Q46041：
港鐵經常出事，會否影響收入到印象？
龔成老師：
少少，但不是核心，除非佢持續多日出事，否則，一般人如果平日習慣搭港鐵，好少會改變。
但當中都反映，港鐵的維修費用，可能要增加，令成本上升。
港鐵（0066）有一定的獨特性，是全港唯一的鐵路營運商，加上政府會比佢地產方面的優勢，因此可長線投資。
港鐵早幾年股價較弱，到近一年開始好轉，現時港鐵的情況正好轉中，但並不是快速增長模式，而是平穩增長。先拆解港股股價近年較弱4大因素，而部分不利因素正減退，令股價開始好轉：
第一，香港車務營運收入。2024年營業額為$600億，比上年增加5%，比疫情年代明顯好轉，令股價慢慢向上，但始終增長力度不算強，之後只會平穩增長。
第二，港鐵其中一個收入來源，就是租金收入。近一年，市道略有好轉，但不能用「十分好」去形容，相信之後也不過不失，令股價平穩增長，但不是大升。
第三，地產因素。港鐵其中一個收入，就是物業發展部分，這是一個主要的收入來源，早幾年，港鐵的地產收入十分差，而近一年，香港樓價回穩，市場氣氛好轉，港鐵這方面收入也增加，相信之後會好轉，不過不失。
第四，維修成本。近年港鐵的事故增加，與鐵路老化有關，因此這方面的維修成本將會不斷增加，影響了賺錢能力。
總結上述的因素，港鐵最差時期已經過去，各業務也好轉中，港鐵始終有一定的獨特性，因此整體的質素仍在，但增長力不及過往年代，只是收息及平穩增長型的股票，現時股價合理約中間，有興趣投資者可分注，有長線投資的價值。
Q46042：
sir 2388中銀香港40蚊貨。比哋建議！咩價食呀？還是可繼續keep!
龔成老師：
因為佢近年業務有實質增長，股息也保持向上，令這企業就算股價上升不少，也未貴，因為有實質支持。
大方向上，建議你持有。
現時要睇你貨多唔多及本身的投資目標，如果貨多，或你本身不打算長線，都可考慮減持。但都建議你保留部分貨長線。
中銀香港（2388）長遠有質素，是收息及平穩增長類的股票。
這股近年業務持續好轉，除了反映香港及其他地區經濟開始好轉外，這企業由於有不少按揭部分，現時香港樓市穩定，也對這股有支持。
在中長期，經濟會持續好轉，樓市會穩定，因此，這企業仍正面。
Q46043：
可以介紹一下月月收息的ETF嗎？那一隻高息？買那一隻好？謝謝！
龔成老師：
記住，選擇收息股最重要係質素，唔係一年派幾多次息。如果你係要每月收息，其實將全年股息集埋，自己再分配成12份就可以。
如果坊間每月派息ETF，較熱門有3466、3416等，你預3466較穩陣，3416風險較高（投資只宜小注）。
恒生高息股30指數ETF（3466）是一隻指數追蹤基金，其旨在盡實際可能取得（未計費用和開支前）接近恒生高息股30指數的價格回報表現。
此基金其一個特色，是香港上市股票通常會每季或每半年派息一次，而恒生高息股30指數ETF旨在每月派息。
不過，大家要記住，選擇收息股最重要係質素，唔係一年派幾多次息。如果你係要每月收息，其實將全年股息集埋，自己再分配成12份就可以。
至於此ETF，主要係投資於金融類股份，佔接近4成，其次是佔約2成的地產建築業。
當中最大持股，包括中國飛鶴(6186)、電訊盈科(0008)、遠東宏信（3360）、恒隆地產（0101）等。這些股票都有質素，適合長線收息。
此股可作收息之用，現價合理，可分注儲貨。
ＧＸ國指備兌（3416），之投資目標為透過投資於恒生中國企業指數的成份股本證券，及沽出相關指數的認購期權以收取認購期權買方支付的款項（期權金），以產生收入。
由於這ETF運作，並不是無風險，所以，高息是否保持，無人知，同時要明白有價格波動。
由於這ETF成立時間不算長，而這段時間，港股大致是向上的。
但佢始終未經歷過港股下跌週期，未知做成點，所以這個是最大風險（到時派息會否大減？價格會否大跌？無人知）。
我並不是說不能投資這ETF，而是要明白上述的風險，同時在注碼上不宜過多。
Q46044：
龔Sir，唔好意思，唔知點解喺Facebook Post 咗兩次我嘅portfolio 俾你救我都post 完唔見咗，而家唯有Text 你，啲attachments係我哋之前嘅溝通
我仲有幾年就退休，而家又失業，又肯定搵唔返以前嘅高人工，而且肯定唔夠錢退休，
我想有個平衡穩家嘅組合，但又想有啲潛力股幫補吓第日退休，以下係我而家嘅組合，麻煩幫我睇吓我而家可以點，呢排每日蝕萬幾，有時2萬幾，睇落都心寒，巳經蝕入肉，而且而家係股票低位又唔敢沽：
Coinbase - 3.83% @ $432
Futu. - 9.16% @ $89.59
NVDA. - 6.4% @$155.6
SLV. - 1.48% @$90.13
TSLA. - 5.15% @$314.46
騰訊. - 52.92 @$529.083
小米. - 7.72% @$48.786
SPDR. - 5.58% @$3,964
美團. - 5.93% @$123.085
京東. - 1.72% @$129.145
龔成老師︰
我明白你現時處於一個2難局面，但始終你係接近退休之年，我地一定要守住基本本金為優先。
你現時組合，除了SLV，其餘全部都係潛力股，這類型股票風險太大。
就算年青，又有經驗，都不宜佔組合一半以上，更何況你接近退休年紀，所以組合風險過高。
未來時間，應以「平穩增值股」+「收息股」作主力。
如果你真係好想加大潛力，潛力股最多佔組合2成好了。因為潛力股增長潛力係大，但發展不理想時，跌幅同樣驚人。
而你就退休，如果投資失利，你係無時間追翻D損失，所以建議你要"穏"為先，"攻"為次。
未來時間，你要慢慢換碼去以下股份。
若你想進取些，可集中「平穩增值股」，相反你想保守少少，可以集中在「收息股」上。但比重要隨著年齡增加調整，你要慢慢上調收息股比例。到退休時，你收息股比例，應提升至100%。
平穩增值股，例如指數基金，美股如（VOO）、港股如盈富（2800），另外再加：美股如巴郡（BRK.B）、蘋果公司（AAPL）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、恆基（0012）、港交所（0388）、領展（0823）、長建（1038）等，你可以自己了解下，並從中選股。
同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、置富（0778）、陽光（0435）、高息基金（3110）都可以，你可以自己了解下，並從中選股。
另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、偉易達（0303）等（記住，股價略波動，不能太過大注）。
最後，投資前緊記預留足夠生活和應急資金。
我明白你好想退休前，盡快加大手上本金，但這是很危險的事。我見唔少你這類讀者，最終不但未能加大退休本錢，反而令情況更加不利。
所以，你"慢慢"記住換碼，用翻「平穩增值股」+「收息股」作主力，咁會較穏當。
Q46045：
龔sir，想幫小朋友的利是利投資一下，順便抗下通脹。因為睇左你既video😂想問下有咩股票推薦？大約5萬蚊左右
龔成老師：
比起一隻股票，最好投資一個「組合」，風險度會較好。
例如盈富（2800）、VOO，都是最好的擇，可長期月供，持有10年以上，平穩增長。
盈富（2800）這是一個「平衡組合的工具」，當中有80隻成份股，對股票組合有平衡作用。同時，你預是一個收息及平穩增長類基金，雖然不是高速增長，但就適合大部分投資者。
對不懂選股的投資者來說，可以用盈富作中心，加上其他股，這就是一個穩中求勝的策略。
Vanguard S&P 500 ETF（VOO）就是追蹤美股的ETF，追蹤指數是標普500指數，當中都是全球有實力的公司，有長線投資價值。
由於美股波動，不建議一次過大手買入，最好的方法慢慢分注，或以類似月供模式進行，長線持有，這是一個最好的投資策略。
Q46046：
老師, 想問吓Microsoft 最近由553蚊下跌至現價393, 如果價格下跌至275蚊, 是可以長期持有嗎? 謝謝你
龔成老師︰
微軟公司（MSFT）有一定的質素，佢係極少數，多年來都在全球市值前排位置的企業，因為幾十年間，經濟模式不斷改變，但佢仍是處一個有優勢的地位。
雖然已有一定的規模，但營業額每年仍有增長，投資價值絕對有。
管理層近年表示，正在創建由人工智能提供支持的平台和工具，以提供更好、更快、更有效的解決方案，以支援小型和大型企業的競爭力，並通過向個人和企業提供廣泛的基於雲端的解決方案。
可見，這企業雖然規模很大，但絕對不是一間無增長力的企業，憑著當中的優勢與技術，利用人工智能的行業發展，帶動企業業務更進一步。集團是ChatGPT公司OpenAI，Microsoft是主要的金主。
企業擁有一定的優勢，與技術，雖然行業不斷變化，但企業仍能保持優勢，相信長遠發展仍正面，優質度無問題。
但由於市場過往過份睇好佢同OpenAI架合作，令估值過度偏高。因為現水平算合理翻少少，算處於合理區上部，已經可以分注和長線持有。
無人知佢會唔會再落，所以要平衡，如果無貨，就可能考慮先小小注，只後每有回調，才慢慢加注。
Q46047：
你好👋🏻龔sir
我係早喺8年前睇過你的書，開始做月供股票，成功例子有1211及1810都令我有不錯收入。
現時我有兩個兒子分別5歲及2歲，我想為他們股供一些教育基金及股票或債券。
我想請教龔sir現時有沒有教育基金或股票適合我替子女儲蓄作將來升學之用?
感謝你的回覆，預祝馬年進步，身體健康，財富暴增
龔成老師︰
小朋友由於可投資時間長，策略上十分簡單。你可以儲盈富(2800)，佢係包括數十間質素不錯上市公司股票的組合，有一定增長力。
若你想增長力較高，可以儲安碩恒生科技(3067)。但此股波動性會較大，要睇翻你自已風險承受能力。
另外，你可以考慮埋美股指數ETF，令組合分散風險能力更高。VOO和QQQ，前者追蹤標普500，算平穏增長型，類似盈富。QQQ追蹤納斯達克100指數，風險會較高，風險度近似3067。
操作上，建議你用月供模式儲貨。每月大約用一半儲蓄，去做月供，餘下一半就先儲起，去等大跌市機會。如果你覺得太複雜，可以每月全部儲蓄都做月供，都係可以。
以下是2800和VOO的簡介影片，你可以睇下︰
https://www.youtube.com/watch?v=nBr4tCJ__oY
Q46048：
如果Google, Microsoft 同 Meta 比較, Meta同 Microsoft 係咪都比較老牌穩定d? 但google係最近個發展就追緊上黎？
龔成老師︰
其實3者，都有明顯不同架地方。
Microsoft主要係軟硬件服務、Google是browser(賣廣告賺錢)、META社交平台(賣廣告賺錢)。
如果計這些老牌業務，Google會係最弱，因為多左人用AI，變相少左人用browser。
以往Google browser係近乎壟斷，而家只係有優勢。
不過，如果你係問未來潛力(我相信你主要指AI方面)。
我自己會覺得，Google會係較領先。
因為佢本身有應用架生態，佢架Gemini而家係行內領先。而且，佢仲有好多具潛力業務(如AlphaFold, Genie, 量子計算等)，所以會係相對最好睇。
其次，會係META，佢架廣告因AI而有明顯提升。
最後，係MSFT，以往佢同OpenAI合作，令佢潛力度領先。但同時因為OpenAI，現時潛力度變成落後。
同埋要留意，佢地近年資金開支都大升，長線會對盈利造成壓力。
簡單咁講，業務和AI潛力是正面。但現時股價是否合理，又係另一件事。
現貨可持有，但加注就唔好太進取，始終唔平。
Q46049：
請問 2013、0302、1680、0703已機持有多年，一直沒有上升，還有上升機會？
龔成老師︰
股價係次要，最重要睇翻企業本質，睇下佢核心投資價值，是否依然存在。
微盟集團（2013）集團主要在中國從事提供軟件即服務產品及營銷服務。
佢的產品分為「商業雲」解決方案、「營銷雲」解決方案及「銷售雲」解決方案三類。
「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。
這些都是將來發展的趨勢，從業務潛力上，的確是有的，但見佢財務數據不算強。過往估值上都唔平，所以，如果投資，這刻小注好了，同時要明白風險，股價上落大，現價算是回落翻至合理區內，相信在合理區中間位置。
中手游（0302）質素較一般。
佢主要於中國從事手遊發行及遊戲開發業務。佢提供多種類型的手遊，包括ＣＣＧ（可收集卡牌遊戲）、ＲＰＧ（角色扮演遊戲）、ＭＭＯＲＰＧ（大型多人網絡角色扮演遊戲）、ＳＬＧ（模擬遊戲）等。
近年業務較波動，甚至有些年份有業務退倒情況，加上企業經常出現虧損，反映賺錢能力不強，同時企業未有太大的獨特優勢，投資價值只是一般。
澳門勵駿(1680)為澳門娛樂及娛樂場博彩設施的擁有者。集團擁有兩項主要物業：
-
澳門置地廣場：其為集合酒店、娛樂場及豪華購物中心的綜合設施，位於澳門半島中心地帶；
-
澳門漁人碼頭：為於澳門半島外港並集合博彩、酒店、會議及娛樂的海濱綜合設施。
集團持續虧損，核數師表明"不表示意見"，這類股份不宜投資。
佳景集團(0703)主要從事食品及食品手信銷售、餐飲服務，以及物業投資。
此股不是無投資價值，但收入和盈利都波動，規模細，賺錢能力不高。
投資價值只係一般。
總括而言，你選股能力較弱，長線建議你要增加投資知識。
在此之前，你可以先集中買指數ETF，對你會較利。
因為指數ETF係一籃子不同行業架組合，具放散風險能力。就算當中個別股票出問題，對成個ETF都唔會有嚴重影響。
例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800），都係指數ETF類別。這些ETF有質素，適合一般投資者選擇。
若你未有定平貴能力，可以用月供或者分注模式去儲貨，去平衡買貴貨風險。
如果想知多少少指數ETF係乜，可以睇翻我之前架Youtube影片︰
https://www.youtube.com/watch?v=nBr4tCJ__oY
Q46050：
01142 港股呢隻有無得救
龔成老師：
能源及能量環球（1142）業務持續向下，投資價值不高。
企業主要從事開採及勘探位於俄羅斯的煤礦；及於韓國從事買賣礦產資源、商品、集成模組及汽油。近年的生意不斷下跌，加上經常出現虧損，也未見企業有獨有優勢。
再加上過往股價大上大落，不建議投資。
如果你有貨，大方向都是賣出，只是幾時賣的問題可能見反彈就要減。