Q36011：

呀sir, 其實小米做估值系唔系好難？再加上佢又搞電動車，就算做同業分析，可靠性都比較低？

龔成老師：

其實可以集中在佢原有業務進行估值，至於電動車，由於不確定性較大，可以只給一個較低的估值。

小米（1810）以手機、智能硬件，以及物聯網為平台的公司，小米專注於互聯網直接銷售產品，近年發展電動車。

雖然發展電動車，投入了較多資金，令風險比過高左，但如果成功，股價可以倍升，不過如果失敗，股價會進一步弱。

隨著新產品系列推出，小米賺錢能力提高，同時佔據了一定的市場，在中國安卓類手機4,000至5,000元價位，小米出貨量排名第一。

另外有一點值得留意，小米最新的全球及中國大陸MIUI月活用戶數持續增長，達到約6億和1.5億，均創歷史新高，而這部分會慢慢產生更多的將來收入，所以前景又不用睇得太差。

由於生產電動車令投入了資金多左，在市場未見到產品前，一定會認為風險高左。但當有具體產品出現，加上原本手機等業務開始好轉，現金流好轉，風險度就會減少，令估值有一定的重估。

考慮到小米過往的發展，其產品性價比不差，以及研發能力強，其實電動車值得期待的。

這股可長線，現價約合理區底部，分注可以，不過都要控制注碼，預佢股價仍波動。

Q36012：

老師，投資股票係要不斷搵啲有質素的公司買佢哋的股票，

以舜宇光學為例，佢一開始係一隻有質素的股票，我睇好佢於是買左好多股，但後來佢變差左股價跌左好多，低過當初的買入價，長遠來說都唔會升返去當初的股價，咁對於我來講，我係冇賺到

假如我買親的股票都有這個情況發生，咁最終其實都冇賺過錢，我想問下多唔多呢啲情況發生？

謝謝你的回覆

龔成老師：

當我地面對持貨股價下跌時，要理性分析企業質素，有無核心性改變？現時股價下跌，原因是甚麼？

舜宇光學科技（2382）佢短期弱，原因是業績差，盈利有較大的下跌，預短期較一般，至於長期，又不是無發展，雖然核心無太大問題，但管理層話競爭大左。

而我地作為投資者，就要拆解佢這情況是短期還是長期。

因為管理層話競爭大左，所以企業雖然有一定的優勢，但有機會接下來的風險增加，面對這個情況，我地就要小心處理。

第一，長遠質素仍在。

第二，企業不確定性增加。

第三，現水平股價，算是合理區較下部。

所以，你原本的持貨，可持有，但當企業風險度增加，「值得佔我地組合%」的比例，有機會減少，因此，你未必值得加注（或者，如果你貨好少，現金多，現價加少少好了）。

我地在投資，會面對好多這樣的情況，股價升升跌跌好正常，有時高過買入價，有時低過。

最重要是分析「將來」。

即是你怎樣建立一個優質股的組合，令你長遠財富有最理想的效果，而不是停在過往的買入價。

Q36013：

老師，1558 近期升咁多

佢會唔會繼續升多少少呢

龔成老師：

現時估值未算好高，當然，短期由於上升了不少，預佢會較波動，但長遠仍有機會向上，只要控制注碼就得。

佢係一家專注於在抗病毒、內分泌、心血管、抗腫瘤等疾病的製藥企業，是東陽光集團旗下的國內製劑平台。這股都可長線投資，但業務都有少少風險，因此唔可以持貨過多。

Q36014：

有樣嘢想請教，現時買AI股或量子股會唔會太遲

龔成老師：

少少，但不是完全無方法。

人工智能行業，長遠發展正面，不過，短期在股價上，已經出現了炒作。

如果你財富組合完全無這板塊想加，可以用一些平衡的方法。

第一，你要明白佢現時風險較高（當然仍有一定潛力），如果你無法承受高風險，不要投資。

第二，小心控制注碼，始終風險不少，預先設定投資這板塊金額上限，例如只佔你組合3%、5%等。

第三，只選龍頭有質素企業，或ETF，不要選一些純炒作。

第四，買入前要望定好策略，例如慢慢分注，你可以現時小注，然後等明顯回落時才加注。

Q36015：

老師，想問下你對印度股票市場有甚麼看法？

人人都說這個新興市場呢幾年會係咁升，但我對這股票市場不認識，如果我某某然入市會好危險，想問有冇咩切入點？

另你會建議我學習更多這新興市場嗎？

謝謝

龔成老師︰

印度市場近年升幅不差，現時持續有資金流動，雖然表現不現，但始終是較新興的市場，因此有風險的，而長線我會比較睇好中美發展。

記住，無論係一個市場、定一隻股票，我地都必需真正了解，才好去投資。

至於是否多學習其他市場，我自己會覺得，學多D唔同架投資領域，可以令自己財富財置更具彈性。

講緊係真正認識，而唔係聽幾個Youtube，或者睇2,3篇章個種。相比之下，如果只係表面咁認知好多市場，我情願你花時間集中研究1,2個市場，長線回報效果一定仲好。

至於投資印度，如果你分析過，都睇好當地發展，可以考慮佢架ETF。

安碩印度（2836）為追蹤標普ＢＳＥ ＳＥＮＳＥＸ指數之表現，近年增長理想。

BSE SENSEX指數是印度孟買證券交易所（Bombay Stock Exchange）的主要指數，也是印度股市的重要參考指標。它是由30家在孟買證券交易所上市的公司的股票組成，這些公司被認為在印度經濟中具有重要地位。

印度都有一定的發展力，但要注意風險。

由於印度是新興市場，因此風險會較高，因此，你預這基金是有增長力，但也有風險的，所以，投資一定要控制好注碼。

第一，我會建議投資中國、美國為核心。

第二，你如果加入印度市場，由於較新興，因此不宜佔組合比例太多。

第三，你要明白這市場有一定的風險。

第四，買入時要分注，不要一次過買。

Q36016：

龔成老師您好，我上完您的課程了，但股票方面目前就按照您教的長期放著，觀察公司情況，不隨便放

看到老師分享複利的好處，越早開始越好，就想幫女兒規劃儲蓄，但不知道那裡可以有詢求穩健的10%回報

目前只看到保險公司的儲蓄planA，但動輒就是要擺20年不動

自己股票也是在摸索中，不是很有把握，沒有信心幫她買股票

女兒才2歲，想聽聽老師不同的意見,目標1個月幫她存2000

龔成老師︰

小朋友由於可投資時間長，策略上十分簡單。你可以指數基金，例如美股的VOO，或港股的盈富(2800)，又或一些環球基金。

若你想增長力較高，可以儲美股（QQQ）、或港股安碩恒生科技(3067)。但此股波動性會較大，要睇翻你自已風險承受能力。

基本上，以你小朋友年紀計，持有以上股票都係可以，但你明白當中風險。

1) 投資理財，最重要是平衡，長線個別股票不能超過15%，個別行業維持在30%以下較爲合適。

你的組合中，銀河娛樂(0027)佔的比例偏多，雖然現時疫情已經過去，銀河娛樂的業務都在慢慢好轉，但此股整體存在波動性，不適宜佔組合的比例過多，"長遠"建議維持在10%以下較爲合適。

總體持股都有質素，若你係年青至中年，這些可以持有。

2) 你現時組合明顯偏重晒係港股，建議你未來加入一些美股，令整個組合變得更平衡。

但要留意，個別地區不建議超過組合的7成，如果不懂選股的話，可以考慮加入(VOO)，作用類似盈富（2800）。

Vanguard S&P 500 ETF（VOO）就是追蹤美股的ETF，追蹤指數是標普500指數，當中都是全球有實力的公司，有長線投資價值。

由於美股波動，不建議一次過大手買入，最好的方法慢慢分注，或以類似月供模式進行，長線持有，這是一個最好的投資策略。

Q36017：

重有，其實而家香港啲收息股都咁低殘，係咪時候大手啲去入呢？

龔成老師︰

現時不少收息股，都去到合理區底，如果係有質素，現價係一個唔錯架儲貨時機。

不過，以你40歲年紀計，應以增值為主。

收息股始終增長力較弱，未必適合你持有太多。

Q36018：

多謝老師回覆

1) 我而家有八萬蚊港幣 想喺七大美股裏面買其中六隻唔買tesla

Nvidia我等一等 ，入之前再先問你。

2) 另外我想 當每月儲錢買入，但係呢七隻，我仲未定到買邊個。

可否7隻平均都用一萬蚊買入，然後每個月當儲錢七隻都買入，打算長線投資的。

因為反正十萬八萬，我擺喺度都冇用 , 又唔係好大風險 ,輸咗都唔會影響生活的。

希望再聽聽老師的意見

萬分感謝

龔成老師︰

1) 其實近期M7(唔計TESLA)都升左好多，唔少都在合理區頂，唔算係一個好好架入市機會(最多只宜小小注)。

而最近回得較多架蘋果(AAPL)，又因歐盟新反壟斷法規，令到長線價值受到影響。

所以，其實M7而家無邊隻，話特別值得去入。

2) 長線月供M7的話，都可以。

不過，你要明白月供係長線計劃，講緊至少供3年和持有5年，才有平衡價格效果。

另外，M7當中除左蘋果(AAPL)算係平穏增長股之外，其餘都係潛力股。

潛力股如果發展得好，可以跑贏大市。但發展不似預期，都會跌好多，所以唔建議用佢做主力。

當然我明白你個部份係閒錢，但都係努力賺翻黎架野，唔建議太博，更何況佢地現價係唔平。

建議你等佢地有回調，才入首注。之後，再有明顯調整才慢慢加大注碼。

另外，最好都加少少平穏增長股，去令組合更平衡。

平穩增值股，例如指數基金，美股如（VOO）、港股如盈富（2800），另外再加：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、恆基（0012）、港交所（0388）、領展（0823）、長建（1038）等。

Q36019：

老師，我四月二十六日有花紅出，我打算 籌謀買435作為長期收息作為資產，435今天現價距離五十二週低位相近，我可以逢跌兩格在除淨日前購入嗎？

派息回報我覺得可觀，現價屬底部嗎？

另外我打算用TVC自願性退休供款申請免稅額，但我今年已六十一，如果用延期年金好似最少要供五年才可動用，如果用TVC自醒性供款，會否比年金有更好回報，況且TVC供款額度比年金自由，剛好買夠六萬就已用盡免稅額，我這想法是對嗎？

我覺得用延期年金唯一好處是回報穩定，只是以一筆供款去租用未來五年後的穩定收入。缺点是一經採用，就被鎖死資金了。冇靈活性，不能改變。

今天想買435及823都唔啱價入唔倒貨。

龔成老師︰

首先，你投資概念有好大問題。

1) 我地唔會用"五十二週低位"而類方法，去到判斷一隻股票架平貴。因為佢係單純用股價去做分析，但過去影響股價架元素，今天還100%存在嗎?

我自己只會用企業質素、行業發展、財務數據去判斷。那怕今天是五十二週低位，實際上都可以係貴，你要考清這一點。

2) 除淨日後，你除左在派息日收到股息，同時股價都會除權。即係有左手收1蚊股息，右手個股價會少左1蚊，所以除淨前後買，其實無實質分別。

陽光房地產基金（0435）有質素，可長線收息。

佢為恒基兆業地產（0012）旗下的間接全資附屬公司，恒基陽光資產管理公司所管理。

主要業務為擁有及投資於可提供收入之香港寫字樓及零售物業，寫字樓有甲級及乙級，而商場位於上水、將軍澳、元朗、尖沙咀等。

雖然近年的業務表現較一般，主要受香港地產市道、租務市場影響，之前的疫情對業務有影響，到疫後香港復蘇力度不足，都成為因素。不過大家細心分析上述數據，雖然有下跌情況，但又不是大跌模式，加上物業都算有質素，長遠仍有價值。

另一個令這股近年股價較弱的原因，就是外圍加息令無風利率向上，收息股吸引力減少，令近年股價受壓，相信到2024年下半年，美國開始減息，將會有利這股的股價。

簡單來說，陽光本身有質素，但面對香港市道及高息環境，表面會較一般，但長遠會慢慢好轉，仍是不差的收息股，現時股息率吸引，現水平有一定投資值博率，只要投資者以長期收息作為視點，這股有投資價值。

不過，我地投資要講質素外，平衡性都好重要。

所以任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。個別地區不要高於組合70%，相同行業不可佔組合多於30%，而單一企業不要高過15%。

至於免稅安排，你架想法大致正確。但MPF投資，有機會風險度比年金高。而且，中途要贖回都比年金困難，你要明白這2點。

Q36020：

龔sir您好！時光飛逝。

4年後再向您賜教，望人生路上再次有您的指引。感謝。

一轉眼4年光景，在自强發，努力向上。。開始看到一絲署光！

現在情況：

搬回公屋與母親及女兒一同生活，女兒生性考入大学，也找到part time.但人工很少，但作為.吸取經驗， 也是一件好事。

現在大概有30萬現金， 蟹貨仍然喺手... 由於居住單位真的十分 狹， 碰巧政府大快推出綠置居 出綠置居， 有興趣想買， 因為家有長者， 買到的機會率比較高， 但雖然畀到首期， 但又擔心 ，唔知供唔供得到。。

因為我年紀唔細。。 唔知將來會點， 媽媽年紀都七十幾。。 女兒仲有兩年先畢業， 如果幸運地買到 綠置居，都係三年後到先開始供。。 但係我會擔心 我年紀越嚟越大到時供唔起咁點算呢？

而家人生交叉點， 希望sir你可以再次畀啲意見我。。

再次感謝你經常無私分享， 祝你身體健康生活愉快

感謝原諒錯別字同埋打錯字

Ps.. 而家每月大概有 三萬蚊收入

龔成老師︰

見倒你人生開始重回正軌，我都好高興。

其實你個年紀(應該是50左右)，要置業唔係話唔得，但因為你本身收入應該都唔太穏定(因為係part time)，可能係實際申請銀行貨款，或者供款時候，會有風險。

我建議你先諗清楚，長線是否有必要搬，還是一直公屋就可以(因為女兒長大，有機會自立成家，到時面積需求會細左。)，以免為自己增加不必要財政壓力。

如果有需要，就計清楚自己有無信心長線供得倒，同埋綠置居地點是否真係適合你同家人長線需要(最少未來10-20年)，先作出最終決定。

至於股票方面(如果你組合同4年前一樣)，瑞聲科技（2018）近年弱左，長飛光纖光纜（6869）本質本來就較一般，2隻長線不宜持有太多。其餘2隻，可持有。