Q23471：
老師你好，我想問13、1521的前景？
龔成老師：
和黃醫藥（0013）有質素。
佢是一家處於商業化階段的全球生物醫藥公司，專注於發現、開發及商業化治療癌症及免疫性疾病的靶向療法及免疫療法。
除腫瘤╱免疫業務外，集團的其他業務已建立大規模兼有盈利的藥物營銷及分銷能力，主要在中國生產、營銷及分銷處方藥。
佢於2000年已成立，已發展成為一家擁有逾1,300名員工的全面綜合生物醫藥公司。已創建一系列產品管線，包括十種處於臨床階段的候選藥物及另外七種處於臨床前試驗階段的腫瘤及免疫候選藥物。
佢自主研發的第三種藥物是用於治療肺癌的賽沃替尼，有望最早於2021年年中在中國獲批上市。
係美國，三種主要創新藥物亦正進入最終監管審評或已開始註冊意向研 究，目前亦正在組建自有的美國商業化團隊，為索凡替尼可能於2021年底或2022年初在美國商業上市進行準備工作。
這企業長遠發展正面，不過現價唔算特別平，投資值博率都有，但未算高，如果控制注碼，都可以投資的。大約現價在合理區頂至略貴。
珩灣科技（1523）主要以「Ｐｅｐｌｉｎｋ」及「Ｐｅｐｗａｖｅ」品牌從事ＳＤ－ＷＡＮ路由器的設計、開發、推廣，以及提供相關軟件許可及保修與支援服務。
ＳＤ－ＷＡＮ路由器可連接多個廣域網（ＷＡＮ）連接、智能分配流量給多個廣域網、可集中管理，以及必須利用加密技術建立安全連接。
業務及盈利都有不差的增長，發展不差，不過公司規模始終較細，因此始終都有風險。
這股長遠不是無價值的，但都要明白發展緊的，都是有變數的行業，所以股價潛在波動可以較大。
現價都算是合理的，但不建議大注投資，長線投資都可考慮。
Q23472：
龔老師，我有下列的收息股各1手,買入價如下：
0002 $71.9
778 $7.24
548 $8.19
6823 $10.76
1398 $4.54
11 $148.5
3110 $26.04
上述收息股是否再跌10%再加注？
303（偉易達）、2638（港燈）、435（陽光房地產）、2318（中國平安）
上述股票是否買入時機？
2800 我有6手，平均買入價$25.2
是否可以在再加注？
龔成老師：
持有的都是有質素的股票，基本上可以長線持有。
但上述股票，增長力不強，基本上都是收息股，如果你年齡是中年至年長，就無問題。但如果你年輕，就應該調整一下組合。
至於再跌10%加注，可以的，但最重要是不能用盡現金。
至於偉易達（0303）、港燈（2638）、陽光房地產（0435）、中國平安（2318），都在合理區內，港燈在合理區中上，其他在分理區中間，你都可以分注。
至於盈富（2800），你可以見佢回落約8%-10%，都可以加注，只要同時留現金就得。
Q23473：
你好龔成老師，關注左你fb page都有一年啦，之前冇咩股票知識所以買左幾隻都蝕到不得了，依家睇左你啲文章慢慢月供左啲優質股，想問下你意見：
- 呢三隻股應唔應該止蝕？因為想留返啲錢黎買優質股 788 中國鐵塔，16000股，買入價： 1.76
857 中石油，6000股，買入價：5.1
1119 創夢天地，4800股，買入價：7.15
- 我依家27歲，現金大約10萬，月入18000，租4000，保險大約3000，每月大約可以草5000，暫時停左月供，想問應唔應該繼續月供優質股？因為我現金唔多，之前係月供建設銀行同盈富基金。
- 呢幾年內想開間蛋糕店同買樓結婚，因為技術仲需要磨練同想草多啲錢先，大約需要50萬-100萬，而且覺得打工都係冇可能草到咁多⋯ 麻煩曬老師同祝老師身體健康！
龔成老師：
創夢天地（1119）、中石油（0857）、中國鐵塔（0788）不是劣質的，中石油可持有，中國鐵塔增長力比過往減左，但不是無質素。
創夢天地（1119）面對的風險太左，佢業務始終有少少波動。
佢主要透過合約安排於中國從事經營手機遊戲平台，種類包括角色扮演類遊戲、消除益智遊戲等。
睇翻佢旗下大部分遊戲均可供免費下載，並透過銷售遊戲虛擬物品而獲得收益，亦會在遊戲及遊戲內用戶社區中投放各類廣告以產生信息服務收益。這是不少行業都用的模式。
佢主要股東騰訊控股（0700）就雲基礎設施、內容購買及開發、數字娛樂及遊戲方面進行合作，這是佢的優勢。但中國政府加強行業監管，對佢風險及賺錢能力都有影響。
這股不建議持有太多，如貨多宜減。
至於你現金配置方面，要睇你自己的先後次序，如果你這刻無乜現金，宜儲多少少現金先。
如果你在1、2年內打算結婚，要花一定的開支，宜留現金先，不宜投資。
你打算做生意，建議你利用這幾年時間，多吸收做生意及蛋糕相關知識，同時，在這段時間努力儲多D錢先。至於是否利用投資去進行財富增值，就要睇你結婚資金是否中短期會運用。
Q23474：
老師，我巳看完你3本書，會一直看不同的價值投資書，我希望5年後可以做全職創富，全職股票投資者。
因為真的有興趣，完全明白是買入企業不是炒差價的，不過你書中有一點好似有點衝突，你說全職創富，我明白不是每天看著股市，而是不停發掘企業，看資料估值等，但你又說可能一年只出手一兩次。
如果發現了潛力股但可能想等便宜區or中下區才出手，那麼一直等，因為耐性得便宜區能創造最大財富增值，那麼又不工作了，會有點無所事事的感覺嗎，不夠實在?雖則有(基本財務自由)
龔成老師：
你的方向正確，保持閱讀、學習，提高投資實力，希望你5年後完成目標！
我每天會花大量時間去分析企業資料，每天不斷閱讀企業年報，大行報告，各方面的資料，要不斷睇有間「企業資料」（不是睇股價，不是睇住個市）。
要比市場早一步找到優質股，就要不斷自行發掘企業，如果你有上過我的股票班，就知我地用的方法，是比市場早一步找到優質股的方法，但方法卻是十分花時間的。
一般要分析50間企業，才可以找到一間較有質素，而現時股價又較吸引的企業。因此要用相當長的時間，但回報都是豐厚的。
價值投資者十分忙的，要分析大量的企業資料。
Q23475：
老師 我買左362 佢停牌
今次係咪死得 佢幾時先會復牌？
一復牌係唔係會暴跌 感激
龔成老師：
信陽毛尖（0362）質素不太好。
你可以睇翻佢過往5年業績，生意不穩，加上盈利波動，經常出現虧損，相信成本等因素影響佢好大，缺乏產品價格自主的能力。同埋在大半年前的業績中，核數師意見是「不表示意見」，反映核數師認為盤數有問題。
暫時只有等佢公布資料，相信股價都會波動。
Q23476：
老師你好，自之前上堂之後我買左以下股票
港鐵 @45 1000股
中國生物製藥 @7.477 10000股
福壽園 @7.410 3000股
完美醫療 @8 3000股
GX中國電車 @119.2 300股
安碩恆生科技 @12.88 1000股 (每月固定買入中)
金界按股 @8.6 8000股
亞里巴巴 @205.4 600股
我大概仲有10萬現金，每個月會儲蓄大概2萬左右，我覺得接住落黎都係一個好好的入市時機
想問下老師你覺得我接住落黎應該將資金放係邊隻股票會好D？
我吾介意放多少少錢係水桶一，呢個投資組合應該會去到起碼100萬先會叫完成
如果放係中生製藥/完美醫療好嗎？而家呢個價位可以入市定可以再等等？
GX中國電車我都想再買，但係升到而家呢個價位係咪應該等佢有所調整先？
楓葉教育/銀河娛樂/碧桂園服務我都有留意，但係我覺得而家有既股票種類暫時都足夠，係咪吾應該再買其他行業既股票住？
最後想問下老師你點睇今次國內的政策對香港市場既影響？
你認為香港市場股市將來的估值需要因為國內可以隨時修改政策而改變估值計算嗎？
好多問題，麻煩晒老師
龔成老師︰
現時大市開始回調，令不少優質企業估值平左，入市值博率係高左。但你大部份資金已經入左貨，建議你餘下10萬，最好等到大跌市，才動用會較好。
另外，你而家太偏重左係潛力股(除左0066，其餘都係潛力股)，佢地雖然有增長潛力，同時風險都較高，不宜持有過多。
假設你係年青至中年人士，潛力股可佔約4-5成，餘下應用以下平穏增長股。若你投資經驗較淺，潛力股比重，要再調至2-3成以下。到你學到一定投資知識，才慢慢調高。
未來時間，你就要加大翻平穏增長股部份，令組合更平衡。
如果你希望進取D，加大水桶1係可以。但你要明白，這些股票風險高，唔一定代表回報高。高回報只會係佢地發展理想才會出現，當發展出問題，你的損失都會較大。
若你想投資水桶1，以下股票都可以選擇。
潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。如果有投資美股，可投資QQQ。
但部份依然係略貴，現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)、小米(1810)、QQQ算在合理區中間至頂部，可分注入貨，其餘都略貴，想買就要等一等。
完美醫療(1830)都係有質素的水桶1，現價在合理區頂。但此股不確定性較高，唔建議太大注。
係你創建這個組合時，緊記要平衡。
個別企業和行業，不要佔組合15%和30%以上，銀行業更加不要高於組合20%，否則會有過度集中性風險。(盈富由於係一籃子組合，故不受此限。)
在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。
ＧＸ中國電車基金（2845）現價算係合理區頂至略貴，由於你已有一定貨係手，唔建議而個水平再加注。
楓葉教育(1317)現價合理，但近期中央政策對教育部的調控力度唔細，雖然暫時未見對佢有重大影響，但行業風險係高左。你可投資，但要控制注碼，此股算水桶2。
銀河娛樂(0027)現價合理，受賭牌問題，風險高左。加上現時賭牌的條款，要求加入政府人員，這無可避免地影響了企業長遠的賺能力，優質度及估值都會略減。
長線投資價值係有，但不確定性高左，要控制注碼。
碧桂園服務(6098)有質素，算合理區頂，無貨可小注。
至於國內政策問題，其實一直存在，而且唔係咁易估。你要睇翻到底相關政策，對企業有無長線影響，如果有，就要在估值中進行調整。
Q23477：
龔sir你好，我啱啱完成左你個初級班。我都好認同你講呢一套價值投資法，但實踐上好令人灰心
近來好似買乜跌乜咁樣。
我嘅組合如下：
雅生活 1手@$31
GX中國電車 1手@$184.25
盈富基金 3手@$27.4533
中國平安 1手@$69
太古地產 1手@$21.85
金沙 2手@$21.375
小米 1手@$25.3
福壽園 1手@$7.23
中生製藥 1手@$6.46
長江基建 1手@46.6
領展 3手@$72.25
呢啲股票，係咪只係因為大市跌，所以跟住跌呢？應該用咩心態去面對跌市呢？
我係相信中國平安係有質素，但佢每日都跌，真係幾沮喪
龔成老師︰
你要調整好你心態，要記住我地投資緊，係一間企業長線發展潛力。就算再好的股票，中短期都會有波動，這是正常。
但只要係有質素，佢真實價值，長線一定會在股價中反映出來。
你現時組合中的股票，包括金沙和平保在內，都係有質素，適合你長線持有。
平保(2318)受其子公司債務問題影響，令股價下跌。但其實暫時所見，實際性影響唔算好多，長線核心質素無變。
Q23478：
Sir, 我持有200股阿里巴巴（9988），平均價$242，現在跌至$144。仲應否持有？謝謝
龔成老師︰
你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。
監管因素令佢賺錢能力略減，但整體仍是有質素的，有得守。
阿里(9988)近期受大市氣氛和政策風險所影響，令到股價有較大回調。雖然估值上都有少少調整，但核心質素無大變﹐依然有長線投資價值。
只要這2手，佔你組合比重唔係好多，你可以守。但你預佢中短期股票，依然都會係好波動。
Q23479：
但係坊間發佈既消息有幾可信？
還有阿sir 點睇順豐房托，我有一手抽返來。
龔成老師︰
市場消息我地唔可以盡信，而且要從多個溝道去確認(最好係官方渠道，例如年報、港交所通告、公司官網等)，認為有一定可信性，才會考慮。
順豐房託基金（2191）質素都有，但又不是好強。
順豐房託的投資組合初步包括位於香港、佛山及蕪湖的以下三處物業，所有該等物業均為現代物流地產，包含配備有自動分揀及供應鏈支持設施的分撥中心。
- 香港物業：位於青衣，為一個15層高的「坡道式」現代物流地產，具備可通向各倉庫樓層的車輛坡道。
- 佛山物業：為配備有智能技術及量身訂造的設施，如自動分揀及供應鏈支持設施。
- 蕪湖物業：於2019年竣工的位於鳩江經濟開發區的現代物流地產。 比起其他房託，佢會更受經濟及物流業發展影響，因此會更加波動。以過往的數據來說，不差的，但又不算好強的增長及賺錢能力。
投資價值都有，相信長遠物流業發展對佢都有利。但不能太大期望在股價發展，你當係收息為主，再加基本增長力。
Q23480：
我想投資幾款月供長運增值股票
2800，0003，2388三隻夠唔夠？
龔成老師︰
其實無話幾多隻先夠，只要唔好太多，數量最好維持10隻以內。
另外，要顧及組合的平衡性。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。(盈富由於係一籃子組合，故不受此限。)
在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。
以你18歲計，這3隻係可以。但我建議你加入少少潛力股(這3隻都是平穏增長股)，去提升組合的增長力，比重大約佔3-4成。