有些交易提出查詢，董事會要更多時間回覆，所以決定延發業績，咩原因其實都唔重要，有別於其他宣佈delay的公司，慕容控股在上星期的通告，係冇講實邊日會公佈，某程度上這個慕容一早已經埋下「伏」線。

去年港交所建議將核數師對財表的意見，作為停牌的準則，雖然有關建議未實施，青冰難免聯想到核數師已提早執正啲，對財表問多幾句，上市公司亦唔想自己跌入「不表示意見」及「否定意見」的範圍，所以需要更多時間準備去解畫。

不過，做過學生都知，deadline交唔切功課，應該唔會臨尾嗰幾日先知，同理，核數師最遲應該三月初已交貨，等公司回覆有關問題，正因為係咁，股票市場就難免有春江鴨。睇返慕容控股，公佈延遲業績前兩天，股價兩日跌去23%，出通告後單日急插49%，而原本持有8.97%的Rays Capital，當日就狠沽6826萬股，持股減至2.14%，一個星期後公司就出通告確認停牌了，Rays手起刀落果然決斷呀。

278間公司，最後有幾多間趕唔切呢？

Fb個人專頁 http://www.fb.com/chingbing888