Q36051：

老師，我有隻股票升咗11％

可否加倉

龔成老師：

如果企業長遠有發展，你持貨又不多，現金足，可考慮，當然，最準方法是計劃平貴度

Q36052：

sir ,960 vs 688 你首選邊隻?

龔成老師：

中國海外發展（0688）質素好少少

佢長遠有平穩增長的能力，前景都可以。

睇翻佢的財務數據，基本上都是正面的，但生意增長力不是好強，見佢過往的生意都只是平穩，而整體都有投資價值的。

可以視這股為平穩型的企業，現價合理。當然中短期可能因樓市一般而股價一般，但長遠，仍是可以的。

Q36053：

1801、2269、23邊隻質素有優勢？

龔成老師：

藥明生物（2269）過往業務有質素，佢主要提供有關生物製劑藥物發現、開發與生產服務。近年受到業務轉弱影響，以及政治風險的因素，風險度有所增加。

信達生物（1801）係一家中國生物製藥公司，開發了集研究、發現、開發、製造及商業化於一體的生物醫藥平台。

睇翻佢資料，佢亦係腫瘤、眼科、自身免疫和代謝疾病領域建立了一個包括單克隆抗體和其他生物藥物的產品管線。

由於仍處於燒銀紙的狀態，所以有危有機，潛力度是有的，但估值好難，現時市值都唔細，只能完全「估」佢將來的價值，不確定性好大。只可以話，這刻投資值博率中等，唔建議大注。

東亞銀行（0023）賺錢能力與增長力比過往年代弱左，但又未去到完全無質素。銀行業的賺錢能力比過往減左，因此不能視為增長股，但當經濟好轉，始終都會有錢賺，因此都有投資價值。

相信長遠是收息股，但股價增長就有限。

這股都有投資價值的，但就未必值得佔組合比例太多，同時明白佢是收息股，增長力有限。

Q36054：

老師, 近日聽到上市公司想私有化的消息, 究竟什麼是私有化？ 為什麼上市公司會開始想私有化？如果一間公司進行私有化究？ 究竟對小股東有咩影響要注意啲咩

龔成老師：

私有化，即是由一間上市公司，變成一個不上市的公司，股票由公眾持有，變成私人持有。

如果一間企業，認為上市已無作用，又或現時股價太過低，就有機會向市場收購翻D股票，變成私人持有。

對小股東來說，就要睇到時的開價是否吸引，以及自己的投資目標，如果認為佢開價不吸引，可投反對票，就有機會令私有化不成功。

Q36055：

老師早。TSLA 我180入-190入 10股，你覺得我是否應該賣咗佢？定穩守？😔人人升佢就不停跌

Carey Fu已在08:28看過

Carey Fu

早知，170時買COIN

龔成老師：

現時最重要是處理這刻情況。

COIN始終風險較高，就算買也只能小注。

至於特斯拉Tesla, Inc.（TSLA）佢長遠有發展，但股價上落大，要注意這方面的風險。

如果你持貨佔你組合%不多，你可以持有，但要有心理準備短期較一般（始終行業競爭大左，同時市場一向比佢較高的估值，所以當看法改變，股價回落都較大）。

你不要加注。

如果你承受風險能力不高，可以反彈時減部分，餘下長線。

佢成立於2003年，總部位於加州，是一家垂直整合的可持續能源公司，以及製造與銷售電動車。

Tesla銷售用於發電的太陽能電池板和太陽能屋頂，以及用於住宅和商業地產（包括公用事業）固定存儲的電池。特斯拉擁有多款車型，包括豪華、中型轎車和SUV汽車。

Tesla是全球最大的電動車製造商，全球電動車銷量第一位，以現時這企業擁有的技術與優勢，領導地位將會持續。企業過往發展速度十分快，憑藉其主打車型「Model S」、「Model X」、「 Model 3」、「Model Y」，帶領Tesla發展成為電動車王者。

佢有一定的質素及潛力，但不是無風險的，第一，電動車始終是較新興行業，業務始終有不確定性，第二，Tesla估值有時會偏貴，第三，Tesla過往股價甚為波動，第四，估值都建基於假設，但最終結果未知。

因此，這企業不是不可投資，但投資者要注意風險，最簡單的方法，就是投資時小心控制注碼，最好以小注分注的模式進行，同時，要控制好總投資金額。如果有貨，可長線持有。

Q36056：

龔成老師，你好呀，自從22年8月買到樓後就開始樓奴生活！現在面對好大嘅生活危機，完全唔知道可以點做，想同老師攞一攞意見，感謝萬分

我2022年8月份用$548萬買了屯門帝御系列新樓一房324呎嘅單位，之前月供$15000，現在加息到$19300， 管理費係$5.3一呎。當時我做8成按揭，將9成我嘅錢都投咗落去呢個物業嗰度，諗住年紀大唔好租樓。

現時還有以下股票，但沒有流動現金，每個月左手冚右手而且仲問屋企人借錢生活，人工得$23000 （下月加人工到$25000）。

但最近市度好差，我嘅股票都在負數，自己已經45歲，離左婚，單身，仲要照顧有情緒病妹妹（現在同住沒有工作再加養16.5老狗一隻）同67歲嘅媽咪（佢自住居屋，但同唔到佢住“情緒問題”）。

本來唸住自己年歲大買左樓搵份隱定嘅工，有間屋，自給自充再努力投資可以安享晚年，但突然好似好困難。

老師請問我現在應該怎樣做？見現在辣招鬆綁，應該賤賣層樓嗎？我層樓係548萬買入,現在銀行估價475萬，尚欠銀行416萬。我應該賣左啲層樓換去租屋嗎？

但係就變咗得返三十幾萬揸手,蝕咗七成（睇過如果兩房單位租金一萬蚊左右）應該袋番小小錢當發左場夢， 之後租屋生活。還是繼續供咬緊牙根等層樓升番啲？我每個月就爭幾千蚊生活費，應該搵銀行借錢解決問題嗎？

現在還有以下股票：

#291 4000股 $69.5

#909 8000股 $53.5

#6618 800股 $85

我現在應該點做？很苦惱，謝謝老師。 祝龍年行大運，身體健康。

龔成老師︰

其實買樓自住最重要符合兩個原則：「供得起」+「物業滿足未來10-20年的屋需求」。

你之前就算唔買樓，都會租屋住，租金會成爲你生活上一個好大部分的支出。

長遠來講，如果你無居住的地方，一直租樓，等你退休無收入的時候，居住將會成爲一個大問題。所以，住屋的問題長遠還是需要解決的。

現時市場預期息口已經見頂，在下半年美國將會減息，雖然唔知道香港會否跟隨(預期減幅會少過美國，因為當日加息都無跟足)，但當減息來臨之後，你的壓力將會減少。

再加上你下個月人工會增加，所以，你只要捱多一年幾，相信生活的壓力就會稍為舒緩。但你置業了，就等於解決掉一個長遠的問題。

我相信當時買樓對於你來講不是一個衝動的決定，因爲你考慮到自身的需要，覺得自己長遠要有住的地方。

只是現時面對各種不能預測的環境，你覺得有壓力，但其實只要平靜下來，計一計數，就會發現自己其實仍然有能力做到，只是需要多些信心以及降低一下生活質素，相信就可以應付。(除非你話收入同開支，你預期長線都會有巨大落差，咁先建議你考慮轉物業，甚至租屋。)

我個人不建議借錢解決生活上的消費問題，你現時已經負債咁多，再借錢只會令到你的壓力更加重，同時令到走翻正常路的時間越來越長。

盡可能先從開支和收入著手，盡量避免債務加重。

至於你持有的股票中，京東健康（6618）和明源雲（0909）都是有風險有潛力類，這類股票的不確定性好高，同時在在加息周期下，表現都會較弱。

以你現時的年紀來講，不適宜持有太多這類股票，你可以趁反彈的時候，減持部分，轉去平穏增長股，去維持整體的平衡。

華潤啤酒（0291）有質素，品牌價值高，銷售網絡強，過往的生生意盈利都理想，長遠有發展力，可以暫時守住先。

現時對於你來講，最重要是信心，明白要照顧患病的家人，自己生活又有壓力，心情不好受，但我相信只要樂觀面對，問題一定要解決的辦法，加油！

Q36057：

大師 你覺得1243 穩陣嗎？ 宏安地產。

佢而家有一個黃大仙地產項目

龔成老師︰

我地分析時，不能只睇一個項目，或期情況。

最重要，是企業的本質，以及長遠發展。

宏安地產(1243)為地產發展商。

主要從事物業發展、物業投資及資產管理業務。

現時香港的樓市已經有較爲明顯的回落，但未來我預期地產業只會平穩發展。

此股質素只屬於一般，你投資都可以，但只宜好小注。如果想投資地產行業，建議還是首選大型的發展商。

Q36058：

睇左你的影片，但

20年後既3萬......夠生活咩？

龔成老師︰

其實，優質收息股有一個特性，就係佢架股息可以跟隨(甚至跑贏)通漲增長。

因為佢地架產品或者服務收費，都有能力因應通漲而上調，令到收入增加，從而持續提高派息金額，以抵銷通漲的影響。

3萬其實只係用今天的價值去計算，到退休時，個金額會變大左，所以應該不會出現你擔心的情況。

但大前提，是必需懂得選擇優質股，才可以做到這個效果。

Q36059：

Hi 龔成老師，我現在手持以下股票。

00388 (300股) 2018年2月5號買入

02388 （447股） 2021年5月以$29.55買入

02800 （1896股） 2019年11月以$26.XX買入

由於沒有時間管理，所以有一段時間沒留意股價，因爲打算長線投資。但最近發現股價比之前跌了很多，所以想聽聽你的建議

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你現時持有架3隻股票，都具有長線投資價值，可以守。

現時大市受通脹、加息、戰事、中國房產、疫情等因素影響，中短期會較弱，但只要企業有質素，長線一定會回歸合理值。

另外，你現時組合明顯偏重晒係港股，建議你未來加入一些美股，令整個組合變得更平衡。

但要留意，個別地區不建議超過組合的7成，如果不懂選股的話，可以考慮加入(VOO)，作用類似盈富（2800）。

Vanguard S&P 500 ETF（VOO）就是追蹤美股的ETF，追蹤指數是標普500指數，當中都是全球有實力的公司，有長線投資價值。

由於美股波動，不建議一次過大手買入，最好的方法慢慢分注，或以類似月供模式進行，長線持有，這是一個最好的投資策略。

Q36060：

龔 Sir您好！可否請教您，持有港幣800萬退休金，想固定收息（每月45000），可以如何分配投資呢？

另外，若想買美股，香港有什麼途徑可以買呢？

謝謝，祝生活愉快！

龔成老師：

先講美股，其實一般銀行或者證券行都有，只要你開個美股戶口就得。

但香港人買美股收息，要比30%稅，故用美股收息未必理想。

至於退休金方面，你可以將佢這$800萬，分成5部分。

第一部分投資收息股，你可以建立一個收息股組合，例如港燈（2638）、深高速（0548）、香港電訊（6823）、工行（1398）、置富（0778）、陽光（0435）、高息基金（3110）都可以，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之需。同時，若投資市場大跌，你可以在這時買到更多的收息股，股息率會進一步上升。

你可以將$800萬資金，平衡地分配在上述的項目上，對你來說是最好平衡風險，同時有穩定的現金流。

不過，你目標係每月4.5萬，即等同6%多，故需要集中少少係收息股度(同時當中要有一些較高息的收息股)，先可以做到。但你要明白，咁樣做會令組合無咁平衡，同埋風險高左。最終點去配置，你可以因應自己取態去做決定。