渣打(2888)一聲宣佈回購，股價都忽然醒神起來，不過說來有趣，回購的消息是在4月23日傳出，當時青冰身在外地，是戰友奔走相告這消息，當時股價一度衝上71.1元，創8個月高位，不過之後幾日的表現令人失望，回吐最低見66.05，仲隊得深過出傳聞前，咁嘅走勢真係好容易被呃，結果星期二當傳聞變成事實，股價並沒有好消息出貨，反而愈升愈有，兩日累升近一成。

同是落實回購，平保(2318)的反應就較失色，星期一的股東會投票通過回購議案，公司將會回購A股。不過相提並論又唔啱嘅，無論是平保A或H股，都是在歷史高位附近，在這個水平講回購，似乎係響應阿爺叫回購，多於有實際需要，再睇睇渣打股價，歷史高位在2007年，當時接近250蚊，現時只係三折發售，這個水平回購可說是善用股東的血汗錢呀。另一個分野是回購的力度，平保市值係18000億，先至拎100億人仔出來買，相反渣打的78億元回購，相對2400億市值，明顯力度較強吧。

講開回購力度，睇雷蛇(1337)的表現便可說明一切，公司由去年7月啟動回購，至今買入2.11億股，斥資3.11億，前年上市時雷蛇的股本有90億股，所以2.11億股並不是小數目，不過如果你由開始回購時便衝入場，由1.80挨到落一蚊，相信正常人都震死了，未必有能耐可以坐返上2蚊樓上。究竟呢個浪係由強力回購帶動，還是公司的基本因素改善咗呢，青冰答你唔到，只係記得佢上市時集資40億，招股價3.88元，現時動用3億零，已經令股價由低位倍升，條數一來一回，不得不佩服幕後人啊。

近期華資也多了回購，不過目的更著重是將友好人士的股份，利用回購收納，間接將大股東的持股比例提升，戰友可以留意吓亞洲金融(0662)及湯臣(0258)，便可略之一二，前者平日只有幾萬股成交，甚至食白果，但自4月以來回購十次，有幾日成交仲超過三十萬股，沽家都非常有信心，知道一擺出來就會有人take咁，而湯臣自3月底啟動回購，回購盤經常佔當日成交一半以上，昨天更高達75%，但咁勇猛的回購盤，卻沒有將股價大幅推升，4月中後更陰陰跌，但跌還跌，回購日日都在進行，沽來沽去都係那幾個經紀，你話世事係唔係好巧妙呢。

Fb個人專頁 http://www.fb.com/chingbing888