今篇係青冰在豬年首次發文，在此恭祝各位戰友在新的一年身體健康，事事順利，財源滾滾豬籠入水。

早幾星期有戰友問青冰，點睇美聯(1200)以2蚊向股東作部分要約單嘢，因為黃老闆約過佢哋一班財演吃飯，叫大家多多支持，咁青冰即時都爬一爬份通告，大股東黃老闆出價2蚊作部分要約，青冰搵料時看到很多報章，以大股東斥1億兼溢價幾成增持股份，如果就咁信咗，的確被誤導了，再睇返個股價，點解由12月20日公佈後個幾月，從來都冇見過2蚊架呢，如果我係股東，接納應該好筍喎。

凡看這些要約或全購，重點都是要看先決條件，其實在通告中係寫得好清楚，不過一般股民不會細閱，而做財經記者，有時也懶得睇，結果就會出現1億元溢價增持的謬誤。這刁的重點，在於大股東向各股東收購5744萬股，每股作價2蚊，而此要約的先決條件，就是在第一個deadline，即係今天2月8日前，收到至少5744萬股接納，及獨立股東逾50%批准才會達成。後面這個條件青冰反覆看了幾次，再細閱收購合併守則，原來大股東持有少於30%股權，並在部分要約後會升越30%的話，就要有50%獨立股東批准先OK。

不過最頂癮就係批准不代表要接納，身為股東你可以唔接納，唔沽畀黃老闆，但你係可以批准的，所以你在披露易看到美聯寄出的通函，係有一個表格，股東可以加個tick並寄回，就可以批准喇。

再睇返個股權分佈，大股東持27%，即1.94億股，獨立股東就約有73%，即5.24億股，換言之，就要有2.62億股的股東批准，第二項先決條件才會達成，現時永明金融持有約8600萬股，Surplus Gain就持有7566萬股，基金Hosking Partners就約有5000萬股。以上三位加埋都只係2.1億股，即係要多幾千萬股老散批准先得。重中之中係個部分要約只會收你5744萬股，多於此數就要按比例收架喇，問題來了，愈多人接納，股東沽到的比例就更低，但又要有過半獨立股東批准，即係話最optimal就是剛好有5744萬股接納，但又有2.62億股批准，咁那5744萬股股東及大股東都爽歪歪了，實情係有冇人會咁做呢。

提返你，按1月25日的通告，股東之一的Surplus Gain已接納要約並批准，先決條件的第一個已經達成，但第二個門檻是更難的，要2.62億股批准，今天收市後便知結果，如果有股東決定唔沽畀黃生，但又不嫌其煩走去批准，成人之美，只能用真正朋友去形容，收市等通告睇吓究竟有幾多朋友吧。

Fb個人專頁 http://www.fb.com/chingbing888