Q23681：
老師，想問下隻RBLX，你點睇，值得投資嗎？
龔成老師：
Roblox Corp (RBLX)是一家科技技術公司，專注於打造共同體驗的3D創意平台，供用戶參與和生成遊戲娛樂內容。令用戶除了享受當中遊戲外，也可以成為創建這個遊戲社區的一份子。
而且，集團平台Roblox Studio更提供教學和工具，幫助初級開發者，去創建屬於自己的遊戲，長線有利於平台發展。
業務性質，算係幾特別，有值得關注的地方。近期此股已經因為元宇宙的憧憬，而被炒起不少。不過，元宇宙成件事仲係好新，未來發展成點，無人知。
但睇翻佢現時財務數據，依然係未做到收支平衡。加上集團才剛上市不久，不確定性偏高。
坦白講，這股現時已難估值，如果佢因元宇宙而變得好勁，咁現時就算再升都唔算貴，但如果最後與預期不同，股價就會大跌。如果你睇好，就當買左後唔理，由間公司成長，但心態上當這筆錢輸左都無所謂，博佢多倍的增長。
從業務上分析，都有佢投資價值。但投資時，始終不要太進取，小注好了。
Q23682：
龔sir你好，想請教你，BITO ETF 值得投資嗎？
龔成老師：
BITCOIN ETF（BITO）是追蹤比幣特價格走勢的ETF，但要留意，佢不完全跟到比特幣走勢的。
因為BITO並非直接持有比特幣，是投資芝加哥商品交易所的比特幣期貨，故此，ETF與比特幣的價格走勢將有偏差，回報亦並非一致。
留意翻，始終比特幣的真正價值好難估，自己要小心衡量風險。
以本質來說，比特幣這些加密貨幣是人為創造出來的，絕對不是「資產」，有沒有真正的價值，如何定義真正的價值，未知。
這些人為創造的貨幣，因為關注度由很少變得大，價格會大升，但這背後是否有真正的支持，我不知道。只能說，投資這些貨幣，投機味好重，可能大賺，亦可能蝕到一文不值，因為，當中有沒有價格，我不知道。
但這不代表佢無價值，佢可能好勁，只是我自己不知佢好勁定好差。
佢長遠的價值，取決於「有多少人用」，即是說，雖然無真實價值，但可以有「交易價值」，如果長遠好多人用，的確可能有高價值。
如果你分析到佢長遠的交易大，大家都持續關注，就有價值，就值得你投資。
另外，你可以從這些貨幣和其智能合約平台，長遠是否有功能上的價值去分析（部分可能有的，但就要仔細分析）
我並沒有支持或反對投資虛擬貨幣，只能說，虛擬貨幣風險高，因此不建議大額投資。
或者你可以用以下的心態投資，首先，你預期可能會大跌，心態上只用「閒錢」投資，就算不幸大跌對你都無影響，但你的要求回報一定是倍計，博虛擬貨幣有多倍計的升幅，絕不要升少少就賣。
Q23683：
你好，龔sir,打擾你了。本人想請教你一些關於資產問题，謝謝你。
本人45歲，末婚，失業中，和媽媽同住，不用交租，每月家用給媽媽＄8000，流動現金大概5萬
本人資產如下：
2020年以＄530購入屯門滿名山1房單位，現市值約＄560萬，欠按揭＄75萬,每月還款大約＄3000,現收租＄13000，管理費每月＄1739
在恒生銀行購入9999實金條30両共6條，買入價＄19450一両，共＄583500
股票如下：(持股總值約HKD130萬)
700@200股＄674.872
9988@600股＄294.32
9618@200股＄364.67
1024@200股＄339.192
9888@50股＄252
2618@100股＄47.304
2@3500股＄74.169
3@12600股＄10.694
823@1541股＄64.45
2628@4000股＄21.848
1658@10000股＄5.12
1113@500股＄55.32
788@20000股＄1.5
178@10000股＄2.275
909@2000股＄50.57
6690@2600股＄36.759
1573@10000股＄2.07停牌
1183@15000股＄1.347
1760@6000股＄7.25
175@3000股＄28.305
493@15000股＄2.061
龔sir,請見諒，我現在不知怎樣做好，已失業2年了，又找不到工作。每樣投資都失敗,可否給我意見教教我怎樣做好。
希望龔sir回覆，祝你身體健康，事事如意。
龔成老師︰
我明白，你個種2年找不到工作，再加上投資帳面上雙重失利的沮喪感。
但係我地都要了解翻，現時成個客觀大環境。近1,2年香港受社運和疫情影響，市道本身都唔係咁理想。再加上，若果你工作行業，對這些事情較敏感(如旅遊、飲食等)，影響性就會更大。
所以，唔係因為咁就完全否定自己的能力。中短期，你預找工作都會有一定難度。你可以試找一些其他行業工作，全職兼職也好，當比機會自己學多樣野，KEEP住個工作狀態。同時可以提你收入，減輕財政和心理上壓力。
至於投資方面，你現時持有股票，大體上都有質素，可長線持有，但要留意以下幾隻股票。
根據南方能源（1573）於2019年07月29日發佈的報告、其獨立非執行董事及執行董事辭任、核數師辭任。加上附屬公司破產重整，令佢需要停牌。
而問題至今，依然未解決。其實這類規模較小的公司，賬目有問題的機會的確較大，有一定投資風險。
這類股你要小心，如果佢真係復牌，相信都會較弱，沽出會較好。但由於依然在停牌狀況，故只能等。
國美零售（0493）和中國人壽(2628)質素好一般。而快手(1024)、百度(9888)、京東物流（2618）、明源雲(0909)、英恒科技（1760）風險都較高，這7隻股票，長線都不宜持有太多。
另外，你投資有個較大問題。我發現你好多股票，都係用一個貴的價格買入，這個也是你長期出現帳面虧損的主因。
相信你較易受市場氣氛影響，去入貨的人。同時你對企業估值能力唔高，因此經常在貴價位買入。建議你日後多用月供，或分注的投資策略，等你有企業估值能力後，先一手手買，會較好。
只要你處理好這個問題，相信你長線投資回報，會慢慢變好。
至於這些持股，唔好因為買貴左，你就去沽貨。因為無人知佢會唔會再升，而且都係有質素的股份，你照持有會係較理想做法。
其次，你長線投資最好集中翻係10-15隻股票中，這樣你才可以有效地定期檢視佢地質素。若太多，長線你會好難打理。
最後，我見你都有好多實金係手。其實黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。
不過，黃金沒有現金流，持有無法創造出經濟價值，其主要作用是對沖黑天鵝事件。
所以，你可以投資黃金，但不用佔財富比例太多。若你係較保守投資者，黃金佔組合比重1-2成好了。
由於你待業中，加上手上股票已有好多貨。故你現有資金，先留做應急錢。到你將來找到工作，資金較充裕，而大市又有好明顯回調，你才好考慮再投資。
記住，困難只會係一時，只你要保持樂觀和正面的心態，自然會一步步走出困境，加油!
Q23684：
老師，之前1.5買入中國鐵塔應該要走嗎？
龔成老師：
中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面，不過，增長力弱左。
佢現時的收入都增長，盈利都保持向上，但增長比之前略減，加上股本回報率不高，是這股較弱的地方。
若分析佢市盈率，會見到現時仍然處較高水平，反映佢雖然股價回落左唔少，但仍然未到平。
這股算是合理價。
這股長遠仍算有發展力，可長線。不過，潛力度比過往略減，同時賺錢能力比預期減左。
如果持貨多，可能減少少，但如果不多，都可守住先，但要等佢上翻，相信仍要耐心。
Q23685：
龔Sir, 我由上個月重新開始了月供股票計劃, 分別係 0066 ($3000), 0285($2000),1038($2000) & 2800 ($3000),
總數$10000/月…大約佔我每月收入的1/3…
以我現時40歲, 而居所已供滿, 有2個仍在讀高小的小朋友, 如想10年內建立每月被動收入有$30000/月, 可會有什麼建議呢? 謝謝
龔成老師︰
若你希望10年後，每月有3萬蚊現金流，以股息率6%計，你需要本金600萬。因此，我地要以這600萬作為目標，透過一些有增長力的股票，去累積這筆資金。
到10年後，再將這些有增長力股票，換成為收息資產(如收息股、年金、債券等)，去創造你需要的3萬蚊現金流。
以你40歲，現時月供配置，係合適的。
但現時大市只在合理區，每月儲蓄唔好用晒去月供，要留有部份。等大市出現較大回調時，可以去入平貨。
以大市過去年平均回報10%計（連股息再投資），你每月投資$10000，10年後大約會增值至200萬。如果要達至你的財務目標，你可以增加投資年期，例如去到18-19年，就會滾存到$600萬，較接近你的目標。
或者，你可以選擇加大金額，都是一個方法。
又或者，你可以提高你的回報率，例如投資較多潛力股，去加快完成累積這筆資金的速度。當然，這會令你風險度提高，以及要求你有更多的投資知識，你都要明白這點。
Q23686：
問題1，老師點睇3300中國玻璃，見佢回落唔想，有意想入，請問現價2.13處於咩水平,同埋係水桶1嗎？
問題2，老師50值搏倍升股書中其中一隻1558東陽光藥，
我留意左一段時間，e家創新低4. 11,由盈轉虧，係咪已經冇左佢既優質度？唔應該買入？如果佢優質度不變，現價是大手買入搏倍升的時機嗎？
龔成老師︰
- 中國玻璃（3300）主要從事生產、營銷及分銷玻璃與玻璃製品；設計及安裝藥用玻璃生產線。
佢的產品包括無色玻璃、有色玻璃、鍍膜玻璃、節能及新能源玻璃產品（如超白玻璃、低輻射鍍膜玻璃及光伏電池模塊產品）。
這股不差的，雖然規模未到好大，但發展正面的，有增長力。
整體發展正面，但盈利有點不穩。現價合理，都有長線投資價值，但就要留意股價較為波動，不建議太過大注，這股算比較偏向水桶2。
- 於在2020年，受新型冠狀病毒肺炎疫情影響，中國國內人口流動性降低，醫院的診療活動數量、處方量及藥品銷量也隨之下降，因此集團收入有較大下滑，更出現虧損情況。
疫情相信係中短期問題，唔會長線影響企業，故長線發展都會依然正面。
但業務的確開始有少少轉弱，加上業務都有風險。雖然現價係吸引，但某程度都係反映市場對佢睇法較淡。
因此，此股係可以投資，但唔可以太大注。
Q23687：
成哥你點睇卜蜂國際(43)呀?
我睇到佢個業務屬於產銷動物飼料產品；繁殖、養殖、畜牧及銷售禽畜和水產；及產銷加工食品。雖然豬溫對佢業務有所影響,
但佢係vietnam嘅業務開始成長,加上近年氣炸文化上升,都多左人買佢嘅產品.不過現時估價偏貴,$0.8會較合理.
佢今年因為出售左佢65%股權收購中國其他豬場,你認為是否合理?
但盈利又唔穏定,是否唔會擺太多?
龔成老師︰
卜蜂國際（0043）主要從事產銷動物飼料產品；繁殖、養殖、畜牧及銷售禽畜和水產；及產銷加工食品。
業務穩定，但增長力不強，這股收息可以，但由於有部分是特別息，之後未必會有，因此都要明白有變數，唔建議太大注投資，但就唔好對股價有太大期望。
現價算合理區頂位，只宜小注。
另外，大股東早前已提出將公司私有化，作價$1.15。若通過後，就會取消上市地位。
若你決定賣比大股東，其實你基本上等同白做，無賺無蝕。若你持有，佢退市後你交易會好麻煩。故你要考慮清楚。
Q23688：
成哥你好，我係進階股票班舊生，岩岩9月完最後一堂。小弟第一次問問題，唔清楚的地方請見諒。
小弟今年29歲，有個仔，做緊日校老師。
早前睇左您的《80後千萬富翁》，你曾分享到由銀行辭工到創業，令我都有少少心動。（最主要係工作太忙冇乜私人時間，有時星期六、日都要做學校野，唔想咁就一世）
都有跟開成哥買股票。想問下當時你辭工個一刻，其實係心中有哂藍圖？定係都係辭工後再諗搞股票班、出書等action？有諗過自己quit工，最多都係做到開補習班，
都係唔穩定都未必有之前咁多收入（現時都係4萬左右）。人生有點迷茫，請求指點一二，謝謝
龔成老師︰
我當時辭工個一刻，其實我好明白自己都留係度，都只會好似我做左好多年架同事咁，唔會有太大發展。
你話要去到好仔細，每一步點行架藍圖，我個下係無。但我會有個明確目標，同埋點向前架大方向。
出書和教班，係有預先諗過，但仔細係寫乜野書，開點樣架班，係慢慢摸索。因為成件事係一個長線計劃，你好難寫到好死，有些部份必需要係摸石過河。
當然，我都會作出最壞打算，但整體衡量過後，發現好值得為跳出舒適圈而冒險。
我地最好在實際開始計劃前，為自己預留一定資金，助渡過計劃開頭收入較不穏定時期。
不過，你唔一定要完全跟足我的做法。因為每個人生活背景和家庭負擔都不同。
如果你想改變現時生活，除左即時跳出舒適圈，你都可以用較保守方法。就係先透過投資，去累積一筆資金。而這筆資金規模，足夠創造支援你全部或大部份家庭生活開銷，才辭工開始你想做的計劃。
此期間，若你有工餘時間，可以學一些幫到你未來計劃的技能。
雖然這個方法，需要時間多左，但可以對你和你家庭的壓力較細。你可以在2個方法中，找一個自己最適合的平衡點，才開始計劃長線點去進行，加油!
Q23689：
Hello, 龔sir, 有幸在前年年頭偶意看到你的fb, 然後再買你啲書睇，睇完真係恍然大悟，以前齋儲錢既做法好蠢，浪費左初初出黎做野最黃金既10年將資本增值。
我係專業人士，好想財務自由多啲時間陪小朋友，而家睇緊你本千萬富翁，但一直無頭緒做咩生意，我見書話從興趣同身邊事物著手，
但坦白講，平時真係好忙無乜時間講咩興趣… 請問可指點迷津嗎？
另外，可點樣結識志同道合既人？係咪參加啲投資班識人？我諗我係唔係好清楚具體可以從何入手？謝謝
龔成老師︰
好多人都以為，儲現金就係等同儲錢。其實現金只係政府借據，佢可以無限量發行，長線只會貶值。因此，我地應以可以抗衡貶值和有增長力的優質資產，生意係其中一種，優質股和物業都係合適選擇。
在創業方面，我比較建議從你的興趣、強項、認識的事著手。因為你會較有動力，和相關產品的基本認知。
但若果你係無特別興趣，你可以找一些有志創業，又可靠的朋友合作。你地可以就住大家技術和知識優勢，去決定如何發展。
例如，你有個對咖啡好有認識的朋友、另一位朋友則有餐飲營運經驗，但2人都缺資金，而你就有可以填補這個缺口，就可以成為一個創業團隊。
至於係邊度認識人，你可以先從自己認識和信任的人著手。其次，可以參加下D商會、創業相關活動之類，都會有機會識到人。
不過，如果你係同人合作做生意，你預較多麻煩事。記得大家規矩要定得清清楚楚，以免日後有爭吵。
Q23690：
龔sir你好，有關股票既疑問想問下你
我係澳門人今年25歲，剛入職公務員，已家每月薪金3萬至4萬，薪金有7%放落公司會幫我買基金，每月草1萬5至2萬，現儲蓄戶口約有20萬。
現時有興趣想買股票，暫時每月分5千落股票戶口，未持有任何股票。因為我三更輪班工作，翻工都睇唔到手機，所以交易時段我通常都睇唔到/係訓緊覺，
覺得自己適合買一啲月供股票/長線持有唔洗點理既股，現時想買2800及3110，想一路收息+長線投資，龔sir覺得現時股價可以買入嗎？
2800想唔月供形式，想每三個月買一手，3110就每月入一手，龔sir覺得如何？
會唔會仲有其他股票可以推介給我？覺得我應唔應該分配更多錢去股票到？
因為我係投資初哥，對於短炒個啲都唔係好識都唔敢落手，我有睇你本80後百萬富翁，會唔會仲有其他書可推薦給我？
謝謝你
龔成老師︰
我想先糾正你一個錯誤的投資觀念，我地投資一定係長線，你見全世界最成功的投資人巴菲特，都只會做長線投資，唔會短炒。
因為中短期股價，可以因為好多因素影響，有些因素甚至跟企業無關，所以無得計。但長線企業價值，必然會反映在股價上，只要長線持有優質股，就自然會有理想回報。
所以，我地唔會好似坊間散戶咁，經常要睇住個股價上落。反而係投資前，我地要做較多準備功夫，去分析一間企業質素和平貴度，以制定入市策略。
當買入後，只要佢長線質素無明顯轉壞，我地長線持有，讓其自然增值就可以。
當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。
以你現時25歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。
策略上，你可以投資「平穏增長股」和「潛力股」。盈富(2800)係適合，但未來恒生高股息率（3110）純粹係收下息，無乜增長力，唔建議投資。
至於每月投入金額，建議你把握年輕優勢，盡力去累積財富。你每月5成儲蓄做月供。其餘先儲起，用一邊月供一邊儲蓄的策略。
選股上除了盈富(2800)，你可以投資在平穏增長股︰恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。如果有投資美股，可投資VOO。
潛力股可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。如果有投資美股，可投資QQQ。但佢地波動性和風險會較高，你要自己平衡。
但你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。
到將來你有一定投資知識﹐潛力股比重才可以相應調高，佔組合約3-5成，視乎你當時投資知識多寡和了解這些股票程度而定。
大市現處於合理水平，那20萬資金，可以現價先入2手盈富(2800)。餘下資金和每月儲蓄，就等你有更多投資知識，或者大跌市機會出現時，才大力度掃貨，並長線投資。
同時間，你要去多讀投資相關書本、年報，新聞和課程。
書本上，除左《80後百萬富翁》，你都可以睇埋《財務自由行》和《股票勝經》，都適合初學者。
另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。
我之前都有開過澳門班的，不過現時疫情，所以暫時停左，之後會再開翻的。
你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。
因為現時已有好多澳門人留左位。