中電乃係全港普遍認為最穩陣的股票之一，月供、收息、避險，乜都做得到，所以昨天發盈警的確係幾令人意外，不過原來有些蛛絲馬跡，在全年業績及首季報告時有提及，但大部分人，包括青冰，都只會睇實派息增加幾多，計吓現價的息率，沒仔細去咀嚼，無他，因為中電多年來實在太穩，基本上大家唔會預期佢會出亂子，平穩的盈利及派息增長，「有買貴冇買錯啦」。

今次出事的是澳洲分部，在去年的全年業績，澳洲佔營運盈利22%，是僅次於香港的58%，達33億元。在全年業績的第6頁，「預計2019年的批發電價將會回軟」，這是第一個提示，而在首季簡報的第4頁，提及澳洲幾個省都會重新規管住宅及中小企客戶的常規價格，並將於7月1日生效，「很可能會對零售業務的未來貢獻產生重大的負面影響。」季績在5月7日公佈，現在馬後炮回看，的確走漏了眼。

商譽減值這些非現金一次性項目，正常唔會太影響公司的營運，但重點係，現時澳洲的政策改變，令當地長遠的盈利貢獻下降，首5個月的營運盈利只得7.3億，咪以為已經反映了政策改變，留意係7月1日先生效啊，點解首5個月的進度，比去年差咁遠，全因在澳洲那邊對沖了煤價，上半年煤價向上，就錄得對沖虧損，唉呀令青冰想起國泰(0293)啲燃油對沖添，真係屋漏兼逢連夜雨。

一撇就70億，已經是去年盈利的一半，咁今年條數就肯定肉酸，但股民最擔心的不是你個PE高咗好多，反正大家都係唔理，只望實個派息。出現以上的困境，其實減派息都合理，但作為一間自1999年後未試過減派息(以全年計)的公司黎講，除非好大獲，否則唔會想出此下策。

大家要留意的是，出季績那天亦同時公佈首季派息，中電慣性係首三季派息一樣的，而上文提及，出季績時已講咗7月1日生效後，將產生重大負面影響，換言之，管理層當時決定的派息，應該已掌握此因素的影響，所以首三季每季維持0.63元，應冇問題，而末期息係幾多，就真係睇有幾大鑊了，去年末期息就派咗1.19元。過去20年，中電的末期息最差時都只係持平，從未減過，20年係代表了幾個金融及本港的危機啊，所以姑且信佢會至少派返1.19元，全年就會收3.08元，現價息率就是3.4%，要跌到幾多厘先吸引到戰友入場，自己計數吧。

Fb個人專頁 http://www.fb.com/chingbing888