Q23871：

請問1310 點睇

12.26買左0270 點算

龔成老師︰

香港寬頻（1310）主要在香港提供固定電訊網絡服務及國際電訊服務，以及產品銷售。

業務發展不過不失，中短期較一般，之後會好翻D。

整體來說，長線投資仍可，但只當收息，增長力唔算強，這股不是無質素的，但又唔值得持有太多。

粵海投資（0270）正面的，這企業有多個業務，同時都處於賺錢的狀態，整體不錯。加上最大的水務部分，更是香港東江水，即是不斷賺香港人錢。

佢係供港東江水部份，賺錢能力已經比以往弱左。係疫情下，內地工商用水需求會下跌，影響收入。而且，集團收入除了水資源外，還有其他好似物業投資、酒店、百貨等，在疫情下難免會受影響。

至於增加資本開支投入建設，如果能提升現有效能，就會對佢盈利有正面影響。整體而言，集團業務依然係算穩定，預期維持平穏發展，故有長遠投資價值。

雖然你現時有帳面虧損，但你要記住，我地做長線投資，持有一隻股票與否，重點會係睇佢有無質素，而唔係個買入價。

近期佢回左唔少，但長線質素唔見有明顯下滑，依然值得你長線持有。

Q23872：

一個技術問題，你們通常會在證券公司開戶還是在銀行開戶？因為我見我先生先前在銀行的交易費用很貴

如果是證券公司，有比較可信的建議嗎？

龔成老師︰

其實在持牌證券公司開戶，定銀行開戶都可以。因為香港的監管算唔錯，都係安全。

你可以睇翻佢地收費，和邊個較方便自己，就用邊個途徑去投資。

Q23873：

龔Sir你好！有個問題想請教你，最近從朋友口中得知原來股票可以租出去，

我現在手上揸住比亞迪，小米，中國生物製藥，市值大約三百萬，三隻股票我都打算持有五年以上，請問你建議應否把股票租出去？

龔成老師︰

我地會叫這個動作，做「股票出借」。思義是指將現時手上持有的股票，借與有需要的人士，從而獲得一定利息報酬

想借入股票人士，主要係一些進行借券賣出放空、套利的投資者。

在你借出期間，係不能將股票賣出，若市場有較大波動，或者企業突然出問題，你就無法對持股進行相應調整。

但有些證券商，都可以在借出期間要求沽貨，你可以自行了解清楚。

但由於借用人最終係會歸還相關股票，對長線投資其實影響不大。

若你這些股票，係會長線持有，其實你都可以考慮借出。

Q23874：

老師，1876由上市至今已累跌超過2成，疫情對佢影響好大，令收入減少影響業績表現，明白呢個因素遲早都會過去，但行業競爭唔細

佢本身算唔算係一間優質企業呢？值得投資嗎？

想問埋新特能源

龔成老師︰

百威亞太（1876）有質素，佢係AB InBev Group的一部分，係亞太地區最大的啤酒公司。

從事生產、進口、推廣、經銷及出售超過50個自家擁有或獲許可使用的啤酒品牌組合，包括百威、時代及科羅娜，以及旗下多國品牌和當地品牌，如福佳、凱獅及哈爾濱。

百威亞太係多個國家都有相當的市佔率，同時增長力強，就近年的數據睇，盈利每年都有雙位數增長，業務、品牌、質素絕對有。

整體來說，這股質素是有的，增長力都有，之前較貴，現價合理區中至中上部，有長線持有的價值。

新特能源（1799）係太陽能級多晶硅生產商和光伏項目承包商，主要從事中國光伏產業上游和下游環節的業務。

佢除左多晶硅生產外，亦從事電力銷售（透過自有燃煤發電廠供應電力多晶硅生產之用，並銷售多餘電力予當地電網）；工程建設承包（根據ＥＰＣ、ＰＣ或ＢＴ承包模式經營，為光伏及風電項目提供能源解決方案，包括工程設計、諮詢、建設、調試及運維）；逆變器生產（用於光伏項目的一項關鍵部件）及光伏硅片及組件生產。

其實過往的生意與盈利唔算好突出，同埋有D波動，早前新能源有炒作，佢都炒起左。

雖然近半年業績有增長，但長線實質支持係咪好大，未知。但建議保守少少，暫時這股投資值博率不高。

Q23875：

請問00305五菱汽車11月開股東大會講採納新購股權計劃

終止現有購股權計劃,會對我們投資者有什麼影響?

龔成老師︰

其實不少企業，都會授予認股權給一些員工，或者相關合作人士，以作為獎勵。

而這個動作，對投資者影響，主要係當相關人士行洗權利時，會令到有新股發行，造成盈利攤薄。

不過，睇佢相關文件指出，相對份額不會超過已發行股份數目的10%，故對股東利益影響，相信唔會太大。

Q23876：

老師你好， 請問中央對香港樓市的方針會影響房託嗎？應該怎麼部署？

龔成老師︰

房託都有好多種，好似領展(0823)、置富(0778)等係著重商場。富豪產業信託（1881）這類，係集中酒店類物業，係好唔同。

中央政策，主要係香港希望配合大灣區發展，同時要解決香港房屋供求失衡的情況。

暫時睇唔到中央政策，對邊隻房托會有明顯影響。

至於如何部處，要睇翻你年紀和各股票現時價格水平。若你係年青至中年人士，可以考慮領展(0823)，現價在合理區中上部，此股有一定增長力。

若你係較保守，或者接近退休之年，可以選陽光(0435)、置富(0778)，佢地增長力唔高，主要係收下息。

Q23877：

Hi 老師你好。本人31歲。月供股票半年，請問以下組合合適嗎？

盈富1000

阿里1000

港鐵1000

福壽園1000

電能1000

領展1000

小米1000

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時31歲去計，是財富增值的黃金時期。要把握這個黃金時間，做好財富增值部份。

你現時月供的股票，大致上都合適。

但當中電能(0006)只係收息股，增長力欠奉，建議你將佢換成另一隻平穏增長股，會較好。

現時大市只在合理水平，每月儲蓄唔好盡用。要留有部份，等大跌市機會出現時，去入平貨，並長線持有。

另外，你可以考慮加入一隻安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區中間，因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

Q23878：

龔成老師你好，本人由…月供平安保險2318三年，股價越供越低，有點擔心，而這股好似業務越來越廣泛，離了保險本身行咁，想問下你對這股的評價

龔成老師︰

簡單來說，月供股票就是你每月將現金，買入某一隻或多隻股票，慢慢咁樣儲貨。月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣，去減低價格波動的風險。

所以，股價越低，反而你可以儲貨越多，其實係仲有利。不過，最重點係佢股價下跌，係中短期波動，定係長線質素出左問題，我地就要了解清楚。

若係中短期波動，我地唔洗太在意。但如果係本質出問題，就可以要調整策略，甚至減持。

中國平安（2318）有質素的，佢有規模，有品牌，近年的發展都不差。

其實佢一直都有好多保險以外業務(如銀行、資產管理等)，這些業務大部份都有價值，而且可以同主業務"保險"，產生協同性，係正面的。

不過，因為近期出現一些不利因素，令股價都比較波動。例如佢背後持有一些企業，出現債務問題。加上疫情期間，佢生活都有受到影響。

但我地投資時，個著眼點應放在長線投資價值之上。現時對佢不利因素，主要係中短期，而且都唔算核心性。

因此，這股長線投資價值依然存在。因此，你月供計劃照繼續就可以，但預中短期依然會有波動，但長線發展係正面的。

Q23879：

你好龔sir, 我對退休保障想計劃：

女性46歲，手頭現金80萬

股票持有：

中國銀行$2.75 40,000 股

敏華控股$16.5 8,000股

福壽園$7.2 6,000 股

按揭貸款$3,200,000 現時租出$8500 仍有28年供款。每期供$11000

可以每個月储蓄$18,000 是否買5年儲蓄計劃，20年後用？

月供基金是否好

龔成老師︰

物業部份，雖然現時係負現金流。但只要佢係有質素，長線租金會向上，令佢由負變正。所以只要物業質素唔係太差，照持有放租就可以。

而5年儲蓄計劃，我相信你係講緊儲蓄保險。

其實"保險"主要係用來防守，將風險轉移比保險公司，所以買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

至於月供基金，你可以衡量基金的投資策略，所投資的資產類別(最少要了解10大持股)、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

我較建議你用月供股票，去做財富增值。因為增長力會較儲蓄保險好(但風險當然會較高)，而整體費用一般都較月供基金平宜。

策略上，你可以投資「平穏增長股」作為增值目標。你每月5成儲蓄，即是用$9000做月供。其餘先儲起，用一邊月供一邊儲蓄的策略。

現時大市只是合理區，你現有80萬資金可以先投入30-40萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

至於現有持股，都係有質素。但敏華控股(1999)和中行(3988)已經佔組合比重較多，暫時唔好再加注。

Q23880：

老師你好 上過你堂知道恆生指數係可以用公式計到抵位之後就可以入市。但如果隻股票係現價屬於高位價格位置，咁買唔買哩隻股票。謝謝

龔成老師︰

恆指水平，我地只係作為一個入市時機的參考。

當我地投資一隻股票與否，重點必需放係該隻股票當時質素和平貴度。就算大市跌到好平，但該隻股票依然係偏貴，我地都唔應該買該股。

但如果你擔心無機會入貨，而當時個貴的程度，唔算好嚴重，你可以小注月供去儲貨，來平衡入不到貨的風險。