Q24141：
你好 請問如果一個人對錢無乜慾望可以點樣改變? 低慾望想平淡過生活 一方面又想改變 究竟賺錢最大意義是什麼?
龔成老師：
你可以從長遠角度出發，這刻可能你生活不成問題，但到將來，可能負擔增加，又或收入減少，到時怎算？這刻都要有累積財富的概念，否則日後就太遲。
另外，你問自己有無甚麼好想做的事、夢想、想擁有的東西。有些人，只是將現實打敗，因此產生「還是不要有慾望」的想法，例如有些人，已認定自己買不到樓，不如不去儲首期，不如將所有錢用光。
Q24142：
成哥，我最近入咗6616、2208同1799，請問你睇好嗎？謝謝
龔成老師︰
環球新材國際（6616）質素不過不失。
佢主要在中國以「七色珠光」品牌從事生產及銷售珠光顏料產品及合成雲母粉。佢的珠光顏料產品涵蓋不同用途及行業，包括汽車塗料、化妝品、工業塗料、塑料、印刷、紡織品及皮革以及陶瓷。
珠光顏料產品主要使用天然雲母、合成雲母（其模擬天然雲母的成分及結構，並在受控環境下透過合成各種礦物而製成）、玻璃片及二氧化矽為基材，在該等基材上塗覆單層或多層金屬氧化物。
近年的業務都有發展，不過上市唔久，財務數據經過修飾，同時較難估值。現價唔算平，投資值博率好一般。
若你持貨不多，可以照持有。
金風科技（2208）主要從事製造並銷售風力發電機組及風電零部件，佢有提供風電相關諮詢，風電場建設、維護服務；建立及經營風力發電場；以及提供污水處理業務及融資租賃服務。
整體算不差，但股價有點波動。睇佢近年股東回報率都有下跌，代表佢賺錢能力弱左。加上此股負債不輕，都係一個風險因素。
此股可投資，但不宜持有太多。
新特能源（1799）係太陽能級多晶硅生產商和光伏項目承包商，主要從事中國光伏產業上游和下游環節的業務。
佢除左多晶硅生產外，亦從事電力銷售（透過自有燃煤發電廠供應電力多晶硅生產之用，並銷售多餘電力予當地電網）；工程建設承包（根據ＥＰＣ、ＰＣ或ＢＴ承包模式經營，為光伏及風電項目提供能源解決方案，包括工程設計、諮詢、建設、調試及運維）；逆變器生產（用於光伏項目的一項關鍵部件）及光伏硅片及組件生產。
其實過往的生意與盈利唔算好突出，同埋有D波動，早前新能源有炒作，佢都炒起左。
雖然近半年業績有增長，但長線實質支持係咪好大，未知。但建議保守少少，暫時這股投資值博率不高。
Q24143：
龔sir, 現年65歲，有自住物業約1200 萬（欠按揭250萬), 另1個物業約920萬 (冇按揭),收月租18000.有個車位130萬(冇按揭)，收月租3000.
另加現金約300萬，另手頭有以下股票和買入價
-
003 ( 17000@ 12.45)
-
358 ( 2000@ 18.86)
-
813 ( 6000 @22.93)
-
941 ( 5500 @50.80 )
-
9988 ( 600@269. )
-
9888 (600@190)
-
9618 ( 200@ 234.) 可惜約2個月前我才開始跟隨龔 sir 的網頁，唔識投資技巧, 而這些股票都是之前高價買落，不捨得賣走，希望龔 sir 能解答以下問題
-
想問怎樣才能走出以上高價入貨的困局?暫時都蝕緊 200K
-
我可否溝淡 813 和 9988 ? 3 .我希望3年後退休，退休後希望有被動收入每月50000. 要怎樣才能達到 ?
龔成老師︰
- 買貴左，固然係不理想。但當我地已經持有一隻股票後，"買入價"已經唔再係我地是否持有一隻股票的標準。反而，我地係要睇佢長線質素，同埋是否適合你。
你現時持有股票，都係有質素。但你已經近退休之年，選股上再唔應該集中係一些高增長股上。你應該穏定為主，故一些平穏增長股和收息類股份，會較適合你。
你現時持股中，除了中國移國(0941)和煤氣(0003)係適合你之外，其餘都是風險較高的增長股。建議你分段慢慢沽出，換至其他平穏增長或收息類股票，會較好。
- 我地決定加注與否，要睇幾個因素，記住，並不是「拉低平均買入價」為目的。
第一，要分析這股的質素，如果無質素，就再跌都唔加。
第二，這股的類別，如潛力或增長或收息類等，是否與你的財富組合匹配，比例是否適合。
第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。
第四，現價是否有投資價值率，要平，或起碼合理，不能貴。
第五，你要在加注後，仍有現金剩。
記住，重點不是「拉低平均價」，而是組合比例與配置。
以你情況，就要留意第二點，這些股票明顯與你人生階段不匹配，所以再平，都不要再加注。
- 如果你希望3年後每月有5萬蚊現金流，以股息率6%計，你需要本金1000萬。
扣除你物業租金回報，你每月大約要用收息股，去創造3萬蚊現金流，即要600萬本金。
你現時現金和股票，加起約380萬。你可以用餘下3年，作適度增值。不過，你預每年平均只會有7-10%左右增長，要做到600萬，單靠現有資金，較難做到。
若你要做到3年後有600萬，每月最好額外投資多$25000-30000左右，才較大機會達標。
以下是你可以用來增值的股票，現價合理。
若你想進取些，可集中「平穩增值股」，相反你想保守少少，可以集中在「收息股」上。但比重要隨著年齡增加調整，你要慢慢上調收息股比例。到退休時，你收息股比例，應提升至100%。
同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。
另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。
Q24144：
龔成老師，想請問意見0327 百富環球POS機製造商，長遠值得投資嗎？thx
龔成老師︰
百富環球（0327）係一家電子支付終端機解決方案供應商，主要在中國從事開發及銷售相關產品並提供相關服務。
由於遭FBI調查佛羅里達辦事處，懷疑其可能有參與對美國和歐盟的網絡攻擊。集團早前出現短期停牌。
由於未知是否真的涉及網絡攻擊，又或只是一些政治因素，無論那一個可能性都好，對佢發展都會一定的影響，同時反映業務會有不確定性，因此，風險度提高左。
另外，早前消息指，開始跟集團停止業務的Fidelity National Information Service, Inc.及其位於英國（「英國」）的聯屬公司Worldpay, Inc.已於2021年10月初停止在美國及英國安裝百富終端。
當中收入，佔本集團該年度總收入約0.25%，故影響不大。
雖然本質暫時未有重大變大，但集團本身就未算好強，同時業務與股價都有點波動。其實現時由於業務有潛在不確定性，因此估值難，比起之前股價大跌後，勉強現價算是合理價，算是反映了風險。
但由於有業務不確定性，因此投資要小心控制注碼。
Q24145：
老師，剛完成了股票班最後一課。
請問進進階班要如何備課，見到cover 的範圍都好廣泛,我自己沒有讀和經濟相關課程, 怕聽吾明。你的講解我都可以聽得明，但如果沒有你的ppt , 我就要慢慢每一個資料自己搵。
所以想知道相關書籍，先看看。thank you
龔成老師：
進階班係初班的延伸，不是特別深，但就是初班內容（特別是第4-8堂）的延續。
首先，我建議你溫一次初階的內容，無論是PP版的筆記，還是文字版的筆記，都溫多次，另外，試下睇年報，用課堂比你的評估表作分析。如果你能夠每個月分析1、2間企業，實力將會大增。
你在上進階班先，可以睇我的《股票勝經》、《選股勝經》、《年報勝經》，到時就較易跟到。
Q24146：
想問下 136可以考慮入貨
龔成老師：
恒騰網絡（0136）有危有機類。
現時企業盈利不多，之前市值極高，市場對「前景」有無限幻想，有時炒作會升好多，但跌都可以好勁，最近就是因為資金問題而下跌，因為佢的發展，是極要資金去支持，因為佢自己未能有正數的經營活動現金流。
恆大退股後，算是好翻D，但預測市盈率仍高達60倍，略貴。
如果長遠業務成功，會增長得理想，但失敗，會跌得好勁。因此，長線投資要很小心，要明白高風險，同時只能小小注。
Q24147：
Hi 成哥，1263 栢能有潛力嗎？它是meta universe 概念股
龔成老師：
栢能集團（1263）係有風險，有回報的類別。佢是有少少元宇宙概念的。
佢產品分類為三大類：圖像顯示卡、電子製造服務（ＥＭＳ）及其他電腦相關產品及零件。潛力度是有的，但風險都大，現時唔平，但如果產品持續有需求，以及行業持績有發展，又未算好貴。
但這股業務始終好波動，因此，如果投資一定是小注，或可等回落少少，先可考慮小注。之後明顯下跌先加注。
如果本身有貨，都可以長線的。
Q24148：
阿sir如果係資產配置方面，如今香港以及國內情況十分多變，是否應在投資組合中部署美股（非中概股），類似有10隻股票，逐漸視乎情況增持20%美股 80% 港股，你覺得這個方向是否可行，或者有無建議？多謝阿sir百忙賜教
龔成老師：
可以，始終平衡在不同的市場，都是風險管理的方法。但美股現時唔平，我會建議以分注的模式，慢慢買入指數基金VOO，是較穩健的策略。
Q24149：
龔成老師,多謝以上股票組合,會作長線收息用。
另外有一問題望能百忙中抽空解答,如果有一車位170萬,用100萬買,做70萬按揭,而每月收租4000元,老師覺得可以嗎？
期待回覆,萬分感謝！
龔成老師︰
單從車位投資角度，現時整體租金回報率不高，唔算係一個理想的投資項目。
不過，我考慮到你是已退休人士，和你財富分配狀況。(假設你跟我之前講，將300萬平衡分配係個5個項目上)
這個車位，我覺得你可以保留，用佢收租之用。不過，你唔好預佢會有太大升值潛力，主要係收下租金，為你創造多一份被動收入而已。
Q24150：
Hi 龔sir 頭先聽左你分享夢想嘅短片，雖然好好奇你嘅夢想會係什麼，但我知道呢一刻你未必想分享比大家知住
所以我反而想問另一個問題，龔sir有冇經歷過個感覺就係當你實現左自己有一個夢想之後，就好似唔知道點樣再尋求突破 好似人生遇到樽頸，
明明實現左個夢想(eg dream job)，但一段日子過後覺得有啲迷失，你係點樣去突破呢個樽頸再搵下一個夢想嘅？
你有時間心情先再同我地分享呀 thank you & gd rest
龔成老師︰
其實當我完成一個夢想，就會自自然然想追求另一樣野，所以唔會有太大樽頸位。
因為，我唔係一個滿足於現狀的人，你有睇過我寫架書，應該會明。
所以，我係會一直追求進步，不論係投資，定係人生，都是這樣。當然，你唔洗迫自己，完全一個目標下一秒就要迎來新挑戰。
只要你保持一個前進的心，咁就可以。