Q41301：
老師，恆指三萬會唔會係天方夜譚？
龔成老師：
恆指近一年，由15000點上到24000，是之前便宜，去翻現時合理。
如果要上30000，就一定要有實質增長，無論經濟、企業業務、財務數據等。我相信短期未必得，因為已不能只靠消息等因素，就大幅推升。
至於長遠，只要經濟好轉相信是可以的，其實恆指當中不少企業，本身都有優勢，只要持續發展，優勢會進一步呈現。
Q41302：
龔sir你好！
想請教一下，我有流動資金約10萬，另外現時持有1000股00981 (成本價52.175)，400股01810 (成本價52.55) ，500股09988 (成本價132.3)，合共14萬3左右。
因已有150萬是做了銀行定期存款，所以想將流動資金的10萬投入股票市場作中長線投資，請問除了收息股外，有那些股票比較合適？
感謝回覆
龔成老師︰
首先，當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。
如果你係年青至中年人士，應先以增值為主，可以投資「平穏增長股」和「潛力股」。
而定期，就會過於保守，建議長線都"分注"投入具增長力的優質股當中。
但「潛力股」風險較高，不宜佔組合一半以上。而你現時手上的都是「潛力股」，所以長線要加入「平穏增長股」平衡。
平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。
另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。
第二，就係買入價問題。你持有股票，都具有長線投資價值，但你跟很多坊間投資者一樣，但買入價唔平。如果你係單純因為無貨，又好睇好佢地，所以小注儲貨先，咁係可以。
但如果你係純粹見佢地近期升好多，市場又不斷講佢地點好點好，所以盲目追入，咁你投資會好危險。以往見很多坊間投資者，都係買左貴貨。令到自己長線持有優質股，但長線組合依然係輸錢。
其實投資，唔係單單買入隻優質股，之後長線持有，就會出現理想回報。
投資知識(分析股票性質和優質度)、估值能力(定平貴能力)、組合配置/平衡性、年紀/風險承受力等因素，都會影響到長線組合回報效益。
所以，你要努力提升自己投資知識，特別係"估值"和"選股分析"能力。因為長線投資回報，係必然同你架知識水平成正比。
Q41303：
龔sir，請問英偉達經deepseek之後還合不合適投資？
BRK-B較為穩定，但巴菲特年事已高，是否會帶來不穩定因素？兩者之間哪個更適合長期投資？
龔成老師：
1）英偉達公司NVIDIA (NVDA)仍有質素。
之前市場有搶佢的產品情況，但現時已理性翻，因此，佢的增長力會略減。但長遠，行業仍是正面，所以仍有發展力，只是短期可能較一般。
佢是一家人工智能計算公司，其業務部門包括GeForce圖形處理單元（GPU）、GeForce NOW遊戲流媒體服務和相關基礎設施，和其相關的處理方案。
其業務可應用層面，都相當廣泛，投資係可以。
但始終近年上升倍計，中短期股價仍會波動，現時大約在合理區中上，投資宜分注，同時要控制總投資比例。買入後，平常心面對短期股價，長線等企業有更大的發展。
2）Berkshire Hathaway Inc（BRK.B），由於巴菲特年事已高，之後可以用一個「價值投資型基金」，去理解巴郡。
相信增長力會略減，但長遠仍有基本增長力，仍會比好多投資較理想。
巴郡是一家控股公司，擁有從事各種業務活動的子公司，包括保險和再保險、公用事業和能源、鐵路貨運、製造和零售，屬於大型綜合企業，可以理解為一個投資公司，或可視為一個基金。有質素，可以長線。
由於有巴菲特作操作，基本上有一定質素，有長線投資價值。
巴郡的平貴度，建基於其資產組合平貴度的分析，考慮到現時主要持股的平貴度，大致推算巴郡在合理區中上，有興趣的投資者可分注，或用月供方法去儲貨，並長線持。
Q41304：
龔sir,現在是牛市二期嗎？牛市二期有什麽特徵？謝謝。
龔成老師：
算是牛二（當然，仍有變數的，要持續觀察），牛二是一個「樂觀」時期，經濟開始好轉，股市反覆但大致向上，成交比之前增加。
Q41305：
龔sir, 想請教你我老公有隻2388，買個時係26.45左右
依家升到29.9
好唔好先放左因已買左好耐
佢有1500股
賺到大約5000幾
龔成老師：
中銀香港（2388）長遠仍有發展，是收息及平穩增長類股，只要你資金不急用，貨不過多，大方向上，可持有。
其實，你地最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。
你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。
你要分析你的投資目標，你想潛力股的比例多少？平穩股的比例多少？組合風險程度如果？
即是你想設計一個怎樣的投資組合？長期、優質、平衡、適合你。
Q41306：
早晨，老師，買股票乜野位置止蝕？
溝貨如果在低位，系咪都OK？
等於講價拉低
龔成老師：
最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。即是企業質素明顯轉差，你就要止蝕。
另外，當你決定加注與否，要睇幾個因素，記住，並不是「拉低平均買入價」為目的。
第一，要分析這股的質素，如果無質素，就再跌都唔加。
第二，這股的類別，如潛力或增長或收息類等，是否與你的財富組合匹配，比例是否適合。
第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。
第四，現價是否有投資價值率，要平，或起碼合理，不能貴。
第五，你要在加注後，仍有現金剩。
記住，重點不是「拉低平均價」，而是組合比例與配置。
Q41307：
龔sir你好，想問下家中長輩剛退休想買收息股作日常收益，大約可用200萬來投資，希望每月大約有$15000，可否建議應購買哪幾隻收息股比較合適？
龔成老師：
可以將$200萬其中一部分，可以作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。同時，也要將部分資金，投資其他低風險工具。
假設你投資$100萬作收泉股，5%，一年收息$50000，平均每月收$4100，同時，你地再加上其他工具，提高現金流。
第二，投資債券，你可以選擇A評級的債券，年期較長都可以，但利息卻不高。你可以到銀行問問。
第三，投資年金，你可以睇睇，這是適合你的產品，零風險，可以有穩定回報。
第四，你亦可投資銀行低風險類的產品，你可自行到銀行了解下，總之是「低風險，持續現金流」的。
你可以建立一個收息股的組合，目標是5%以上股息率的收息股，例如高息基金（3110）、港燈（2638）、深高速（0548）、香港電訊（6823）、工行（1398）、置富（0778）等都可以，你可以了解下，並從中選股。由於收息股股價都會有上落，因此要控制每一隻佔股票組合的比例，不能超15%，最好在10%以下，而3110由於是一個組合，比例可比個股高。
3110可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。
這是不差的收息組合，但增長力不強。
Q41308：
成哥 想問下有邊隻港股ETF係追蹤美國股市？
龔成老師：
恒生標普五百（3195），投資目標為追蹤標普500指數之表現的基金。在港交所上市的。
標普500指數，當中都是全球有實力的公司，有長線投資價值。
由於美股波動，不建議一次過大手買入，最好的方法慢慢分注，或以類似月供模式進行，長線持有，這是一個最好的投資策略。
另外，如果你有美股戶口，建議買（VOO），與（3195）原理一樣，不過管理費較低。但如果你無美股戶口，只有港股戶，就買（3195）都得。
Q41309：
請問月供VOO，如果個市好似而家咁，愈跌愈多，算係不止蝕？是溝貨嗎？
龔成老師：
你概念不正確。
第一，月供是一個長期計劃，例如你設定供5年、10年，只要是優質ETF、優質股，就不用太理會短期波動。不過，你要留意這些ETF/股票，質素有無改變。
第二，VOO質素當然無變，長遠正面，所以，不用止蝕。
第三，你的視點要長期，你只睇幾個月股價就認為「市好似而家咁，愈跌愈多」，其實，根本不用理。
第四，你不要太理短期股價，你要集中分析「企業業務」。
第五，溝貨是指「無計劃的愈跌愈買」，如果你整個月供計劃，一早預設好，例如設定每月入$5000，5年，中間就不用理會，只要計好金額是可合理，以及佔你整個組合%是合理，就無問題。
Q41310：
呀Sir, 蔚來的估值好難：
PS range: 0.5-1.0
合理每股營業額：47
合理價：23-47
我見市場唔太睇好佢轉虧為盈，個股價似乎都一般般。管理層系年報冇講自己發展大計/如何解決盈利事情，目前優質度又不高，投資價值/直搏率是不是存在“很大不確定性”？
龔成老師︰
你估值，大致合理。
市場對蔚來睇法，暫時唔算係太積極。因為要同最大龍頭比(1211,Tesla)，無論質素同賺錢能力，都輸。
同新手小米(1810)比，蔚來造左咁多年車，毛利率都仲要輸比個新人。加上而家都未收支平衡，所以市場唔會比太高評價佢。
蔚來（9866）長遠不是無發展，但股價上落大，要注意相關風險。
佢係中國電動汽車市場運營，生產電動汽車，同時佢發展緊自動駕駛，以及人工智慧等下一代技術的創新項目，通過佢自己的銷售網路銷售汽車。
佢亦向客戶提供電池租用服務、充換電服務（包括家用充電樁、換電站、蔚來超充站及移動充電車）、電池升級服務、蔚來積分（可在集團的線上商店、蔚來中心以及部分蔚來空間使用）、二手車服務、汽車金融方案、一鍵加電代客加電服務，以及代客取車、充電並返還車輛的服務。
長遠發展正面，現價都算合理。不過，佢始終未做到收支平衡，加上電動車近期又進行減價戰，都對佢係不利，相信之後股價依然會上落較大。如果投資，只宜小注，同時要明白當中風險。