信德(0242)本周聯同霍氏基金簽訂協議，條款有好多，其中最重要一個就是維持澳娛超過50%發行股本的擁有人位置，外界普遍視這個聯盟鞏固了在澳博(0880)的實權，四太的影響力將會大減。

其實早於去年4月，賭王卸任澳博主席，由二房的何超鳳接任，已看到端倪，因為以往四太參與澳博的事務較多，直頭係發言人，但上年二房接任主席，四太同霍震霆為聯席主席，三太成為執董，四太個勢已經被削弱，今次二房及霍氏基金的協議，其中一項係在3月選澳娛主席時，將提交共同的提名建議，由於佢地揸住澳娛53%股權，即係話選主席由佢地話事。

另一個要點係，霍氏在澳娛的問題上，甚少企任何一方，即使在2011年轟動一時的爭產風波，都沒有偏幫任何人，最後更有傳事件驚動中央，要霍震霆及前澳門特首何厚鏵幫手商談解決事件，之後7年都相安無事，直至去年賭王退休。

港人近年看得太多爭產風波，賭王呢單當年雖然轟動，但你再睇鷹君(0041)爭產的新聞，就會發現當年賭王爭產真係相當斯文喇。作為外人及傳媒，今次信德及霍氏組聯盟，都會視係爭產的延續，甚至會話再起風雲，不過在於中央眼中，維穩是首要的，現在傾清楚掌權誰屬，日後辦事就更方便，指嘅係即將到期的賭牌。

青冰早前分析過續賭牌之事，有興趣的戰友可在專頁找找舊文，澳博及美高梅(2282)的正副牌，將於2020年到期，查實咁大單嘢，真係冇乜可能得返一年先傾，但由於同其他正副牌主的期相差兩年，較合適的做法是先為澳博及美高梅續兩年，再一次過重新審視發牌制度。中央已經多次表明希望澳門不只是發展賭博，仲要發展非博彩元素的旅遊中心，這亦被視為屆時投牌的一個重要因素。

澳門特首選舉將於8月舉行，雖然大家都知係例行工事，但賭牌咁大件事，會否在選舉前有定案呢，估阿爺唔到，青冰較傾向相信不會，但你哋都係時候搞清楚啲股權，邊個揸fit，否則續咗個牌之後先黎爭產，就一定出亂子，亦是阿爺最不願見的情況，所以3月選完澳娛主席後，一切皆定，個牌就隨時就交畀你喇。

Fb個人專頁 http://www.fb.com/chingbing888