你好龔成老師，大約兩年半前同老師分享過：
「打左工幾年後，就出嚟創業」
兩年半後，我update下近況先
生意尚算不錯，工作量愈來愈多，頭兩年得自己一個做，做得好辛苦。終於今年請左位同事，幫輕左好多，行開行埋公司都有人睇住。
收入方面，頭兩年，每年扣除晒公司開支後，淨袋都有一百萬一年。今年請左人，支出會大左，可能冇賺咁多，但叫賺返嗰生活 同埋 健康。
最近係度諗：
我已經比起打工時搵多好多，兩年創業，可能已經等於搵緊打工6年既錢。
咁究竟，我仲要做多幾耐先可以停？
即係話幾時先可以退休？
我唔認為需要永無止境咁搵錢，我知道錢唔係愈多就愈好，足夠其實已經好好。
我行業性質係，即使請左人，其實仍然需要親力親為，客仍然要親自見，同事做完報告，我都要睇，同埋受住政府部門好大既監管。即係話：工作上仍然需要我好大既參與程度。
興趣方面，這行唔係我興趣，只係我能力上應付到，而且係熟悉。
我初步打算係：做到40歲就會結束公司業務，閒時接下freelance ，唔會好似依家咁瞓晒身。這兩年都有投資股票，儲左一百萬股票左右，打算長期持有。（背景：女、兩三年後會生小朋友）
老師，咁樣想法實際嗎？咁早退休，會唔會好似無所事事咁，浪費繼續賺錢既機會？
個案重點：
‧做生意，一年賺$100萬
‧生意困身
‧這行不是自己興趣
‧兩三年後會生小朋友
重點目標：
‧想平衡生活
‧做到40歲就會結束公司業務
龔成老師分析：
其實不同人在不同的人生階段，就會有不同的選擇。
久不久就會睇到網上有某某高管放棄高薪，去幫助別人，完成兒時夢想等等。
有啲人會認爲咁樣好傻，認爲不值得；但又有啲人會支持，認爲重新找到自己，咁到底是值得還是不值得？
我想無一定的答案，因爲每個人的價值觀都不一樣，人最重要是了解自己，知道自己選擇了什麽，同時放棄了什麽，並且不後悔就已經好足夠。
錢的確是搵唔完，如果你單純以擁有越多的錢作爲人生目標，咁樣人生的確會失去好多的樂趣。
好多人想財務自由，其實不是執著於金錢的數目，而是擁有足夠的金錢之後，能夠做自己想做的事情。
你問「咁早退休，會唔會好似無所事事咁，浪費繼續賺錢既機會？」，咁我會問：幾年之後，你是否有足夠的金錢過完自己的下半生，再加上你會養兒育女，供書教學，這幾年的收入是否足夠？
如果足夠，你可以退休，過自己想過的財務自由生活；否則，當你將來負擔增加之後，再出來工作的話，可能你就過得更辛苦。
明白你希望有更多的自由，這都是我地工作賺錢的其中一個原因，因此，你可以好好計劃，如果資金足夠，提早退休，尋找自己想要的生活，這其實是一件好事。
如果你想要具體的答案，你最好做到以下的條件：
第一，就是生意已經穩定，面對各環境都不會出事，最好是上軌道，能自動運作，你只要簡單管理就得，這樣你就能抽身。
第二，就是財務自由，即是你已經建立了一定的資產項，可以靠每月現金流去生活，不用為生活而苦惱，到時你就能選擇工作或不工作。
你可以計算一下，如果你儲夠一筆錢，憑這資產產生的利息收入，是否足夠你生活，又或是你希望得到的現金流數目。例如你有$800萬，投資收息資產，一年收6%，一年就有$48萬息，每月$4萬。你就可以利用這些資料，參考一下，自己要儲多少錢，才是適合退出的時機。
龔成老師簡介
‧ 暢銷書《圖解美股小百科》、《圖解股票小百科》、《股票勝經》、《選股勝經》、《年報勝經》、《50優質潛力股》、《50穩健收息股》、《50值博倍升股》、《38全球倍升股》、《大富翁致富藍圖》、《5年買樓4部曲》、《80後百萬富翁》、《80後2百萬富翁》、《80後3百萬富翁》、《80後千萬富翁》、《千萬富翁致富學問》、《財務自由行》作者
‧ 《經濟一週》理財真人Show 節目擔任致富教練
‧ 曾接受港澳多個傳媒訪問
‧ 過往於銀行從事投資相關工作多年
‧ 曾在萬多元月薪狀態下，憑股票累積數百萬財富
‧ 現為全職投資者，擁數千萬財富
‧ 於網上分享投資心得，瀏覽量過百萬，為人氣博客，解答網友理財問題逾30,000條
‧ 《經濟一週》、《華富財經》專欄作家
‧ 擁財務學學士學位
‧ 證券業持牌人士
‧ 投資課程導師，香港及澳門學生人數逾5,000 人
‧ Facebook 專頁「龔成」粉絲人數超過300,000人
若然你有問題想向龔成老師發問，可在龔成的fb專頁中（www.facebook.com/kungshing80）inbox龔成。