Q42191：
老師你好，有一個有趣的問題想請教，假設你是巴郡（BRK.A or BRK.B）持有者，看見芒格去世，現在巴菲特也宣佈退休，這是否可說是該股的基本因素有重大改變？
作為投資者，應該如何處理手上該公司股票，繼續持有？
減持？定全數賣出？唔該晒。祝您身體健康，生活順心，心想事成🙏🥰
龔成老師：
我自己都有買巴郡，我買入時，已考慮了巴菲特會退下來，其實，你大約可以用「價值投資型的基金」，去簡單理解巴郡。
我相信長期來說，這是一個理想的投資，雖然巴菲特將會退下來，令回報有機會不及過往，但相信仍不差的，所以，仍可以作為長線投資。
Berkshire Hathaway Inc（BRK.B）即是巴菲特主理的巴郡B股。
巴郡是一家控股公司，擁有從事各種業務活動的子公司，包括保險和再保險、公用事業和能源、鐵路貨運、製造和零售，屬於大型綜合企業，可以理解為一個投資公司，或可視為一個基金。有質素，可以長線。
相信長遠，巴郡仍會用「價值投資法」，而這方法是全球最好賺的投資方法，因此，仍會取得理想的回報，就算不及巴菲特主理的年代，但基本上也能取得跑贏大市的理想回報。
巴郡的平貴度，建基於其資產組合平貴度的分析，考慮到現時主要持股的平貴度，大致推算巴郡合理區中間，有興趣的投資者可分注，或用月供方法去儲貨，並長線持。
Q42192：
老師，請問港鐵派息可以買入嗎
現在是低價嗎？
龔成老師：
港鐵（0066）有一定的獨特性，不過，近年的增長力略減。佢是全港唯一的鐵路營運商，加上政府會比佢地產方面的優勢，因此可長線投資。其中有4個因素影響這股的盈利能力及股價。
第一，香港車務營運收入，近年港鐵加價的能力比過往弱左，分析近年一些調整票價條款，例如會加入賣樓收益作為影響加價的其中一個因素，令港鐵在這方面的賺錢能力，比過往年代略減。
第二，港鐵其中一個收入來源，就是租金收入，雖然短期一般，但中長期都會慢慢好轉的，整體市道長遠也會好轉，因此長遠這部分仍有價值。
第三，地產因素，長遠仍是一個有價值的部分。
第四，維修成本。近年港鐵的事故增加，與鐵路老化有關，因此這方面的維修成本將會不斷增加，影響了賺錢能力。
長遠來說，只要香港市道，以及地產市道好轉，就會自然對這企業有利。港鐵始終有一定的獨特性，因此整體的質素仍在，但增長力不及過往年代，只是收息及平穩增長型的股票，現時股價合理區底部。
Q42193：
龔sir,中芯國際被制裁，技術上又未有突破，長遠嚟講係咪只會一直走下坡？thanks
龔成老師：
你最重要分析核心業務情況。
第一，在中國政策上，仍是支持行業。
第二，佢幾年前已經被制裁，一向都是這樣，而在這情況下，近年業務仍有發展，所以，與之前的核心情況，不變。
第三，佢近年技術都有進步，並不是完全無突破，而要有重大突破並不易，這點在幾年前已經是這樣，現時都是。
因此，近年的核心業務，其實無變。
Q42194：
老師，好想聽聽您嘅睇法：
AI喺短短兩三年間急速崛起，已經大規模改變緊大家在公在私使用internet嘅方式同習慣，我覺得呢個趨勢係不可逆轉，就好似當年電腦普及、上網search嘢變成生活一部分咁。
預期嘅發展走向，您認為嚟緊十年，對Google (代表 著search engines、SEO)、Adobe （雖然 Adobe CC 有 Generative AI 功能）、Microsoft （Office 家族似乎唔係咁易被取代？）、Apple呢類 tech giants ，會加速帶嚟負面影響甚至衰退嗎？
（P.S. 老師會否考慮都出條片分析吓呢個未來趨勢呢？）
龔成老師︰
係，AI而個已經係一個好實在架大趨勢，未來只會對更多範疇有影響。
至於你講10年後會變成點，我真係答你唔到，因為就算係幾個月，AI架變化已經好快(不論係Model架效能，定係應用)。所以，我地只能夠按情況，去調整自己架投資策略。
同埋，比時間去了解AI而個未來咁重要架技術，無論對你未來就業，還是投資方面，相信都會起到正面作用。
至於AI相關架分析，同埋當中一些較值得推薦的股票，我都準備緊影片係Youtube同大家分享。(不過要時間，應該今個月唔會出倒住)
至於你問架3個企業，我比少少基本架想法你，但整體而況而言，佢地依然有投資價值。
1) Google
> 佢經營模式，主要係透過佢強大架search engine去吸引用家。當使用者用佢架engine去搜尋資訊，Google就可以獲得寶貴架數據，應用於廣告投放方面(現時佢主要收入來自廣告)。但AI出現，令到大家以往有問題，就走去Google search就習慣變左，長線有機會影響佢核心潛力。
2) Adobe
> 其實有部份佢架功能，相信長線會被AI所取代，所以係有風險。(當然，佢都可以用AI去優化佢架功能，去抵銷影響)
3) Microsoft
> 佢由於有OpenAI拍住合作，所以本身AI優勢走得較前。但問題係OpenAI架優勢，已經無往咁明顯。而Microsoft本身，又未能令用AI去創造明顯架2次成長曲線，而一點係有些不利。而且，中短期佢架折舊會提升，對盈利升幅追不上，就會對佢股價造成壓力。
Q42195：
Hi, 阿sir, 點睇Sierra Sea？
想投資
龔成老師︰
西沙是新地位於馬鞍山的大型項目，提供差不多一萬個單位。
雖然項目規模龐大，但由於位置偏遠，附近交通配套未完善，同時遠離市區。因此，買入時要注意是否滿足自己的住屋需求。
同時要知道現時「未完善」的交通配套，不代表將來一定會完善。因此，樓盤的配套及位置是考慮的因素。
新地的開價已經反映上述的不足點，雖然不算高開，但對於現時的樓市而言，屬於合理，未到非常平。
如果你是買樓自住，則要符合「供得起」+「物業滿足未來10-20年的住屋需求」，同時要明白現時的配套要發展，仍然需要時間。
另外，我自己預期未來香港樓市，只會係平穏發展，唔大升，同時唔會大跌架格局(唔會好似過去20年咁一直升)。
考慮埋現時整體樓市水平，如果是投資的話，值搏率只屬一般，未到好高。
除非你資金好充裕，想透過物業去分散財富組合風險，才好考慮。
Q42196：
你好，龔老師，心情難受希望你可以舒緩我壓力，在股票市場一段時間，但現在累積虧損$26萬，手頭流動資金$20萬，到底買咩收息股或穩定增長股，可以追回多年累積損失錢，希望你可以幫到我
龔成老師︰
如果投資會令到你情緒過度波動，建議你先停一停，休息一下。
同時間，再去提升自己投資方面知識，了解過去問題出處，之後先重新上路。
投資係一場馬拉松，每個參加者都係途中跌跌撞撞咁前進，就算你見好成功架投資人，都係從無數失利中走過來。
所以，唔好氣餒，最重要係整體好自己心態，先再出發。
同時增加知識，和了解手上組合，有無需要即時調整，咁就可以。
同埋緊記唔好心急損失，因為我見太多而個心態架讀者，最尾輸得更慘。反而你調整好(用正確的)投資方法，長線一定可以追到損失有餘。
如果你想保守少少，可以考慮以下股票，用分注模式去慢慢儲，平衡買貴貨風險。
平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。
另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。
你可以建立一個收息股的組合，目標是5%以上股息率的收息股，例如高息基金（3110）、港燈（2638）、深高速（0548）、香港電訊（6823）、工行（1398）、置富（0778）等都可以，你可以了解下，並從中選股。由於收息股股價都會有上落，因此要控制每一隻佔股票組合的比例，不能超15%，最好在10%以下，而3110由於是一個組合，比例可比個股高。
最後，緊記要提升自己投資知識。因為長線投資回報，係必然同你架知識水平成正比。
我建議你要多讀投資相關書本、年報，新聞和報讀相關課程。書本上，你可以睇我寫架《圖解股票小百科》、《圖解美股小百科》、《80後千萬富翁》和《財務自由行》，都適合初學者。
Q42197：
阿sir我記得你幾年前推介過coinbase
而家升左5倍，我而家先入會唔會太遲？
龔成老師：
Coinbase Global Inc（COIN）雖然有獨特性，但真正的長期價值有多少，根本好難估。
佢係加密經濟技術供應商，佢從平臺上的交易中產生大量交易費用的凈收入，以區域來講，佢大部分收入來自美國，其次是世界其他地區。
近年BTC和ETH ETF相繼出台，而部份會對佢架託管業務造成正面影響。睇翻現時大部份BTC ETF，都係用佢做託管人。如果未來再有新的加密貨幣ETF要出台，相信集團依然能穏佔一個重要席位。
不過，大家要留意一點。以往好多人投資Coinbase(COIN)，會視之為投資加密貨幣的替代品。但隨著BTC和ETH的ETF出現，佢而個替代品架功能，可以算係完結左。
未來佢架投資價值，就要完全睇翻佢業務和市場發展。
至於它的業務價值，要分析就要睇翻虛擬貨幣長遠發展。
近期BTC和ETH都升左唔少，主要係受到新任美國總統將會由較支持加密貨幣的Donald Trump出任所影響。不過，大家要明白佢雖然係選舉架時候，講左好多對加密經濟正面的說話。但何時落實、如何落實、甚至會唔會真係落實，依然係有一定變數，所以不要因為近期加密貨幣大升，就過份進取。
始終成個加密經濟好新(雖然已經比多年前成熟)，而Coinbase整體發展依然有不確定性。
同時，以本質來說，虛擬貨幣是人為創造出來的，絕對不是「資產」，有沒有真正的價值，如何定義真正的價值，未知，亦令COIN的價值，變成未知數。
長遠的價值，取決於「有多少人用」，如果長遠好多人用，的確可能有高價值。但如果無人用虛擬貨幣，這公司都無價值。
因為分析長遠是否好多人用，是非常困難，因此，當中存有相當的風險，當然，潛力同樣都大。
你若睇好加密經濟發展，可以投資。但你要明白成個加密經濟仲係好新，故未來發展的不確定性相當之高。
投資時，緊記要控制注碼，只能投放一個輸左都唔會明顯影響組合的比重，並以數倍增長作為目標去長線持有，咁就可以了。
Q42198：
小米仍值得長期持有嗎？
龔成老師：
可以。小米（1810）以手機、智能硬件，以及物聯網為平台的公司，小米專注於互聯網直接銷售產品，近年發展電動車。
近年的業務發展理想，無論手機、ＩｏＴ、智能車，各類業務部分，都有相當的增長，除了反映不同類別的業務都發展理想外，相信小米的品牌及產品性價比高等因素，能帶動整間企業發展。
近年的賺錢能力也持續向好，多個業務類別的毛利率都有持續向上，反映企業並不是透過減價去推銷量，而是提高產品的吸引力，不止吸引更多消費者，更提高每件產品的賺錢能力。
近年企業發展智能車，由零開始到成功銷售，只用了3年時間，反映這企業的研發能力、執行力都好強，更重要是銷售理想。
雖然這刻智能車業務處虧損狀態，但只要發展理想，當產量進一步上升能產生規模效益，同時只要建立好品牌，慢慢提高汽車的賺錢能力，這部分將慢慢創造盈利。
Q42199：
龔成老師，請問點睇6936順豐呢？值得投資嗎？
另外點睇6693赤峰黄金？值得投資嗎？
謝謝你
龔成老師：
順豐控股（6936）有質素的，佢是一家《財富》世界500強企業，集團在中國五個物流細分領域和亞洲四個物流細分領域均處於市場領先地位，為客戶提供全面的物流服務，包括快遞、快運、冷運、同城即時配送、供應鏈解決方案及國際物流服務。
集團的業務模式具有三個關鍵屬性：直營模式、綜合物流能力和獨立第三方。時效快遞是集團的旗艦產品，根據報告，集團的時效快遞2023年在中國的市場份額為63.9%。
截至2024年6月30日，集團擁有覆蓋202個國家和地區的龐大全球配送網絡，運營99架飛機和超過186,000輛車輛，分別是亞洲最大的空運機隊和陸運車隊。截至2024年6月30日，集團擁有約220萬活躍月結客戶及約6.99億散單客戶，該兩項數據在亞洲所有物流服務提供商中均為最高。
企業長遠都有發展力，但始終會受中國經濟及消費力因素影響，現價合理，分注投資都可以，但都要控制總投資金額。
赤峰黃金（6693）主要從事黃金的採、選和銷售業務。截至2025年2月10日，集團擁有並經營7個黃金及多金屬礦山，分佈於中國、東南亞和西非等世界各地。
根據報告，集團是國內同行中增長率最高的主要黃金生產商，自2021年至2023年，黃金產量實現了33.1%的複合年增長率。就黃金資源量而言，集團在中國的黃金生產商中排名第五，截至2024年9月30日，集團擁有的黃金資源量為12.5百萬盎司，就黃金產量而言，集團在中國的黃金生產商中排名第五，2023年的黃金產量為461.5千盎司。
集團主要通過以下六個金礦開展黃金生產業務，包括：中國的吉隆金礦、五龍金礦、錦泰金礦、華泰金礦；老撾的塞班金銅礦；以及加納的瓦薩金礦。此外，集團在吉林省運營瀚豐多金屬礦，其主要產品包括鋅精粉、鉛精粉、銅精粉和鉬精粉。此外，集團計劃在老撾開發稀土資源。除開採業務外，集團還從事資源綜合回收業務，回收廢棄電子產品和電器。
企業一定的規模及發展，但新股財務數據可信程度只是一般，加上企業會把握業務較好的時期去上市，所以，未能確定是否高質素。
因此，這股只宜小注投資，相信長遠都有發展力的。
Q42200：
龔Sir, 我睇你嘅Facebook回覆有啲留言講到其他低風險、收息工貝。 我好有感受想同你分享吓。
我嘅崗位係一間零售銀行🏦客戶服務主任（teller)，我哋最重要責任之一係做 referral (轉介） 一啲客人畀 銀行客戶經理（Relationship Manager) 見面，傾。
通常我會傾向客人嚟做定期存款嘅時候就旁敲側擊講埋有一啲風險相對低、比定期穩陣收息工具。
但係人客都唔願意聽唔願意見。一未只係做返定期，令到我好氣餒。
歸納出常見原因係：
唔認知嗰啲係乜嘢嚟/ 唔想承都唔受風險（覺得好高風險，實際唔係）
請問你有冇啲乜嘢建議可以俾到我可以提高個勝率？
（問上司總係話會答：「多開口」、「大數法則」）
點解啲人淨係會考慮定期 唔諗下存款證嗰啲？明明利息係真係多啲。
龔成老師︰
其實你講到個重點，因為人唔理解個樣野，一般都會避之則吉，甚至當佢係騙案就算，心理上就唔會有錯過左機會架感覺。
至於點樣增加勝率，坦白講你係短時間會面，又唔太清楚佢背景和投資知識情況下，係有難度。
特別係本身做定期一班，很大機會係好保守，或者經驗淺架投資者，要說服佢地轉買其他工具係難。
但除左比客觀數據佢之外，可以鼓勵佢試少少先，等佢接觸左先，咁會較好。
當然，要了解清楚客人本身能力和需求，再提供適合佢地風險和能力程度的產品，永遠都係最好。
最後，有些客戶對銀行一開始就有戒心，你講所有野都唔聽，所以，你要令佢地有信心先，而不是一開始銷售。
若你有問題想向本人發問，可在龔成的fb專頁中（www.facebook.com/kungshing80）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，所有個案及意見，只是供大家參考，只是教學分享，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。