這段時間有十幾廿隻新股上市，坦白講青冰沒細看每一間公司，即使有份落注的，也沒仔細的看招股書，確是壞榜樣。自5月以來，表現好的新股佔過半，這當然是市場氣氛熾熱有關，招股反應亦是一隻比一隻熱烈，都係雪球效應吧，今次大賺，下一隻就更博命，人同此心，咁下一隻就更難抽，直至有一隻大熱倒灶，令孖展客損手，才會令音樂椅遊戲完結。

由於季節性因素，每年七月尾至八月都會較少新股上市，因為要update最新財表需時，所以大家見到六月尾七月頭係前仆後繼的上，咁就趁現在分享幾個青冰睇新股時的要點，或可幫助大家日後揀目標落注。

新股最重要的當然是保薦人及上市團隊，這個資訊在很多財經網站都有統計，戰友可自行研究，高盛及大摩自然是信心保證，中金就聞者色變，有BNP的教育股就看高一線。另外就是基石投資者，這個向來都是重要的，但時移世易，究竟甚麼人或基金是值得尊重，已大不同了，好像十幾年前，國企民企來上市時，自然就會搵香港大孖沙入股，搵到四叔誠哥等畀面，招股反應都熱烈啲，但你睇返近月四叔個仔入股的，究竟表現如何？近兩年市場已由內地資金話事，新股市場亦然，高瓴及博裕這些名字，都有一定份量，尤其是前者，基本上見字即投，都很少甩拖，。

牌面幾靚都好，在招股期間最值得尊重的，就是市場力量，即係話有幾多孖展飛，有幾間證券行，都會在網頁裡公佈當日的孖展數字，再懶啲你睇當日收市的財經新聞都會有的。有強勁孖展飛是否代表必升甚至爆升呢？又不一定，只係高概率囉，但較肯定的是，銷情冷淡的，建議你都係等上市先買啦。孖展反應好，另一好處是你落孖展時，都唔怕最後會中得太多，要暗盤急掟貨。

招股結果出爐，戰友可能著重自己中幾多，但其實基石最後分到幾多，也是值得留意的，例如近月有不少爆炒例子，基石就差不多完全take晒配售的部分，而基石又有禁售期，相對上沽壓自然少啦。上市後青冰最重視的，就是行使超額認購權的通告，通常熱炒股見此通告後都要稍作休息，甚至見了短期頂位添。

以上的都是青冰的經驗之談，希望幫到大家，下次再有新股潮時，唔會再提你架喇，費事你爭飯食嘛，哈哈。

--

Fb個人專頁 http://www.fb.com/chingbing888