早兩日國泰(0293)出業績，因為一早盈喜咗，盈利數字已經唔新鮮，成板營運數據亦都可以skip，因為黎緊睇2月數據仲有用啦，第一個要看的重點，就是國泰一架波音737 Max都冇，值得慶賀，意味著唔會受停飛而影響載客能力。

第二個重點就是燃油對沖虧損，一如預期劇減啦，由蝕63億減至蝕14億，再看未來八個季度的對沖情況，比率大概是2至3成，油價大概是62至68美元，記著係睇布蘭特油價呀，現時是67美元，換言之在現水平浮沉，對國泰的影響就最細，如果日後狂升，由於對沖比率得3成，都會受害嘅，但作為股東，油價升令航空公司受損，你都會體諒呀，屆時咪加燃油附加費囉，最弊就是你對沖太多而油價暴跌，全世界受惠時你仲挨貴油，這就是過去幾年的慘況。

至於收購HK express的事，依家傾緊，梗係唔會漏風聲畀你聽啦，早前青冰睇新聞，有分析擔心作價太高及反壟斷之事，前者要睇太古的牙力，後者你不必過慮，太古集團冇律師團隊架咩？既然肯出價就一定事前做晒嘢啦。

中銀航空租賃(2588)由上年初的41蚊，一直升至上月的70.30歷史新高，可稱為熊市股王，增長唔錯，派息有4厘幾，認真財息兼收，不過最近由高位回吐10蚊，算係幾傷，早幾日公佈的業績，賺幾多派幾多變成非重點，因為大家都睇到現時佢哋有5架波音737 Max，最大獲嘅係仲訂咗90架，其中有11架係在12月底先訂嘅，認真唔好彩。不過都係一貫中資的態度，在業績內隻字不提這事，不過在analyst briefing有人問起，管理層強調佢哋擁有龐大的機隊，影響唔會太大，跟住就帶人遊花園，避重就輕咁答，可能中金的分析員不滿管理層玩佢，返到公司嬲嬲地即刻downgrade變持有，成為737 max事件後，除了波音外，第一間被人downgrade的航空業相關公司，認真威喇。

新創建(0659)旗下的飛機租賃，在去年中都有買咗廿幾架737 Max，中國飛機租賃(1848)在12月底都追加了25架，睇黎12月波音應該係有做discount了，個個都走去加注。

講返轉頭，個個行家都有份，國泰竟然一架都冇，黑仔咗咁多年，今次算係真正轉運喇。

Fb個人專頁 http://www.fb.com/chingbing888