市況差，炒作氣氛欠奉，恆指單月由高位跌三千點，中小型股份陰陰跌，與其在呢個時候搵嘢炒，不如抖足精神，做定功課，為下一浪做準備。大家都知向太近日愛華為，不過用部蘋果機出post，網友可能瘋狂訕笑，但別人笑我太瘋癲，向太笑你看不穿，五哥身為賭神的挈友，賭技未必得，但財技肯定得，今日就溫故知新，回顧吓這一年中國星(0326)做咗啲乜。

翻查記錄，中國星以往供股合股都相當多，青冰以前都冇跟開，但去年貿易戰剛爆發時宣佈供股，便引起青冰注意。供股係一供二，供股價是0.25元，較宣佈前收市價有約36%折讓，當日市況差，翌日梗係裂口低開兩三成啦，但個重點係，原來大股東向生向太，係會負責包銷。去年4至7月的市況，同是輾轉向下陰陰落，所以供股只有50%獲認購，但額外供股的數目卻非常多，點解咁踴躍呢？原來五哥選擇從額外供股的途徑供股，因為其他小股東唔要嘛，五哥話我要晒佢。

供股前大股東持有1.86億股，佔20.6%股權，公眾股東有7.17億股，佔79.4%，供股後，大股東持有14.05億股，佔51.9%，公眾股東有13.05億股，佔48.1%。一睇個分佈，就知去年的貿易戰令投資氣氛極差，其中一個受惠者可能是五哥啊，股權大幅上升至過半。經此一供，大股東增加了12.19億股，以供股價0.25計，荷包拎咗3.04億元出來。

供股完成後，中國星在8月先出一個盈喜，扭虧為盈，因為出售澳門酒店執咗14億，不過呢個唔係新聞，去年年初已經落實，9月時再在場內增持1.4億股，作價0.475元，最開心嘅係12月，突然公佈派發0.15元特別股息，按今年1月除淨前的數字，五哥係持有15.45億股，篤吓計數機，呢度已經收返2.32億元，再用早前供股及增持的數字計吓，這一年以來，用了1.38億，股權增加了三成半。在於整間公司來說，供股集資收到4.5億元，但派特別股息又用咗4.1億，一來一回抵銷了大半，確係好有趣的。

中國星在過去兩星期又突然回購喎，7年以來首次，截至昨天已回購7426萬股，用了5774萬元，亦支持了股價在這個動盪的5月企穩，公司的現金水平仍高，粗略估算，派完特別息後仲有7.5億，再用近六千萬回購，仍然仲有6.9億吧，大把子彈頂住個價。

細細個睇賭片時已經覺得五哥又打得又型，近月再發現，型都不足以形容呀，各位觀眾，五條煙！

Fb個人專頁 http://www.fb.com/chingbing888